Read saamia Ohubwiihulirwa 21 Bible Online

Ohubwiihulirwa 21 - saamia bible

Ohubwiihulirwa 21

¹ Haandi ndabona Ekulu yaaha neende esyaalo siyaaha. Ekulu lyataangira, neende esyaalo syataangira, byahamyuuhao, haandi neende enyaanja yosi yakotao.

²Mani ndabona Esiko Syoolerefu, Yerusalemu njaaha nisiiha ohutula Muukulu, nisyamala ohutekehebwa mani nisyawa, koti omweeya muhasi n'amalire ohwefwaala yeendibwe neende omusaacha wae.

³ Bulaanu, ndeecha ndaawulira ekono hoongo muno nililomaloma nilitula hu sisaala sy'obutuki niliboola liti: “Bulaanu, edaala lya Nasaae liri mu baandu! Achia ohumenya alala nabo, mani babe abaandu bae. Nasaae mweene achia ohubechaanga alala nabo, haandi achia ohuba Nasaae waabwe.

⁴ Nasaae achia ohweeya amale hu moni ch'abwe amasika koosi. Ohufwa sihuchia ohubaao haandi, esibeera syosi haba sisiicha hubaao daawe, oba ohulira hwoosi, oba amachuuni koosi. Ebiindu bihale byoosi bimalire ohuhamyuuhao.”

⁵Bulaanu, oyo owali niyehaale hu sisaala sy'obutuki yeecha yaboola ati, “Mani bulaanu, mbao ndi ohuhola ebiindu byoosi ohuba ebiyaaha!” Haandi omweene oyo yeecha yamboolera ati, “Yandiika sino, olwohuba emboosi chino chadyeeri, haandi cheesikibwa.”

⁶ Haandi yaboola ati, “Simalire ohuholwa! Ese niise otaangira haandi omaliiriha, enjaaka haandi neende enjakamo. Oyo yeesi olumwa obuluwo, njia ohumuba obunyala bw'ohung'wa mu sulo y'amaachi k'obulamu n'atatuungire daawe.

⁷ Abo boosi abachia ohunyala ohuyiingira, bachia ohunyoola ohutula yi ndi esiindu sino: Ese njia ohuba Nasaae waabwe, nabo bachia ohuba abaana baange.

⁸Nae abati, abahobi, abahyaamia ohuhola obudya, abeeti, abacheke, abaholi b'amayia, abeenamira emisaambwa, alala neende ababacha boosi, obwiihalo bwaabwe, nibwo enyaanja yaaduha omuliro neende maratutu, eyiri niyo ohufwa hwa habiri.”

⁹Bulaanu, mulala hu bamalaika bataanu-na-babiri bala, abali nibakiingire ebbakuli chitaanu-na-chibiri chichuule endwaae chimaliirihayo chitaanu-na-chibiri chira, yeecha yi ndi mani yaamala yaboola ati, “Ewe yicha, mani njie hweekeseho Omweeya muhasi mweene, omuhasi w'Ekoondi doto.”

¹⁰ Mani Mwooyo yambukula, mani malaika oyo yangiinga yaanjira yaanda hu lugulu luleeyi muno. Malaika oyo yemao yanjekesa Yerusalemu, Esiko Syoolerefu esyo, nisiiha aasi, nisitula Muukulu, eyiri Nasaae

¹¹nisimesamesana hulw'oluyaali lwa Nasaae. Esiko esyo syali nisimesamesana koti amakina k'ebbeyi hoongo muno, koti yasipa neende amakina machweenufu keene.

¹² Esiko esyo syali siri neende esida sihoongo haandi esireeyi syeene, esiriho ebiruwa ehumi-na-bibiri hu biruwa nibiriho bamalaika ehumi-na-bibiri. Haandi hu biruwa ebyo hwali nihwandiikibwaangaho ameeta k'enono ehumi-na-chibiri ch'abaandu ba Yisiraeli.

¹³Buli lwaande lw'esida lwalichiingiho ebiruwa bidatu-bidatu biti: Bidatu ebukwe, bidatu emwaalo, bidatu emukulu, haandi bidatu emuumbo.

