Read saamia Ohubwiihulirwa 16 Bible Online

Ohubwiihulirwa 16 - saamia bible

Ohubwiihulirwa 16

¹Haandi ndawulira ekono hoongo nililomalomera mu Nyuumba ya Nasaae eyiri malaika bataanu-na-babiri bala ati, “Muchie mubbwomoole ebbakuli chitaanu-na-chibiri ch'etima lya Nasaae choosi hu syaalo!”

² Malaika otaangira naachia n'abbwomoola n'amalira ebbakuli yae hu syaalo. Mani amabubuuto mabi keene, haandi akachuuna muno nikeecha nikakwa hu baandu boosi bali nibali neende esilolero sy'esolo, haandi abo boosi abali nibeenamiraanga esifwaanani syasyo.

³Mani malaika wa habiri n'abbwomoola ebbakuli yae n'ayimalira hu nyaanja. Amaachi koosi nikakaluuhana nikaba koti amabaanga k'omuundu ofwiire, mani buli siloonge silamu esyali mu nyaanja syaafwa.

⁴ Mani malaika wa hadatu yesi n'abbwomoola n'amalira ebbakuli yae hu myaalo kyoosi neende esulo ch'amaachi choosi, mani nikikaluuhana nikiba amabaanga.

⁵Ao ndeecha ndawulira malaika wali naali neende obunyala hu maachi koosi n'aboola ati, “Hane eheenga yao yoosi y'oholere yiri sa abweene, ewe Omwoolerefu, ewe oliwo haandi owabaao!

⁶Abaandu abo beedisaanga amabaanga k'abaandu ba Nasaae, haandi neende ak'abanabbi, mani sakira obaberese amabaanga ohung'wa. Bali sa ohunyoola esibahoyera syeene!”

⁷Haandi ndeemao ndaawulira ekono liindi nilitulira ena alutaari niliboola liti, “Omwaami Nasaae ow'Obunyala bwoosi! Eheengao yao yoosi yadyeeri niyo, haandi niyo eyihoyera yeene!”

⁸Bulaanu, malaika wa hane yesi yabbwomoola yaamalira ebbakuli yae hu lyuuba, mani lyafukiirirwa ohusaamba abaandu boosi neende obumemu bwaalaba bwaalyo.

⁹Abaandu boosi basaambwa neende obumemu bwaalaba obwo, mani bachaaka ohubwaaba eliita lya Nasaae, oli neende obunyala hu nyiimbe chino choosi. Nae haba sibanyala ohukaluuhana ohutula hu bibi byaabwe baanyala ohufumia obuhunuufu bwa Nasaae daawe.

¹⁰ Mani haandi malaika wa hataanu n'abbwomoola n'amalira ebbakuli yae hu sisaala sy'obutuki sy'esisolo sira. Mani esiirima nisiicha nisikwa hu bwaami bw'esisolo bwoosi, mani abaandu nibachaaka ohweluma enimi ohweema hu buchuuni bu bali nabwo,

¹¹mani nibachaaka ohubwaaba Nasaae wo Muukulu, ohweema hu buchuuni bwali nibubachuuna, alala neende amabubuuto keene. Nae haba sibakaluuhana baatula hu ngira chaabwe mbi.

¹² Mani haandi malaika wa hasaasaba n'abbwomoola n'amalira ebbakuli yae hu Ewufuraate omwaalo muhuluundu. Omwaalo kuno nikwoomerera, ohutaao engira yi batuki bachia ohutuyiraanga ebukwe.

¹³Mani haandi ndabona emisaambwa mibi kidatu ekiali nikifwaanana neende amahere. Emisaambwa kino kyali nichitula mu munwa kw'esisyuuhira-banaabi sira, omunwa kw'esisolo, haandi neende omunwa kw'omunabbi mubacha.

¹⁴Ebihyeeno bino, nibyo ebyali emyooyo kya emisaambwa kyaholaanga eby'amayia. Emisaambwa kino kyoosi, kyali nikitula nikichia mu batuki boosi abohu syaalo huno, ohubabuusa alala beetekehere ebiita hu Ludaalo luhunuufu lwa Nasaae w'Obunyala bwoosi.

¹⁵“Tekeerese! Mbao njicha koti omwiibi! Yeehoye oyo omenya meeso, haandi oliinda engubo chae, hwaahae ohukeendaanga syeekenye, atadiirwa esoni mu lwichuule lw'abaandu!”

¹⁶ Mani emyooyo ekyo kyeemao kyaanyala ohubuusa alala abatuki b'abuundu alala, mu Luibburania alaangwa Amagedoni.

¹⁷Mani malaika wa hataanu-na-habiri yesi yabbwomoola yaamalira ebbakuli yae mu bbanga sa. Mani ekono hoongo muno niliicha nilitula hu sisaala sy'obutuki syali mu Nyuumba ya Nasaae, niliboola liti, “Simalire ohuholehana!”

¹⁸ Mani yabaawo enjeserye ch'ohumyeesuha, ohududuma, alala neende ohwaduluhana hw'ehubba huloondehana, mani haandi neende musisi mbi muno. Haba siyibechaangao musisi kwaaka kutyo ohutula hu huloongwa hw'abaandu. Musisi kuno nikwo okwali nikuhira obubi mu kyoosi!

¹⁹ Esiko sihunuufu esyo syeecha syaakabuhanamo ebituundu bidatu, nae ebiko by'ebyaalo byoosi byasihiriswa. Nae Nasaae yeecha yechulisa Bbabbilooni sihunuufu mani yaasihola syaang'wa amalwa kali mu sikoombe syae amalwa k'etima lyae lulu muno.

²⁰ Ebisiinga byomu nyaanja byoosi byahamyuuhao, haandi engulu chosi chaakotao.

²¹ Mani emikina ky'efula kitabaafu muno, buli kutula nikuli neende obusito bwa kiloguraamu amahumi kataanu, kyakwichaanga nikitula mu ekulu, nikikwa hu baandu, bali nibabwaabireenge Nasaae ohweema hu nyiimbe chitulana hu makina k'efula, mbwe olwohuba yali oluumbe luteengya muno.