Read saamia Ohubwiihulirwa 18 Bible Online

Ohubwiihulirwa 18 - saamia bible

Ohubwiihulirwa 18

¹Luunyuma lwa bino byoosi ohubaao, ndabona malaika wuundi niyeeha aasi n'atula Muukulu. Yali ali neende obunyala bubitiirifu, haandi neende obulai bwae bwalabya esyaalo syoosi.

² Malaika oyo yaalirira mu kono hoongo n'aboola ati, “Omuhasi akwiire! Bbabbilooni Sihunuufu sikwiire! Omuhasi wuno bulaanu aniinirwe neende emisaambwa, alala neende esihyeeno. Emera ch'ebiindu by'omufuto byoosi, mani amayoni katadahibwa koosi kamumenyeremo.

³ Olwohuba ebyaalo byoosi byamala ohung'waaho hu malwa kae, amalwa malulu k'obwekoombi bw'obucheke. Abatuki bohu syaalo huno boosi bamala ohuyirana nae, haandi abachurusi banyali bohu syaalo huno, bamala ohuyiindiyalira mubucheke bwae butaaliho ebbureeki.”

⁴ Haandi ndawulira ekono liindi litula Muukulu niliboola liti: “Eng'we baandu baange, mutule erwaanyi! Mumutulemo! Haba simuhoyere ohweduba mu bibi byae daawe; Haba simuhoyere ohukabanaho hu huboneresebwa hwae!

⁵ Olwohuba ebyonoono byae byayiriha byaniina byoola Muukulu, mani Nasaae yechulisaanga engira chae embi.

⁶ Mu muhole sa koti yesi lu yabahola; mu mutuunge amahabi kabiri hulw'ebiholwa byoosi bi yahola. Yichuse esikoombe syae neende esyohung'wa syaalaba amahabi kabiri ohuhira esyo siyabatekeheraanga.

⁷ Mumuteeho ohusaanda huungi neende esibeera siingi koti oluyaali neende ohwesangaasa hu yeberesaanga omweene. Olwohuba yamenya niyebooleraanga omweene ati: ‘Mbano njihaale, omutuki muhasi hala! Haba siindi mufwiirwe daawe, Haba siinjia ohunyoolaho esibeera daawe!’

⁸Mani ohweema hu sino, mu ludaalo lulala lwoong'ene achia ohuba n'amalire ohuwambisibwa endwaae embi koti ohulwaala, esibeera, neende enjala. Haandi achia ohusaambibwa neende omuliro, olwohuba Omwaami Nasaae, omukayi wae w'obunyala bwoosi.”

⁹ Mani abatuki bohu syaalo huno abedubaania nae mubucheke buno, alala neende obwekoombi bubi buno, bachia ohulirira haandi nibachereenjesera esiko sino, nibachia ohubonaho omwoosi kuniooha nikutula hu hwereba hw'omuliro kuchia ohuba nikumumuheenya.

¹⁰Mbao beemere eyale muno nae, olwohuba batiire ohukabanira alala nae mu husaandisibwa hwae. Baboola bati, “Nga sy'amatichasi! Nga siwukisa! Bbabbilooni, esiko sihunuufu haandi esy'amaani sino! Osaandisibwe mu saa ndala yoong'ene!”

¹¹ Abachurusi bahoongo bohu syaalo huno boosi, bosi bali ohumuliraanga, olwohuba bulaanu abulao omuundu yeesi ochia naakula ebiindu byaabwe.

¹²Abulao omuundu yeesi ochia naakula esaabbu, efeesa, amakina k'ebbeyi kakabuhaane. Ebiindu byaabwe bibakusa koti engubo ch'elaasi, engubo cha papo, engubo chimilamilana, haandi neende engubo njahanyu. Embya choosi ech'emisaala midinyu ohubonehana, haandi neende embya choosi ech'ebiindu biholwa ohutula mu meeno k'enjofu, ohutula mu mbaao ch'ebbei, eby'emigasa, eby'ebichuma, neende eby'amakina ka rachaari.

