Read saamia Yuda 1 Bible Online

Yuda 1 - saamia bible

Yuda 1

¹ Ese Yuda, omuhalaabani wa Yesu Kristo haandi mwanaang'ina Yakobbo, nyandiika ebbarwa yino ohuchiira abaandu ba Nasaae yalaanga abali mu buheeri bwa Nasaae Seefwe, neende mu huliindwa hwa Yesu Kristo.

²Lehe esisa, omuleembe, neende obuheeri byemeede ohuba mweeng'we.

³Basyaange baheerwa, mbeere ndeemaho koti lu nyala ohubaandiikira ebidiira hu huwonisibwa hweefwe fweesi huli nahwo. Ndabona endi, sihoyerwa ohubaandiikira bulaanu, ohubagumia mu hulwaanirira efukiirira yi Nasaae yamala ohuberesa abaandu bae ehabi lala lyoong'ene.

⁴Olwohuba baluwo abaandu baandi abatatya Nasaae abamala ohutwiingiramo mu bweekisi nihutaamanyire. Abo nibo abaandu bataamanyire Nasaae haandi abahyaamia enjekesa yidiira hu mbabaasi cha Nasaae hu babwiihe hu bibi byaabwe, haandi bahaye Yesu Kristo, ow'Oluyaali luhiramo haandi Omwaami weefwe.

⁵ Kata mwahaba nimumanyire bino byoosi, ndaha ohubeechulisa endi Omwaami niyamala ohununula Abaisiraeli mu syaalo sy'e Misiri, nae luunyuma yasihirisa abo abahaya ohufukiirira.

⁶Yichulise bamalaika baduuma enjaho ch'obunyala bwaabwe, mani baaleha obwiihalo bwaabwe, koti lu Nasaae yabeekalira mu syaalo sy'esiirima mani yaababoya neende eminyororo endaalo choosi nibaliindire oludaalo luhoongo luchia ohwiicha lu baheengeraho emisaango.

⁷ Mu ngeri nasilala eyo, yichulise Sodomu neende Gomora, alala neende ebiko bibyebodohaanie, bi baandu babyo hale ao bahola koti lu bamalaika abo bahola, mani baahola obucheke mu ngeri ndoondobanu, abo nibo aboohuboneraho. Basaandisibwa endaalo choosi hu banyale ohuba esyohuboneraho eyiri abaandu boosi.

⁸Mu ngeri nasilala eyo, haandi bano ebilooto byaabwe bibabachirisa mani byakera bahola ebyonoono hu mibiri kyaabwe kyeene; balekeeresa amaani ka Nasaae, haandi balekeeresa bamalaika bali neende obunyala Muukulu.

⁹ Kata Mikaeli malaika muhuluundu haba siyateemaho ohunyeka Sitaani niyehoonyera emboosi mbi. N'asoolana neende Sitaani, nibayiingana hu bidiira hu wiina mweene onaayire omubiri kwa Musa, yaboola ati, “Omwaami mweene ahwoolobye!”

¹⁰Nae bano banyeka kata neende esiindu si bataamanyire amahuluundu kasyo. Haandi ebiindu bi bamanyire mu bibaaso byaabwe, koti ebisolo bibula ebibaaso, nibyo ebiindu ebichia ohubasihirisa.

¹¹Nga kahabanyoole! Olwohuba baloonda engira yi Kaini yaloondaho hale. Hulw'obwekoombi bw'eseende, beyingisa mu njekesa ndoondobanu koti lu Bbalamu hale yahola. Bachia ohusihiriswa hulw'amayiingi koti lu Koora hale yahola.

¹²Bali koti eehwe limaliya ebidyaalo byeeng'we. Bateemaho abeene mu hulya neende mu hung'wa abula esoni. Nibo abaayi badeeba hu nda chaabwe choong'ene. Bali koti amaleesi kachia neende omuyaka mani kaahaya ohuleeta efula. Bali koti emisaala kitaamaho ebyaamo kata mu ndaalo ch'etoocho, emisaala kiiyibwa neende emisi kyaakyo mani kyaafwiira elalira.

¹³Bali koti efwiinda njalaba echohu nyaanja, mani ebiholwa byaabwe by'esoni bituumbuha aakulu koti efiro. Bali koti eng'ining'ini chikeendaana, chi Nasaae yamala ohutekehera obwiihalo bwomu siirima endaalo choosi.

¹⁴ Enoka, omwiichuhulu wa Adamu wa tiiri mu luse lwohutaanu-na-habiri, yabalomalomaho n'aboola ati, “Bone, Omwaami yeecha neende abaandu bae boolerefu elifu neende elifu,

¹⁵ohuheengera abaandu boosi omusaango, neende ohweekesa ababi boosi abatatya Nasaae ebiholwa byaabwe bibi, eby'ohuhaya ohutya Nasaae neende emboosi mbi chitatya Nasaae chi balomaloma hu Nasaae.”

¹⁶Abaandu bano buli siha bekanyiirisa haandi boolobya abasyaabwe; bahola neende obwekoombi bwaabwe bubi; abeene bewulira haandi balekeeresa abasyaabwe hu banyale ohuhola bi badaha abeene.

¹⁷Nae eng'we abasyaange baheerwa, mwiichulise bi batume b'Omwaami weefwe Yesu Kristo bababoolera endaalo chabita bati bicha ohuholehana.

¹⁸ Bababoolera bati, “Mu ndaalo chimaliirihayo, abaandu bachia ohwiichia abacheha abafukiiriri, haandi abaloondakana neende obwekoombi bwaabwe bubi nibateesa oluyaali mu Nasaae.”

¹⁹Abaandu bano nibo abaleeta engabuhanamo, ba ebibaaso byaabwe bituka, haandi abataali neende Mwooyo Mwoolerefu.

²⁰Nae eng'we, basyaange baheerwa, mwemeede ohuhula mu fukiirira yeeng'we yihiramo obwoolerefu. Haandi mulaamire mu maani ka Mwooyo Mwoolerefu,

²¹mudoong'e mu buheeri bwa Nasaae nimuliindirira esisa sy'Omwaami weefwe Yesu Kristo, ochia ohubaleetera obulamu butaakama.

²²Mukwiire esisa abo abasikanaakana.

²³Muwonie abaandi nimubahweesa ohutula mu muliro. Mukwiire abaandi boosi esisa nimweliindire neende obuti, haandi muhoyere ohuhaya kata engubo chaabwe, engubo chi bwekoombi bwaabwe bubi bwagubya.

²⁴Oluyaali lube eyiri oyo onyala ohubaliinda mwaahaya ohukwa, haandi onyala ohuboosa neende esangaalo mu moni wae ow'Oluyaali nimutaaliho esyonoono.

²⁵Oyo niye Nasaae mulala yeeng'ene, otuwonia n'abitira mu Yesu Kristo Omwaami weefwe, abe neende oluyaali, obuhuluundu, obutuki neende obunyala ohutula hale-na-haandi, bulaanu neende endaalo choosi, mu Yesu Kristo. Amiina.