Read saamia Ohubwiihulirwa 15 Bible Online

Ohubwiihulirwa 15 - saamia bible

Ohubwiihulirwa 15

¹Haandi ndalingaala mani ndaabona muukulu mu bbaanga esifwaanani siindi sisiindusa, esihunuufu haandi esiwukisa. Ndabona bamalaika bataanu-na-babiri, nibali neende embya cha a'malwaye chitaanu-na-chibiri, echali nicho echimaliirihayo, olwohuba nicho echali echimaliirisa ohweekesa etima lya Nasaae.

²Ndabona esiindu syali nisifwaanana neende enyaanja y'egilaasi chisasaanire neende omuliro. Haandi ndaabona abo boosi abali nibanyala ohuyiingira esolo yira alala neende esifwaanani syaayo sira, haandi abayiingira oyo yi liita lyae nilihiihirwa neende enaamba yira. Abaandu bano bali nibeemere aambi neende enyaanja y'egilaasi, nibadiirire obuhana bu Nasaae mweene yali n'ababereese

³ mani nibali ohwembaanga olweembo lwa Musa, omuhalaabani wa Nasaae, haandi neende olweembo lw'Ekoondi doto bati: “Omwaami Nasaae w'Obunyala bwoosi, ebiholwa byao nga bihunuufu haandi nga biwukisa! Omutuki w'ebyaalo byoosi, engira chao nga njoolerefu haandi nuungifu niyo!

⁴ Wiina mweene otanyala ohuhukwiiraho eng'aang'a, ewe Omwaami? Wiina mweene ochia ohuhaya ohulaangirira obuhunuufu bwao? Ewe weeng'ene niiwe omwoolerefu. Ebyaalo byoosi bichia ohwiichaanga mani nibihwiinamira, olwohuba abo boosi babonaanga ebiholwa byao bihoyera.”

⁵ Luunyuma lwa bino, ndabona Enyuumba ya Nasaae yiri Muukulu niyikuuhe, nimulimo Eyeema Lyoolerefu niliri mukati.

⁶Malaika bataanu-na-babiri bala abali neende enyiimbe chitaanu-na-chibiri chira, batula mu Nyuumba ya Nasaae eyo, nibefwaalire engubo ch'elaasi endafu chimilamilana, haandi nibeboyere esibiro ch'esaabbu nichebodoohaanie ebirifu byaabwe.

⁷Mani mulala hu biloonge bilamu bine bira, n'aberesa malaika bataanu-na-babiri bala ebbakuli ch'esaabbu echiichuule etima lya Nasaae, oliwo omulamu endaalo choosi.

⁸ Ao, Enyuumba ya Nasaae yira yeechula omwoosi kutula hu luyaali lwa Nasaae alala neende amaani kae, mani yaabulawo omuundu yeesi owali n'anyala ohuchia yeengira mu Nyuumba ya Nasaae eyo, ohwoola lu nyiimbe chitaanu-na-chibiri chira, echaleetwa neende malaika bataanu-na-babiri bala cheecha chaawa.