Read saamia Abakayi 9 Bible Online

Abakayi 9 - saamia bible

Abakayi 9

¹Abbimeleki omwaana wa Gidioni yachia mu siko sya Sekemu, yi beeho ba ng'ina boosi bali nibamenya, mani yaababoolera

²bateebeho abasaacha bali mu Sekemu bati, “Eng'we siina syeene simwahahirire ohudaha? Ohubona muti abaana ba Gidioni boosi amahumi kataanu-na-kabiri ohubatuka, kose mulala yeeng'ene niye oba abatuke? Nae mwiichulisaanga muti, Abbimeleki niye amabaanga keeng'we keene haandi omubiri kweeng'we kweene.”

³Abeeho ba ng'ina abo bosi bamuboolera neende abasaacha ba Sekemu ebidiira hu mboosi yino, mani abasaacha ba Sekemu nibeemao nibaheengao ohuloonda hu Abbimeleki olwohuba yali naali niye omwiiho waabwe mweene.

⁴Abasaacha bano beecha baamuberesa ebituundu by'efeesa amahumi kataanu-na-kabiri ohutula mu nyuumba ya nasaae Bbaali w'Endagaano, mani yehoonyera eseende chino ohupaangisa omukaanda kw'abaandu b'esimyeeni neende amawuundu ohuchia nae.

⁵Bulaanu yaachia ena nyuumba ya laatang'ene eyiri Ofura, mani niyoola ebweene eyo, yeetera aakulu w'ekina lala lyoong'ene bamwaanang'ina abo amahumi kataanu-na-kabiri boosi, abali abaana ba Gidioni. Nae Yotamu, omwaana wa Gidioni owali naahiramo obuyere, yeekisa mani yawona ohwiitwa.

⁶Abasaacha ba Sekemu neende Bbetimiilo bosi basiingira bebuusa alala baachia ena mutuumba mwoolerefu okwali nikuli mu Sekemu, mani nibeehasira abweene ao Abbimeleki ohuba omutuki.

⁷Yonatani niyawulira atyo, yachia yeema aakulu w'Olugulu lwa Gerisimu yabehuuma n'aboola ati, “Eng'we muutekeereseho, eng'we abasaacha ba Sekemu, awuundi Nasaae anyala yaabawuliraho!”

⁸Olwoola, emisaala kyeecha kyaadaha ohwedoolera omutuki wakyo. Kyeecha kyaboolera omuseituuni kiti, “Ewe kanya mani obe omutuki weefwe.”

⁹Omusaala museituuni okwo nakwo kwaakobolamo kuti, Ese hu nyemeo nyale ohubatuka, bichia ohunjiika njakame ohutusaanga amafuta kaange, akehoonyerwaanga ohuta oluyaali mu banasaae baandi neende abaandu.

¹⁰Bulaanu emisaala kyeemao kyaboolera omusaala mutuli kiti, “Ewe yicha obe omutuki weefwe.”

¹¹Nae omutuli okwo kwaakobolamo kuti, “Ese hu nyemeo nyale ohubatuka, bichia ohunjiika njakame ohwamaanga ebyaamo byaange bilai binyunyuula bino.”

¹²Bulaanu emisaala kyeecha kyaachia eyiri omusabbiibbu kyakuboolera kiti, “Ewe yicha obe omutuki weefwe.”

¹³Nae omusabbiibbu kwosi kwakikobolamo kuti, “Ese hu nyemeo nyale ohubatuka, bichia ohunjiika njakame ohuholaanga efiini yaange yino, eyikeraanga banasaae neende abaandu nibasangaala.”

¹⁴Bulaanu emisaala ekyo kyoosi kyeemao kyaachia eyiri omusaala kw'oryaang'i okw'amawa mani nikiboola kuti, “Ewe yicha obe omutuki weefwe.”

¹⁵Nae omusaala kw'oryaang'i kwaakikobolamo kuti, “Nikali mbwe ni obwadyeeri mbwe eng'we mudahira elalira ohuuhola mbe omutuki weeng'we, mani mweesi mwiiche mweeyikame omubasu mu siiniha syaange sino. N'otahola otyo, omuliro kuchia ohubbabuluha nikutula mu masaga kaange k'amawa kano kusaambe emituumba kya Lebbanooni.”

