Read saamia Ohubwiihulirwa 19 Bible Online

Ohubwiihulirwa 19 - saamia bible

Ohubwiihulirwa 19

¹Luunyuma lwa bino byoosi, ndawulira ekono liri koti ohuwoola hw'esidiiyiha sihoongo sy'abaandu bali Muukulu, niliboola liti, “Nasaae afumisibwe! Obuwonia, oluyaali, neende obunyala, byoosi ni ebya Nasaae!

² Eheenga yae y'emisaango yihoyera haandi y'obwadyeeri! Yamala ohuheengera omusaango omucheke muhuluundu owali n'anyaasa esyaalo syoosi neende obudamba bwae. Nasaae yamuboneresa olw'ohwiita abahalaabani bae.”

³ Haandi bahuumula nibaboola bati, “Nasaae afumisibwe! Omwoosi kutula hu bumemu bw'omuliro kumuheenya esiko sihunuufu esyo kuchia ohudumuuha endaalo choosi pe!”

⁴Mani abahuluundu amahumi kabiri neende bane bala baakwa aasi, mani bachaaka ohwiinamira Nasaae alala neende ebiloonge bilamu bira bine, owali niyehaale hu sisaala sy'obutuki. Bosi beecha baboolaanga bati, “Amiina! Nasaae afumisibwe!”

⁵ Mani ao, esiyoka siri koti ekono ly'omuundu lyeecha lyaatulira mu sisaala sy'obutuki niliboola liti, “Nasaae weefwe afumisibwe, eng'we abahalaabani bae boosi alala neende abaandu boosi abahoongo alala neende abadiidi, boosi abamutya!”

⁶ Haandi ndawulira esiindu syawuliirihana koti esidiiyiha sihoongo muno, haandi koti ohuwoola hw'amaachi kabbwomooha nikaakuha ohutula aakulu muno, haandi koti ohwaduluhana hw'efula huloondehana. Ndawulira nibaboola bati, “Nasaae afumisibwe! Olwohuba Omwaami, Nasaae weefwe w'obunyala bwoosi, niye Omutuki!

⁷Mulehe hweehoye husangaale. Mulehe hufumie obuhunuufu bwae! Olwohuba esiha syoolere esy'obweeya bw'Ekoondi doto, mani omweeya muhasi amalire ohusyetekehera.

⁸Amalire ohubeeresebwa engubo ch'elaasi ndafu chimilamilana ohwefwaala.” (Engubo ch'elaasi nicho ebiholwa bilai by'abaandu ba Nasaae.)

⁹ Mani malaika yamboolera ati, “Yandiika sino: Beehoye abo abalaangwa ohwiicha hu sidyaalo sy'obweeya sy'Ekoondi doto.” Haandi malaika yeecha yaameedaho ati, “Chino nicho emboosi cha Nasaae chadyeeri.”

¹⁰Ndaakwa aasi mu makulu kae ohumwiinamira, nae yamboolera ati, “Otasihola daawe! Syesi ndi sa omuhalaabani wasyo, haandi syesi ndi omufukiiriri koti abafukiiriri basyaange, abo boosi abahayira hu bwadyeeri bu Yesu yeekesa. Yinamirenge Nasaae!” Olwohuba obwadyeeri bu Yesu yeekesa nibwo ohugumya abanabbi.

¹¹ Bulaanu ndaabona Ekulu niliikuuheo, mani ao ndaabona efaraasi ndafu. Omwiirusi wayo alaangwa Omweesikwa haandi Owadyeeri. Yehoonyera obwadyeeri mu hukaya emisaango, haandi neende mu hulwaana amaye kae.

¹² Emoni chae chali nichifwaana neende omuliro, haandi yali niyefwaalire ekofia ch'obutuki nyiingi hu mutwe kwae. Yali neende eliita limwandiikirweho, nae abulao omuundu yeesi ohutusaho omweene owali n'alimanyire.

¹³Eganjuula li yali nafwaalire lyali niliswaanire amabaanga. Eliita lyae nilyo “Emboosi ya Nasaae”.

¹⁴Amaye koosi akali Muukulu kali nikamuloondaho, nikeruhira hu faraasi charachaari haandi nibefwaalire engubo ch'elaasi ndafu muno.

¹⁵ Mu munwa kwae, mwatulamo olugaanga lwooki muno lu yali naachia ohuyiingirira ebyaalo biingi. Achia ohubitukira endabuhi y'esichuma, haandi achia ohuhunyira efiini mu sihunyiro sy'etima ly'eetima lya Nasaae w'Obunyala bwoosi.

¹⁶Hu ganjuula lyae hwali hwandiikwaho eliita mbwe: “Omutuki w'abatuki, haandi Omwaami w'abaami”, neende hu tango lyae.

¹⁷ Bulaanu ndaabona malaika niyeemere hu lyuuba. Yehuumira mu kono hoongo amayoni koosi akali nikabburuha mu mboo ati, “Mweesi mwiicha mwebuuse alala hu sidyaalo sihunuufu sya Nasaae!

¹⁸Mwiiche mulye emibiri ky'abatuki bohu syaalo, abahuluundu baako, neende abalwaani, emibiri ky'efaraasi alala neende abeerusi baachio, emibiri ky'abaandu boosi, abawaambe neende abalehuule, abahoongo neende abadiidi!”

¹⁹Bulaanu ndabona esisolo sira, alala neende abatuki bohu syaalo huno, alala neende amaye kaabwe akahabe nikebuusire alala ohulwaania oyo owahabe naali ohwiiruhira hu faraasi, neende eye lyae.

²⁰ Esisolo esyo syayaambwa syayiriwa nisiri esiboye, alala neende abanabbi babacha abali nibaholaanga eby'amayia mu moni wae. (Olwohuba yehoonyeraanga ebiholwa by'amaya ebyo ohubachirisa abo abali nibaliho esilolero sy'esisolo esyo, neende abo abali nibeenamiraanga esifwaanani sy'esisolo syeene esyo.) Esisolo esyo syeecha syasukunibwa nisiri esilamu, alala neende omunabbi mubacha wula yesi naali omulamu mu nyaanja y'omuliro, eyaadusirwa maratutu.

²¹Amaye k'abwe, keetwa neende olugaanga olwali nilutulire mu munwa kw'oyo owali niyeeruhira hu faraasi. Haandi amayoni koosi, keecha kaalya enyama ch'abwe chikaera.