Read saamia Ohubwiihulirwa 14 Bible Online

Ohubwiihulirwa 14 - saamia bible

Ohubwiihulirwa 14

¹ Haandi ndalingaala, mani ndaabona endi eee, hu Lugulu Siyooni hwali hweemereho Ekoondi doto, haandi abaandu elifu emia ndala neende amahumi kane neende chine (144,000) bali nae, abo abali neende eliita lyae, neende eliita lya Simwaana nibyaandiikwa hu bweeni bwaabwe.

²Mani ndawulira ekono litula Muukulu niliwoola koti amaachi maangi, haandi koti ohwaduluhana hw'ehubba huhoongo muno. Ekono lindawulira elyo, lyali nilifwaanana koti ohuubba hw'aboobbi b'obuhana baandi nibali ohuubba obuhana bwaabwe.

³Mani bali nibali ohwembaanga olweembo luyaaha mu moni w'esisaala sy'obutuki, haandi neende mu moni w'ebiloonge bilamu bine bira, haandi neende mu moni w'abahuluundu bala. Abulao omuundu yeesi owali n'anyala ohweeka olweembo olwo, ohutusaho abaandu elifu emia ndala neende amahumi kane-na-chine (144,000) bala boong'ene abali nibanunulwa ohutula mu syaalo.

⁴Bano nibo abaandu bali nibatanyala ohwenyaasaho neende abahasi oba abasaacha kata budiidi, olwohuba bali nibali abatayiranaanga. Bano nibo abo abali nibaloondaanga Ekoondi doto elyo buli yirichiira. Bano nibo abo abali nibamala ohununulwa ohutula mu baandu koti ebyaamo bitaangira bya Nasaae neende Ekoondi doto.

⁵ Haandi mu minwa chaabwe, haba simwalimo obubacha bwoosi, olwohuba bali nibataaliho esyonoono syoosi daawe.

⁶Haandi ndabona malaika wuundi naali ohubburuhira aakulu muno mu bbaanga, naali neende emboosi chitaakama ch'Emboosi Ndai n'achia ohulaangirira eyiri abaandu bohu syaalo huno, eyiri buli bwiibulaane, oluyia, olulimi, neende esyaalo.

⁷Malaika oyo yalomaloma neende ekono hoongo n'aboola ati, “Beerese Nasaae oluyaali, mani mufumie obuhunuufu bwae! Olwohuba ebiha byae by'ohuheengeramo emisaango bimalire ohwoola. Yinamire oyo owahola Ekulu, esyaalo, enyaanja, alala neende emyaalo kirimo amaachi kyoosi!”

⁸ Malaika wa habiri yesi yaloonda hw'otangiire wula, n'aboola ati, “Simalire ohukwa! Bbabbilooni Sihunuufu simalire ohukwa! Syakera abaandu boosi baang'wa amalwa kasyo, amalwa malulu keene ak'obucheke bwasyo!”

⁹Malaika wa hadatu yesi yaloonda hu wa habiri wula, n'aboola mu kono ly'aakulu ati, “Oyo yeesi owiinamira esisolo esyo, haandi neende esifwaanani syasyo esyo, haandi okanya ohuteebwa esilolero hu bweeni bwae, oba hu muhono kwae

¹⁰ baba abeene abo abachia ohung'wa haandi hu malwa ka Nasaae mweene, amalwa k'etima lyae, kayamala ohuchuha neende amaani kae koosi, mu sikoombe sy'obunyoolefu bwae! Abo boosi abahola sino batyo, bachia ohusaandisirwa mu muliro haandi neende mu maratutu, mu moni wa bamalaika boolerefu neende Ekoondi doto.

¹¹ Omwoosi kw'omuliro kubasaandya kuniooha endaalo choosi pe. Yibulayo obuwuluuhiro bwoosi, esiro neende esideete eyiri abo abeenamira esolo neende esifwaanani syaayo, eyiri oyo yeesi oli neende esilolero sy'eliita lyaasyo.”

¹²Sino situbaanja abaandu ba Nasaae ohuba neende ohuguma, abo abafunihira amalako ka Nasaae, haandi abali abeesikwa eyiri Yesu.

¹³Haandi ndeecha ndawulira ekono liindi litula Muukulu niliboola liti, “Yandiika sino oti, beehoye abo ohutula enyaanga yino, ohwemeeda mu moni, abafwiira mu buhalaabani bw'Omwaami!” Mwooyo nae yaakobolamo ati, “Eee, mubwadyeeri bweene!” “Baba bachia ohunyoola obuwuluuhiro ohutula hu mirimo chaabwe midinyu, olwohuba ebitula mu buhalaabani bwaabwe, bucha nabo.”

¹⁴ Haandi ndeemao ndalingaala, mani ao ndaabona esireesi sya rachaari, nihaandi esiindu syali nisihaale hu sireesi ohwo, syali nisifwaana koti omuundu, naali neende ekofia y'obutuki ey'esaabbu hu mutwe kwae, neende oluhaayiro lwooki muno mu muhono kwae.

¹⁵ Bulaanu, malaika wuundi yeecha yaatulira mu Nyuumba ya Nasaae, mani yaamala yoobba wuuwi naalirira mu kono hoongo eyiri oyo owali niyehaale hu sireesi ati, “Wehoonyere oluhaayiro lwao olwo, mani omale okese ekesa, olwohuba esiha simalire ohwoola. Esyaalo syoosi syeengere sihoyera ekesa!”

¹⁶Mani omuundu wali niyehaale hu sireesi, yeecha yaahuyuunga oluhaayiro lwae naalubisa hu syaalo, mani ekesa ly'esyaalo syoosi lyamala ohukeswa.

¹⁷Haandi ndabona malaika wuundi n'atulira mu Nyuumba ya Nasaae eyo Muukulu, haandi yesi yali ali neende oluhaayiro lwooki muno.

¹⁸Mani malaika wuundi oli neende obunyala eyiri omuliro, yaatula eyiri alutaari. Yahuumula neende ekono hoongo n'aboolera malaika wali naali neende oluhaayiro lwooki ati, “Wehoonyere oluhaayiro lwao olwo, mani oheenge emisabbiibbu nookitusa hu misaala kyakyo ky'esyaalo, olwohuba emisabbiibbu kiengere!”

¹⁹Malaika oyo yaahuyuunga oluhaayiro lwae olwo hu syaalo, yaheenga emisabbiibbu ohutula hu misaala kyakyo, mani n'achisukuna mu sihunyiro sy'etima lya Nasaae.

²⁰ Emisabbiibbu kyahunyirwa mu sihunyiro syali erwaanyi w'esiko, mani amabaanga kaatula mu sihunyiro esyo akali koti amaachi k'ofwomboole mani kaahulukusa ekilomiita emia chidatu (300) obuleeyi, nae emiita chibiri ohuchia aasi.