Read saamia Ohubwiihulirwa 20 Bible Online

Ohubwiihulirwa 20 - saamia bible

Ohubwiihulirwa 20

¹Haandi ndabona malaika wuundi niyeeha aasi n'atula Muukulu, n'akiingire olufunguo lw'ekotero alala neende omunyororo musito muno mu muhono kwae.

² Malaika oyo mani n'akwa hu sisyuhira-banaabi sira, endemo hale yira-ohuboola huti, Sitaani oba Sitaani wula-mani yaamala yamuboya neende omunyororo okwo hulw'emyaaka elifu ndala.

³Malaika wuno haandi yaamusukuna mu kotero eyo, mani n'aliikalao, haandi n'aliwomera, esisyuuhira-banaabi esyo hu sihaye ohunyala ohubachirisaanga ebyaalo haandi daawe, ohwoola lu myaaka elifu ndala kirimala ohuwa. Luunyuma lw'esyo, esisyuuhira-banaabi esyo sichia ohulehuulwaho hulw'esiha sidiidi.

⁴ Haandi ndabona ebisaala by'obutuki, mani abaandu bali nibabiihaaleho nibeecha nibabeereswa obunyala bw'ohuheenga emisaango. Haandi ndabona obulamu bw'abaandu bali nibeetwaanga hulw'ohuyalaanga obwadyeeri bu Yesu yaleeta haandi neende emboosi ya Nasaae. Abaandu abo haba sibali nibanyala ohwiinamiraho esisolo sira, kata neende esifwaanani syasyo, kata sa ohukanya ohuteebwaho esilolero syasyo hu bweeni bwaabwe, oba hu mahono kaabwe. Abaandu abo baalamuha, mani bachaaka ohutuka koti abatuki alala neende Kristo hulw'embaka y'emyaaka elifu ndala (1,000).

⁵Abafu badoong'ereo boosi, haba sibasyuuha baaba abalamu, ohwoola lu myaaka elifu ndala chino chawa. Huno nihwo ohusyuuhiswa hutaangira ohw'abafu.

⁶Beehoye, haandi bali neende ehabi muno, abo ababalibwa mu husyuuha hw'abafu hutaangira huno. Olwohuba ohufwa hwa habiri haba sihuchia hunyala ohuboolaho daawe. Bano bachia ohuba abalaamisi ba Nasaae, haandi aba Kristo, mani bachia ohutuka nae hulw'embaka ya emyaaka elifu ndala (1,000).

⁷Mani luunyuma lw'emyaaka elifu ndala (1,000) eyo ohuwa, Sitaani achia ohulehuulwa ohutula mu jeela yae,

⁸ mani achia ohunyala ohutula haandi ohuchia ohuchaaka ohubachaanga ebyaalo byasalaanira hu syaalo huno hwoosi, ohuboola mbwe, Googi neende Magoogi. Sitaani achia ohunyala ohubabuusa alala balwaane ebiita, abaangi bali koti emoni ch'omusenye kuli hu lwaasi lw'enyaanja.

⁹Ebyaalo bifwaana bityo, byabaambuha hu syaalo syoosi, mani byaanyala ohwebodoohania edaala ly'abaandu ba Nasaae, alala neende esiko si yaheera muno. Nae omuliro kweecha kweeha nikutula Muukulu, mani nikunyala ohubisihirisa byoosi.

¹⁰Mani bulaanu, Sitaani yali niyababachirisa, yasukunwa mu nyaanja y'omuliro neende maratutu, yi sisolo sira alala neende omunabbi mubacha wula yibali nibamala ohusukunibwa hale. Mani omwo nimwo mu boosi bachia ohusaandisirwa esiro neende esideete, endaalo choosi pe.

¹¹ Mani bulaanu haandi ndaabona, esisaala sy'obutuki sihunuufu muno, alala neende oyo osihalaangaho. Esyaalo alala neende Ekulu byoosi byeecha byahamyuuha yi yali naali, mani byaahaya ohubonehanaho haandi daawe.

¹²Mani ndabona abafu, abahoongo neende abadiidi sidubaanie, nibeemere mu moni w'esisaala esyo. Ebitabo byabwiihulwa, mani haandi esitabo siindi syosi syabwihulibwa, esitabo sy'abalamu. Abafu beecha baheengerwa emisaango ohweema hu biindu bi bali nibaholaanga, koti lu byali byandiikibwa mu bitabo ebyo.

¹³Bulaanu, enyaanja yatusa abafu bali nibayirimo. Ohufwa neende mu syaalo sy'abafu, byosi byaatusa abafu ba byali nibiri nabo. Mani boosi baheengerwa emisaango, ohweema hu biindu bi bali nibaholaanga.

¹⁴Bulaanu, ohufwa alala neende mu syaalo sy'abafu, byoosi byasukunwa mu nyaanja y'omuliro. Enyaanja y'omuliro yino, niyo ohufwa hwa habiri.

¹⁵Abo boosi ba meeta kaabwe kali nikatandiikwa mu sitabo sy'abalamu, basukunwa mu nyaanja y'omuliro eyo.