Read saamia 2 Yowaana 1 Bible Online

2 Yowaana 1 - saamia bible

2 Yowaana 1

¹Ese Omukofu nyandiikira omuhaye mulobole neende abaana bae, ba ndaha mubwadyeeri. Nae haba siniise syeeng'ene abaandu boosi abamanyire obwadyeeri bosi babadaha,

²ohweema hu bwadyeeri butulimo, haandi obuchia ohuba naafwe endaalo choosi.

³Lehe Nasaae Seefwe, neende Yesu Kristo Omwaana wae, bababerese embabaasi, esisa neende omuleembe, mubwadyeeri neende mu buheeri.

⁴Sangaala muno ohunyoola endi abaana bao baandi bali mubwadyeeri, koti lu Seefwe yatulagira.

⁵ Sakira bulaanu hwekweeda ewe omuhaaye, haba sihwandiikira esilagiro siyaaha, ohutusaho esyo si hwali nasyo ohutulira elalira muhuchaaka endi, muheeraneenge.

⁶Buno nibwo obuheeri, mbwe hudiire ebilagiro bya Nasaae. Koti lu mwamala ohuwulira ohutula hale, abalagira ati muheeraneenge.

⁷Ababacha baangi bamala ohusalaanira mu syaalo syoosi, abaandu batafukiirira bati Yesu Kristo yeecha mu mubiri koti omuundu. Omuundu w'engeri yino mubacha haandi Musuku wa Kristo.

⁸Sakira mweliinde, mutasubwa ebiindu bimwahalaabanira, nae munyoole omusaara kweeng'we mwiichufu.

⁹Omuundu otaali mu njekesa ya Kristo, nae yemeeda mu yiindi, oyo saaba ali neende Nasaae. Omuundu odoong'a mu fukiirira, oyo niye oli neende Seefwe haandi neende Omwaana.

¹⁰Sakira omuundu yeesi niyeecha yi muli mani yaahaya ohuleeta enjekesa yino, mutamwaakaanira mu madaala keeng'we, haandi kata mutamuheesa muti, “Omuleembe kube naawe.”

¹¹Olwohuba omuundu omwaakaanira neende eheesa eyo, aba yeyambaniise nae mu biholwa byae bibi.

¹²Mbeere ndi neende emboosi nyiingi ech'ohubaboolera, nae haba sisilai ohubaboolera mu bwandiike; ohutusaho, suubira ohubakeniya nomanome naang'we nihubonana. Mani huchia ohuba neende esangaalo liichufu.

¹³Abaana b'omuhaana weeng'we muheerwa, babatumira amaheeso kaabwe.