¹⁴Esida sy'esiko sino syali nisyoombahirwa hu misiingi ehumi-na-chibiri ech'amakina, akali kaandiikibwaho ameeta k'abatume ehumi-na-babiri bala ab'Ekoondi doto.

¹⁵ Malaika wula owali alomaloome naange hale, yali naali neende esikerero siri koti olusaala esyaholwa mu saabbu, ohukerera esiko esyo, ebiruwa byaasyo, alala neende esida syasyo syoosi.

¹⁶Esiko sino syali nisyakananilira enyaande choosi, mu bubaambali neende mubuleeyi bweene. Mani malaika oyo yeemao yachaaka ohukera esiko esyo niyehoonyera esikerero esyo yabona ati: Syali emiita elifu chibiri neende emia chine (2,400) mubuleeyi, nae haandi syali neende obubaambali bwaakanirira neende obuleeyi bwohuuloba, neende obuleeyi bw'ohuchia aakulu.

¹⁷Malaika oyo haandi yakera esida esyo, mani yabona ati syali nisiri emiita amahumi kasaasaba obukinu ohweema hu hubala hwafukiirirwa huyali niyehoonyera.

¹⁸ Esida sino syali syaholwa mu makina k'ebbeyi hoongo kalaangwa mbwe “yasipa” nae esiko syeene syali nisyaholwa mu saabbu ehaya, endafu yiri koti echupa.

¹⁹Amakina k'omusiingi kw'esida sy'esiko esyo, kali nikasaatwa neende enjia choosi ech'amakina k'engaanga hoongo muno. Omuse kutaangira kwali okw'amakina kalaangwa mbwe yasipa okwa habiri kwali okw'amakina kalaangwa mbwe safire, okwa hadatu kwali okwa agate nae okwa hane kwali okwa emeraadi,

²⁰okwa hataanu kwali okwa onikisi, okwa hasaasaba kwaaba okwa karinelia, okwa hataanu-na-habiri kwaaba okwa kwaasi ya namuki, okwa hataanu-na-hadatu, bberiili, okwa hataanu-na-hane topaasi, okw'ehumi kwali okwa kalisidoni, okw'ehumi-na-halala kwali okwa takoisi, nae okw'ehumi-na-habiri kwali okwa ametisito.

²¹Ebiruwa ehumi-na-bibiri byali eby'amakina k'engaanga ehumi-na-kibiri. Buli siruwa syali nisyaholebwa mu kina ly'engaanga. Engira hoongo chali mu siko esyo chali chaholwa mu saabbu haya, eyiboneherwamo koti echupa.

²²Haba sindabonaho Enyuumba ya Nasaae niyiri mu siko esyo daawe, olwohuba Enyuumba ya Nasaae y'esiko esyo, yali niyo Omwaami Nasaae w'Obunyala bwoosi, neende Ekoondi doto.

²³Esiko esyo haba sisidaha ohuba nisiri neende elyuuba, oba omwoosi ohuba nibikwaaduhira daawe, olwohuba oluyaali lwa Nasaae nilwo olusyaduhira, nae Ekoondi doto nilyo etaara lyasyo.

²⁴ Abaandu bohu syaalo huno, bachia ohukeenderaanga obulafu bwasyo, haandi abatuki b'esyaalo sino boosi, bachia ohuleetaanga obuyiinda bwaabwe bwoosi mu syeene esyo.

²⁵ Ebiruwa by'esiko esyo bichia ohudoong'aanga sa nibyahaaha oludaalo lwoosi. Haba sibicha ohwiikalwa daawe, olwohuba eyo siyichia hubaayo esiro daawe.

²⁶Obuhunuufu, alala neende obuyiinda bwoosi obw'ebyaalo byoosi bichia ohuleetwaanga mu siko esyo.

²⁷ Nae sibulao esiindu syoosi esiriho obubi bwoosi esichia ohunyala ohwiingira mu siko esyo, kata sa neende omuundu yeesi omuholi w'ebiindu bidiisa, esoni oba omubacha yeesi. Ohutusaho abo boosi, ba meeta kaabwe kaandiikibwa mu sitabo sy'Ekoondi doto, esy'abaandu balamu, boong'ene nibo abachia ohunyala ohwiingira mu siko esyo.