Read saamia Ohubwiihulirwa 17 Bible Online

Ohubwiihulirwa 17 - saamia bible

Ohubwiihulirwa 17

¹ Bulaanu, mulala hu malaika bataanu-na-babiri bali neende ebbakuli chitaanu-na-chibiri chira, yeecha yi ndi mani yaboola ati, “Ewe yicha, mani hweekeseho koti lu muhasi muyirani wamanyihana achia ohubonereswa, esiko sihunuufu esyo, esyoombahwa aambi neende emyaalo miingi.

² Abatuki b'esyaalo sino boosi bairanaanga nae, nae abaandu bohu syaalo huno boosi, beecha bameera ohweema hu hung'wechaanga amalwa k'obuyirani bwae.”

³ Bulaanu, Mwooyo yambukulira elalira, mani malaika yangiinga yanjira mu siparara. Nindali ebweene eyo, ndaabona omuhasi wuundi niyehaale hu sisolo sya ranjaayi syaliho ameeta kanyeka Nasaae nikaandiikwa hu mubiri kwasyo kwoosi. Esisolo esyo syali neende emitwe kitaanu-na-kibiri, neende enjika ehumi.

⁴ Omuhasi oyo yali niyefwaalire ebyefwaalo bifwaana koti papo kwa bbulu neende ranjaayi, haandi niyesyaaya omubiri kwoosi neende amabbaangili k'esaabbu, amakina k'ebbeyi kakabuhaane. Nae yali n'adiirire mu muhono kwae, esikoombe sy'esaabbu ni sichuulemo ebiindu by'obuyemu neende eby'obuhwe, bitula mubucheke bwae.

⁵Nae hu bweeni bwae, hwali nihwandiikwaho eliita liri neende amahuluundu kali mu syaama mbwe: “Bbabbilooni Sihunuufu, ng'ina bairani boosi, neende abakosoobania enjirana boosi mu syaalo muno.”

⁶Haandi ndeecha ndaabona endi hane, omuhasi oyo yali n'ameerere amabaanga k'abaandu ba Nasaae, neende amabaanga k'abo abali nibeetwa ohweema hu huba abawulisi ba Yesu. Mani nindamubona, ndesiinduhira elalira.

⁷Nae malaika yandeeba ati, “Lwasiina ewe wesinduha otyo? Njia ohuhutuumbulira amahuluundu keekisa ak'omuhasi wuno, neende ak'esisolo simukiingire sino, esisolo siri neende emitwe kitaanu-na-kibiri, neende enjika ehumi.

⁸ Esisolo esyo, syaliho esilamu hale, nae haba sisisisiiri esilamu daawe. Siri aambi ohutula mu kotero, mani simale sichiire elalira mu husihiriswa. Mani abaandu bamenya hu syaalo huno, ba meeta kaabwe katandiikwa ohuloongwa hw'esyaalo nihutabaao, mu sitabo sy'abalamu, boosi bachia ohwesiinduha muno nibalingaala hu sisolo esyo. Esisolo esyo syaliho esilamu hale. Nae bulaanu haba sisisisiiri esilamu daawe, nae sichia ohubonehana haandi.

⁹Bulaanu, esiindu sino sibaanja abaandu ohuba neende amakesi alala neende ohumanya. Emitwe chitaanu-na-chibiri chino, nicho ebigulu bitaanu-na-bibiri, hu muhasi wuno yeehala. Emitwe chino haandi nicho abatuki bataanu-na-babiri.

¹⁰Nae bataanu hu beene bano, bamala ohukwa, nae mulala asituka, nae owuundi oyo asisiiri ohubaao, nae niyaheeche, achia ohutukaho sa hu siha sidiidi.

¹¹Nae haandi esisolo esyo esyaliho esilamu hale, nae haba sisisisiiri esilamu, esyeene nisyo omutuki wa hataanu-na-hadatu, oli mulala hu bataanu-na-babiri bala, nae ochia ohubakabuhaho achie asihirisibwe.

¹² Enjika ehumi chi obweene echo, nicho abatuki ehumi abatachaaka ohutuka, nae abachia ohubeeresebwa obunyala bw'ohutukaho koti abatuki hulw'embaka y'esaa ndala yoong'ene alala neende esolo eyo.

¹³Nae abatuki ehumi bano boosi, bali neende esichiiririrwa nasilala, haandi baberesa esisolo esyo, amaani kaabwe, alala neende obunyala bwaabwe.

¹⁴Abeene bano bachia ohulwaanakania Ekoondi doto, nae Ekoondi doto elyo, alala neende abalaange bae, abadoole bae, haandi neende abaloondi beesikwa bae, bachia ohubayiingira, olwohuba oyo niye Omwaami w'abaami, haandi Omutuki w'abatuki.”

¹⁵Malaika oyo yesi yeecha yamboolera ati, “Amaachi ako ka obweene, k'omuhasi muyirani oyo kabeere niyehaaleho, niko ebyaalo, abaandu, embya, haandi neende enimi.

¹⁶Enjika ehumi chl obweene echo, haandi neende esisolo esyo, boosi bachia ohusyuula omuhasi muyirani oyo. Bachia ohumung'uula buli siindu syali nasyo syoosi, mani bamale bamulehe naali syeekenye syeene. Bachia ohulya omubiri kwae, mani bamale bamusihirise neende omuliro.

¹⁷Olwohuba Nasaae yamala ohuta mu myooyo kyaabwe ohudaha hw'ohuhola by'adaha, mu huholera alala, haandi neende mu huberesa esisolo esyo amaani kaabwe, atuke ohwoolera elalira lu mboosi cha Nasaae chiribonehera ohuba echadyeeri.

¹⁸Nae omuhasi oyo yobweene, niye esiko sihunuufu situka abatuki boosi abohu syaalo huno.”