¹⁶“Bulaanu buti,” Yotaamu yemeeda ohulomaloma n'aboola ati, “eng'we mwali sa nimuholera mubwadyeeri bweene, nimwali nimwiihasa Abbimeleki ohuba omutuki? Eng'we mwali nimwiisa oluyaali mu biindu bi Gidioni yeechulisa, mani mwoola ohuyira edaala lyae bulai, koti lu biholwa byae byali nibihoyera?

¹⁷Mwiichulise muti laata yaange mweene yesi yabalwaanira. Yayaanayo obulamu bwae hu yaanyala ohubawonia ohutula hu Bamidia.

¹⁸Nae eng'we mbano endaalo chino mbao mumalire ohukaluuhana hu daala lya laata. Mwiichire mweetera abaana bae boosi, abasaacha bahuluundu amahumi kataanu-na-kabiri, hu kina lala liti, haandi olwohuba sa mbwe Abbimeleki, omwaana wae yi yanyoola mu muhalaabani wae muhasi, oli omwiiho hweeng'we, mani sakira munyalire sa ohumuhola ohuba omutuki wa Sekemu.

¹⁹Bulaanu, nikali mbwe esiindu simuholere Gidioni neende edaala lyae olwaalero luno nisiri esyadyeeri haandi esihoyera syeene, mani eng'we musangaalire Abbimeleki mani yesi ahoya yesi yabasangaalira atyo.

²⁰Nae nikataali katyo, omuliro kuhoya kwatubuha nikutula mu Abbimeleki mani nikuchia nikusaamba abasaacha ba Sekemu neende Bbetimiilo boosi. Omuliro kuhoya kwatubuha nikutula mu basaacha ba Sekemu neende Bbetimiilo mani kwaachia kwasaamba Abbimeleki yaaya yaawa.”

²¹Olwohuba yesi yali n'atiire Abbimeleki mwaanang'ina, Yonatamu yeecha yeeruha yawaao yaachia yaamenya Bbeeri.

²²Abbimeleki yatuka Yisiraeli hulw'embaka y'emyaaka kidatu kyoong'ene.

²³Mani Nasaae yaahola Abbimeleki, alala neende abasaacha ba Sekemu bachaaka ohuyiimana abeene-na-beene, mani baahayana neende Abbimeleki.

²⁴Sino syaholehana sityo, hu bulaanu Abbimeleki, alala neende abasaacha ba Sekemu, abamuchuuba ohwiita abaana ba Gidioni amahumi kataanu-na-kabiri amalaamba, banyale ohutuunga obutemo bwaabwe obwo.

²⁵Mani abasaacha ba Sekemu beecha baateka abasaacha ohweboonderera Abbimeleki aakulu w'engulu, mani baanyala ohuyaayanga buli muundu yeesi owabitaanga hu ngira yaabwe eyo. Abbimeleki yeecha yaboolerwa ebidiira hu bino byoosi.

²⁶Gaali omwaana wa Ebbedi yamala yeecha mu Sekemu, alala neende bamwaanang'ina, abasaacha ba Sekemu baamutaamo obweesikwa bwaabwe.

²⁷Boosi batula erwaanyi baachia mu ndaalo ch'ebyaamo chaabwe, mani baanoka emisabbiibbu mani nibakihunyamo efiini, mani nibahola esidyaalo. Beengira mu nyuumba ya nasaae wabwe, mani baang'weera mu bweene omwo, haandi baaliira mu bweene omwo nibakachulira hu Abbimeleki.

²⁸Gaali bulaanu yeemao yaboola ati, “Efwe abasaacha ba Sekemu huli abasaacha ba mbya siina? Lwasiina hwafukiirira sa ohuhalaabaniraanga Abbimeleki? Abbimeleki mweene wuno nae chana niye naanu? Omusyaani sa wa Gidioni wuno! Mani Sebbuuli yeesi yaafukiirira ohulagirwaanga nae, nae efwe siina syeene esikera ni humuhalaabaniraanga sa?” Mwahahoyere mwesaanga oluyaali mu Hamoori kuuka yeeng'we yeeng'ene, olwohuba oyo niye owatoongola enono yeeng'we yino!