¹³Haandi neende bi sinamooni, ebiluunga elyaani, obubbaani, miira, neende, ebiwunya esing'aari. Amalwa neende amafuta, obusye neende engaano, eng'oombe neende amakoondi, efaraasi neende ebigaari bihweeswa, abawaambe, kata neende obulamu bw'abaandu.

¹⁴Abachurusi boosi bali ohumubooleraanga bati, “Ebiindu byoosi bi wali niwekoombaanga ohuba ebyao bimalire ohuhamyuuhao, neende obunyali alala neende enyaaji byoosi bimalire ohuwaao, nihaandi haba soochia hubibonaho ehabi liindi daawe!”

¹⁵ Abachurusi boosi abayiindiyalira mu huchurusiraanga mu siko esyo, bachia ohweema eyale, olwohuba bachia ohutya ohukabaniraho hu husaandisibwa hwae. Bachia ohulira haandi bachereenjese,

¹⁶mani bamale baboole bati, “Nga sy'amatichasi! Nga si tiisa hulw'esiko sihunuufu! Yali yanaliirisa ohwefwalaanga engubo ch'elaasi, ech'obutuki, neende echamyuuha, haandi neende ohwebwihaangaho emigasa ch'esaabbu, amakina k'ebbeyi kakabuhaane!

¹⁷ Nae haandi mu saa ndala yoong'ene amalire ohumalibwaho obunyali buno bwoosi!” Abeerusi b'emeeri alala neende abakiingirwe boosi, abahosi bomu meeri, alala neende abaandu baandi boosi, abanyolaanga esyohulya syoosi ohweema hu nyaanja, beecha beema eyale muno,

¹⁸ mani baamala baalira lukali koti lu babona omwoosi kutula hu muliro kweereba nikweemuhuunya bati: “Haba siyibechaangahoo esiko sihunuufu siti!”

¹⁹ Beeyaanyaho olufu hu mitwe chaabwe, baalira nibacheerenjesa nibaboola bati, “Syamatiichasi maangi! Si tiisa muno hulw'esiko sihunuufu sino! Niye esiko yi baandu boosi abali neende emeeri chisyaabala hu nyaanja chikabuhaane, bayiindiyalira mu bunyali bwae! Mani nae mu saa ndala yoong'ene, yaaba nga amalire ohutusibwaho buli siindu!”

²⁰ Wehoye, ewe Ekulu, hulw'ohusihiriswa hw'omuhasi oyo! Mwehoye, eng'we abaandu ba Nasaae, alala neende abatume neende abanabbi! Olwohuba Nasaae amalire ohumuheengera omusaango hulw'ebiindu biyabaholaanga!

²¹ Mani ao niwo yi malaika muhunuufu muno, yadoolera ekina lyaaka obuhoongo neende olukina lubaambali muno, mani n'alisukuna mu nyaanja, n'aboola ati, “Yino niyo engeri yi Bbabbilooni, esiko sihunuufu muno, sichia ohusukunibwamo aasi neende amawuruta, mani sihaye ohubonehanaho haandi.

²² Mani ohweemba hw'amaduungu alala neende amakono k'abaandu, neende ohw'aboobbi b'amalere alala neende eturumbete, haba sihuchia ohuhuwuliirihanamo haandi! Abulao omuhalaabani yeesi mu buchurusi bwoosi ochia ohuhunyoolehanamo haandi. Haandi ekono ly'olukina lusya haba silichia huwuliirihana haandi!

²³Obulafu bw'etaara haba sibuchia huhubonehahoomo haandi. Amakono k'abeeya bahasi neende abasaacha haba sikachia huhuwuliirihanamo haandi. Abachurusi bao balichiingi nibo abahiramo obunyala mu syaalo syoosi, haandi ohubitira mu malesi k'obubacha kao, walehuulaanga abaandu boosi abohu syaalo huno!”

²⁴ Bbabbilooni syasaandiswa olwohuba amabaanga k'abanabbi, alala neende ak'abaandu ba Nasaae, kanyoolehana mu siko esyo. Eee, amabaanga k'abo boosi abeetwa hu syaalo huno hwoosi.