Read saamia Ohubwiihulirwa 3 Bible Online

Ohubwiihulirwa 3 - saamia bible

Ohubwiihulirwa 3

¹“Eyiri malaika w'abafukiiriri bali mu Saradiisi, yandiika oti, ‘Yino niyo emboosi yitula eyiri oyo oli neende mwooyo bataanu-na-babiri ba Nasaae, neende eng'ining'ini chitaanu-na-chibiri. Ese manyire bulai muno ebiindu byoosi byooli ohuholaanga. Manyire endi oli neende eliita lyo ohuba omulamu, kata neende niwamala ohufwa!

²Sakira siingira, mani odinyie esyo syosisiiri nasyo nisisiiri esilamu, syosi nisitoola ohufwiira elalira. Olwohuba manyire endi, bi mwahola haba sibyolerefu mu moni wa Nasaae waange.

³ Mani yichuliseho ebiindu bimweekeswaho neende bimwauliraho. Mubifuunihire, mani mumale mukaluuhane mutule mu bibi byeeng'we ebyo. Nae nimuhaya ohusimuha, njia ohwiicha yi muli koti omwiibi, mani haba simuchia hunyala ohumanya esiha siimba niinjia ohwiichiramo.

⁴Nae abaandu badiidi hweeng'we abali mu Saradiisi mwanyala ohuliinda engubo cheeng'we nichiri endafu. Niing'we abachia ohukeenda naange, nimufwaalire echa rachaari, olwohuba niing'we abahoyera ohuhola mutyo.

⁵ Abo boosi abayiingira bachia ohufwaalwa echa rachaari mu ngeri yino, haandi siinjia ohutusayo ameeta kaabwe ohutula mu sitabo sy'abalamu. Njia ohulaangirira alafu mu moni wa Laata yaange, neende mu moni wa bamalaika endi nibo abaandu baange.

⁶Nimuli neende amatwi, mani wulire bi Mwooyo aboolera abafukiiriri!’

⁷ “Eyiri malaika w'abafukiiriri bali mu Filadelifia, yandiika oti, ‘Yino niyo emboosi yitula eyiri oyo oli omwoolerefu haandi owadyeeri mweene. Niye oli neende olufunguo lwali lwa Daudi, mani niyeekula olwiiki lwoosi, abulao owuundi onyala ohulwiikala, haandi nalwiikala, abulao owuundi onyala ohulwiikula.

⁸Ese manyire bulai bweene ebiindu byoosi bi muhola. Manyire endi, muli neende amaani amadiidi muno. Mwaloonda enjekesa yaange, haandi mubereenge abeesikwa baange. Mani mbao mbekuliire olwiiki mu moni weeng'we bweene, lu muundu yeesi ataheekala daawe.

⁹ Mani tekeerese! Omukaanda kwa Sitaani okwo, ababacha abo abelaanga mbwe Bayudaaya nibo nihane sibali batyo, njia ohubahola beeche mani basigame aasi mu makulu keeng'we. Boosi bachia ohubonera elalira bati hane ese ndabaheera muno.

¹⁰Olwohuba eng'we mwoseresa abweene elako lyaange ly'ohweesimiirisa, mani syesi njia ohubaliinda bulai ebiha by'ebidinyu ebiri ohwiicha hu syaalo huno, ohuteema abaandu boosi abali hu syaalo huno, bihaye ohuboolaho.

¹¹Mbao njicha bwaangu muno. Liinde bulai ebyo byoosi bi muli nabyo, omuundu yeesi ahaye ohunyala ohubeebaho omusaara kw'obuyiingiri bweeng'we.

¹² Ese njia ohuhola abo boosi abaliyiingira ohuba emisiiro mu Nyuumba ya Nasaae waange, haandi sibalitulahoomo daawe. Njia ohubaandiikaho eliita lya Nasaae waange, haandi neende eliita ly'esiko sya Nasaae waange, Yerusalemu njaaha, esichia ohwiiha aasi nisitula Muukulu eyiri Nasaae. Njia haandi ohubaandiikaho eliita lyaange yaaha.

¹³Nimuli neende amatwi, mani wulire bi Mwooyo aboolera abafukiiriri!’

¹⁴ “Eyiri malaika w'abafukiiriri bali mu Laodesia, yandiika oti. “Yino niyo emboosi yitula eyiri Amiina, omweesikwa haandi omuloli wadyeeri, oli enjaako[2] y'ebiindu byoosi bi Nasaae yaloonga.

¹⁵“‘Ese manyire bulai bweene ebyo byoosi bi muholaanga. Manyire endi eng'we simuli abanyifu oba ababafu daawe. Nga ndahire muno endi mwahabeere sa silala, hu bibiri bino!

¹⁶Nae olwohuba mbwe muli sa abadunduumu, abataali ababafu oba abanyifu, njia bulaanu ohubafuucha sa mutule mu munwa waange!

¹⁷Muboola mbwe, Ese ndi omuyiinda mani ndi bulai muno. Ngandi ndi neende ebiindu byoosi biindaha. Nae haba simumanyireho koti lu muli abeelalihirirwa haandi abasaasirwa! Muli abamanani, syeekenye, haandi abawofu.

¹⁸Mani ndi ohubakerakira ohuungulaho esaabbu, esaabbu yitaalihoomo ahakoha daawe, hu munyale ohuba abayiinda. Haandi mukule neende engubo charachaari ohwefwalaanga abeene mani munyala ohubwiiha hu syeekenye sy'esoni syeeng'we esyo. Haandi kuleho amafuta k'ohubahaho hu moni cheeng'we echo, hu munyale ohubona bulai.

¹⁹ Ese njalabiraanga haandi sandyaanga abo boosi ba ndaheera. Mani becheenge sa mubwadyeeri, mani mukaluuhana mutula mu bibi byeeng'we.

²⁰Mani tekeerese! Mbao nyemere hu lwiiki haandi hong'oonda. Omuundu yeesi n'awulira ekono lyaange, mani yekulawo olwiiki, njia ohwiingira, ndye nae.

²¹Abo abayiingira, njia ohubaba obunyala bw'ohwiihala aambi naange hu sisaala syaange sy'obutuki, koti sa syesi ndayiingira mani bulaanu njihala aambi neende Laata, hu sisaala syae sy'obutuki.

²²Nimuli neende amatwi, wulire bi Mwooyo aboolera abafukiiriri!’ ”