Read saamia Ohubwiihulirwa 12 Bible Online

Ohubwiihulirwa 12 - saamia bible

Ohubwiihulirwa 12

¹Bulaanu, esifwaanani sihunuufu si tiisa muno syabonehana aakulu mu bbaanga. Syali esy'omuhasi wali niyefwaalire esiteeteyi syali elyuuba, haandi yali ali neende omwoosi nikumuli mu makulu, haandi niyefwaalire ekofia y'obutuki yiriho eng'ining'ini ehumi neende chibiri hu mutwe.

²Omuhasi wuno yali naali aambi ohwiibula, mani obuchuuni alala neende ohulumwa hw'ohwibula nibiicha nibikera n'alira niyoobba wuuwi.

³ Haandi esifwaanani siindi sihunuufu si tiisa muno syabonehana nisiri aakulu mu bbaanga. Sino syalimo esisyuuhira-banaabi sihoongo syeene, esifwaana ranjaayi, esiriho emitwe kitaanu-na-kibiri neende enjika ehumi, haandi neende ekofia y'obutuki niyiri hu buli mutwe kwae.

⁴ Mani niyehoonyera omuhira kwae okwo, yanyala ohweeya esituundu silala hu bituundu bidatu by'eng'ining'ini, yaasimala aakulu mu bbaanga, mani yachisukuna chaakwa aasi hu syaalo huno. Omuundu wuno, yeema mu moni w'omuhasi wula, n'aliindiriire ohulya omwaana w'omuhasi wuno naaba niyaheebulwa sa ati.

⁵ Omuhasi oyo yeebula omwaana musyaani, owali n'achia ohutuka ebyaalo byoosi neende olwaayiro lw'esichuma. Nae omwaana oyo yaasihulwa yaabukulibwa bwaangu, mani yaayirwa eyiri Nasaae alala neende esisaala syae sy'obutuki.

⁶Omuhasi oyo yeyiruhira yaacha mu esiparara, eyiri abuundu yi Nasaae mweene yamutekeherayo, yi yali n'achia ohuliindirwa bulai ohumala embaka y'endaalo elifu ndala neende emia chibiri neende amahumi kasaasaba (1,260).

⁷Mani bulaanu ebiita byeecha byakwaao Muukulu. Mikaeli alala neende bamalaika bae bali nibalwaania esisyuuhira-banaabi esyo, owali yesi n'alwaania neende bamalaika bae.

⁸Nae esisyuuhira-banaabi esyo syayiingirwa, mani omweene oyo alala bamalaika bae boosi baakairwa ohumenya haandi Muukulu.

⁹ Esisyuuhira-banaabi sihoongo muno esyo, syeecha syasukunibwa ohutula Muukulu-owali niye endemo hale yira, owali n'alaangwa mbwe Sitaani, oba Sitaani, owabachirisa esyaalo syoosi. Yeecha yaasukunwa yaakwa hu syaalo, alala neende bamalaika bae boosi.

¹⁰ Bulaanu ndeecha ndaawulira ekono hoongo Muukulu niliboola liti, “Era mbao, bulaanu obuwonia bwa Nasaae bumalire ohwiicha! Bulaanu, Nasaae amalire ohweekesa obunyala bwae koti Omutuki! Bulaanu, Kristo wae amalire ohweekesa obunyala bwae! Olwohuba oyo owali niyeemere mu moni wa Nasaae, n'atechaanga omusaango hu basyeefwe esideete neende esiro, amalire ohusukunwa ohutula Muukulu.

¹¹Abasyeefwe abo mbao bamala ohumuyiingira mu biita nibehoonyera amabaanga k'Ekoondi doto, haandi neende obwadyeeri bu bayalaanga. Haandi bali nibafukiirira ohuwaayo obulamu bwaabwe mani baafwa.

¹²Mani sakira eng'we mwehoye, ewe Ekulu, alala neende eng'we mweesi abamenyamo! Nae chaakaanire esyaalo alala neende enyaanja! Olwohuba Sitaani amalire ohwiiha eyo yi muli, mani kwiichuule etima, olwohuba kumanyire bulai bweene kuti, kudoong'iise sa esiha sidiidi muno.”

¹³Syuuhira-banaabi niyeecha yaamanya ati hane amalire ohusukunibwa aasi hu syaalo, yemao yachaaka ohukiiya omuhasi wula owebula omwaana musyaani.

¹⁴ Nae omuhasi oyo yabereswa embaya chibiri ech'eeswi hoongo muno, hwaanyale ohubburuha achie ewae mu siparara, yi yali naachia ohuliindirwa bulai, hulw'embaka y'emyaaka kidatu neende esituundu, yi Syuuhira-banaabi atanyala ohumuseeta yamwoolaho.

¹⁵Mani, Syuuhira-banaabi oyo yaasala amaachi k'ofwomboole nikatulira mu munwa kwae, nikaloonda omuhasi oyo, mbwe kanyale ohuchia ohumukiinga kamuyire.

¹⁶Nae esyaalo syeecha syahoonya omuhasi oyo. Syaasama omunwa kwaasyo, mani syaamira amaachi ako koosi akali nikatulire mu munwa kwa Syuuhira-banaabi oyo.

¹⁷Syuuhira-banaabi oyo yanyoleerera muno omuhasi oyo, mani yaatula ao yaacha yachaaka ohulwaaniaanga abeechuhulu bae boosi, abo boosi abafunihira amalako ka Nasaae, haandi abeesikwa b'obwadyeeri bwaleetwa neende Yesu.

¹⁸Mani syuuhira-banaabi oyo bulaanu yeema hu lwaasi lw'enyaanja mani yaateng'eng'ala.