²⁹Mani mba mbwe ni niise omwiimirisi w'abaandu bano, mba ndamala ohumalao Abbimeleki hale bweene! Mba ndahamuboleere sa endi, “Ewe meeda amaani mu eye lyao lino, mani otule erwaanyi olwaane!”

³⁰Sebbuuli, omwimirisi w'esiko esyo, yeemao yanyoolera muno niyawulira bi Gaali yali n'aboolere.

³¹Yeemao yaatuma bawamwaanda ohuchia eyiri Abbimeleki mu Aruma; ohuchia ohuboola bati, “Gaali, omwaana wa Ebbedi alala neende bamwaanang'ina mbano beechere mu Sekemu, mani haba sibachia ohuhukanya ewe wiiche wiingire mu siko muno daawe.

³²Bulaanu ewe alala neende abasaacha bao mweesi, muhoyere ohukeenda esiro mweecha mweekisa mu mikuunda.

³³Siingire muchuli echuli, elyuuba nilitula, mani museete esiko sino masiindusa. Mani ao, Gaali alala neende abasaacha bae nibanaba nibatulayo ohubachooma, musiingire mweesi mani mubahubbire elalira neende buli siindu syoosi si munaba nimuli nasyo!”

³⁴Abbimeleki alala neende abasaacha bae boosi baaholera hu endekeha yaabwe eyo esiro, mani beekisa erwaanyi wa Sekemu mu mikaanda kine.

³⁵Abbimeleki neende abasaacha bae nibeecha baabona Gaali naatula erwaanyi, niyeecha niyeema mu siruwa sy'esiko esyo, basiingiraniramo mani beekisula ohutula mu bituundu bi bali nibeekisiremo.

³⁶Gaali mani niyababona yaboolera Sebbuuli ati, “Ewe lingaalaho obone! Aliwo abasaacha abali ohwihirira nibeechera eno nibatulira aakulu w'engulu chira!” Sebbuuli nae yakobolamo ati, “Abo haba si basaacha nibo daawe.” Haandi yameedaho ati, “Ebyo biiniha sa nibyo ebiri hu ngulu.”

³⁷Haandi Gaali yaloondamo ohuboola ati, “Ewe lingaalaho obone! Aliwo abaandu bali ohwiihirira hu lwaanda lw'olugulu, nae haandi omukaanda mulala nakwo ohwiichira hu ngira yitulira ena mutuumba okwa abalakusi!”

³⁸Bulaanu Sebbuuli yamuboolera ati, “Ewe, ohwefumia hwao huungi ohwo huli yeena bulaanu? Ewe niiwe omweene owatebereenge esifune syeene sikera efwe nihwewaayo ohuhalaabaniraanga omusaacha wuno Abbimeleki. Bano nibo abasaacha ba wacheherereenge. Tula bulaanu ochie obalwaanie.”

³⁹Gaali yemirira abasaacha ba Sekemu mani baatula baachia balwaania Abbimeleki.

⁴⁰Abbimeleki niye owataangira ohuchooma Gaali, Gaali yeruha. Abaandu abaangi muno banyaaliha, ohwoola hu siruwa sy'esiko bweene.

⁴¹Abbimeleki bulaanu yeecha yaamenya mu Aruma, nae Sebbuuli yeerusa Gaali alala neende bamwaanang'ina boosi baatula mu Sekemu, mani byaabahaya ohumenyaho mu bweene omwo.

⁴²Oludaalo lwaloondaho, Abbimeleki yafuumbula yamanya ati hane abaandu ba Sekemu bali ni batekehaanga ohutula erwaanyi ohuchia mu mikuunda,

⁴³mani yabukula abasaacha bae, yaabakabulamo emikaanda kidatu emilaamba, baachia beekisa mu mikuunda omwo, baliindirira sa. Mani niyabonaho abaandu nibali ohutulaanga erwaanyi w'esiko esyo, yaakisuha yi yali niyeekisire mani yachaakaniramo ohubeeta.

