Read saamia 3 Yowaana 1 Bible Online

3 Yowaana 1 - saamia bible

3 Yowaana 1

¹ Ebbarwa yitula eyiri Omuhuluundu ohuchia eyiri Gaayo owasyaange muheerwa muno, yi ndaheera mubwadyeeri.

²Omwiicha waange muheerwa, saba endi, buli siindu sihuchiire bulai, haandi obeeo omulamu mu mubiri koti omwooyo kwao kuli bulai.

³Ndali neende esangaalo liingi muno nindawulira Abakristo baandi nibaboola koti lu oli neende obweesikwa mubwadyeeri, haandi koti lu buli ludaalo, oli mubwadyeeri.

⁴Abulao esiindu siindi esiisaangaasa ohuhiraho ohuwulira endi abaana baange baloondakana neende obwadyeeri.

⁵Omwiicha waange muheerwa, oli omweesikwa muno mu mirimo ky'ohuhalaabanira Abakristo, kata neende abahaba nibali sa abateende,

⁶haandi bamala ohulomaloma eyiri emikaanda ky'Abakristo ebiindu bidiira hu buheeri bwao nabo. Haandi bahoonye bemeede ohukeendera mu ngira yisaangaasa Nasaae.

⁷Olwohuba bachaaka ohuhalaabanira Kristo nibatanyoola obuhoonyi bwoosi ohutula eyiri abakafiiri.

⁸Sakira huhoyere ohubahoonya, hu hunyale ohwaambaana nabo mu huhalaabanira obwadyeeri.

⁹Nyandiika ebbarwa nyimbikiti yino ohuchiira Abakristo, nae Diotireefe owaheera muno ebiindu by'ohweniinia naadaha obwiimirisi mu buli siindu, haba saanadeebaho hu biindu bi mboola.

¹⁰Sakira niinjicha eyo njia ohwaaniha alafu buli siindu si yaholaho syoosi: ebiindu bibi byaatulomalomaho, neende obubacha bwae. Nae sibonehana siti ebyo byoosi haba sibimumala, haba siyahaakaanire Abakristo baasyefwe nibeecha, haandi akayiraanga abaasye baba nibadaha ohubakaanira, mani abeerusa abatusa kata neende mu mukaanda kw'Abakristo!

¹¹Omwiicha waange muheerwa, omanyaanga oloondakanaho neende ebiima bibi ebyo, nae loondakanaanga neende ebiima bilai. Omuundu yeesi ohola ebilai aba ali owa Nasaae. Nae omuundu ohola amabi, oyo aba asisiiri ohumanya Nasaae.

¹²Buli muundu yeesi alomaloma bulai hu Demetirio haandi bamulomalomaho ebilai byoong'ene. Kata fweesi humulomalomaho bulai, haandi humanyire huti, bi humulomalomaho byadyeeri nibyo.

¹³Mbeere neende ebiindu biingi muno eby'ohuhuboolera, nae haba siinjia ohuhola endyo mu bwandiike.

¹⁴Nae suubira ohuhubona bwaangu muno, mani hu hunyale ohulomaloma.

¹⁵Omuleembe kube naawe. Abeecha bao boosi bahutumira amaheeso. Weesi tuheesereho abeecha beefwe boosi omweene.