⁴⁴Nae Abbimeleki neende omukaanda kwae bayuyuuhana ohuchia mu moni ohuliinda esiruwa siingira mu siko, emikaanda kibiri kiindi kira kyali nakyo nikiseeta abaandu bali nibali mu mikuunda, mani nibabeeta boosi pe.

⁴⁵Ohulwaana ohwo hwachiiririra ohumalaho oludaalo olwo lwoosi. Abbimeleki yaanyala ohuwaamba esiko esyo, yeta abaandu bali nibasimenyamo, yaasilikula syaweera aasi, mani yabwiiha hu loba neende omuunyu muhaya.

⁴⁶Mani abasaacha bali abahoongo mu lukoba lwa Sekemu nibawulira hu sino, beecha beeruha baachia bakoonya obweyikamo mu buliindi bw'amaani bw'enyuumba ya nasaae Bbaali w'Endagaano.

⁴⁷Abbimeleki haandi yaboolerwa ati abaandu abo bali nibebuusiire omwo,

⁴⁸yaniina yaachia hu Lugulu lwa Salimoni alala neende abasaacha bae. Niyoola eyo, yabukula eyaywa, naatema omusi mulala okw'omusaala, mani naamala nakwedwiiha hu beka lyae. Yeecha bulaanu yaboolera abasaacha bae abo bosi baanguyeho bachie bahole koti lu mweene yali naaholere.

⁴⁹Mani ao, buli muundu yasiingiraniramo, yaachia naatema omusi kw'omusaala mulala-mulala; mani nibamala boosi nibaloonda hu Abbimeleki, mani nibachia nibabuusa alala oluhanya lw'ehwi hu buliindi bw'amaani obwo. Bulaanu balutubulaho omuliro, abaandu boosi nibali mukati, mani abaandu boosi ab'omulukoba omwo baafwa boosi, aambi abasaacha neende abahasi elifu ndala (1,000) enaamba.

⁵⁰Bulaanu Abbimeleki yatula ao, yaachia mu Tebbeesi, yaamala yasyebodoohania, mani yaasiwaamba.

⁵¹Eyo yaliyo niyiriyo omunara kw'amaani muno, mani buli musaacha, kata sa omuhasi yeesi owalichiingi mu siko omwo, haandi n'oyirira alala neende abeemirisi boosi, beeruhiraanga hu bweene ohwo. Beikaliraanga mu bweene omwo mani bamala baniina aakulu bachia hu sirama bweene.

⁵²Abbimeleki niyeecha ohuseeta omunara okwo, yachia mu mulyaango kwakwo okwo, ati atubule omuliro hu munara okwo.

⁵³Nae omuhasi yeecha yasukuma olukina olulaamba nilwiihira hu mutwe kwae, mani nilunyoonyobola esyaanganga syae.

⁵⁴Yaanguyaho yalaangaa omusaacha muraaga wali namukingiire ebilwaaniso byae, mani n'amuboolera ati, “Ewe yaanguyaho mani osoboleyo olugaanga lwao olwo omale wuunjite.” Omusaacha muraaga oyo yeecha yaamubisamo olugaanga olwo yafwirao.

⁵⁵Abaisiraeli beecha baabona bati hane Abbimeleki amalire ohufwa, boosi batula sa ao, mani baakobolayo engo waabwe.

⁵⁶Mani bityo, nilwo lu Nasaae yanyala ohutuunga Abbimeleki hulw'obutemo bu yahola hu laatang'ene koti lu yeeta bamwaanang'ina amahumi kataanu-na-kabiri.

⁵⁷Nasaae haandi yahola abasaacha ba Sekemu basaanda hulw'obubi bwaabwe obwo, koti sa lu Yotamu, omwaana wa Gidioni, yaboola ati abo bachia ohuba ludaalo lu babebwaabira.