Read saamia Ohubwiihulirwa 6 Bible Online

Ohubwiihulirwa 6 - saamia bible

Ohubwiihulirwa 6

¹Haandi ndeecha ndaabona Ekoondi doto lira nilihalaka ohwikulao esifuundiho sitaangira esy'emihuuri kitaanu-na-kibiri, haandi ndeecha ndawulira silala hu biloonge bilamu bine bira nisiboola mu kono lyaaduluhana koti ehubba ati, “Yicha!”

² Ndalingaala, mani ndaabona efaraasi ya rachaari. Omwiirusi wayo yali n'adiirire oluyiingo, mani yaberesebwa ekofia y'obutuki. Yachaaka ohwiirusa efaraasi yino koti omuyiingiri ochia ohuyiingira.

³Ao haandi Ekoondi doto lyahalaka lyeekula esifuundiho sy'omuhuuri kwa habiri. Ao haandi ese ndeecha ndawulira esiloonge silamu syohubiri nisiboola siti, “Yicha!”

⁴ Haandi efaraasi yiindi yeecha yaatulayo, bulaanu yali eya ranjaayi. Omwiirusi wayo yeecha yaabeeresebwa obunyala bw'ohuleeta eye hu syaalo huno, hu baandu banyale ohwiitana abeene-na-beene. Yabeeresebwa olugaanga luhoongo muno.

⁵ Bulaanu, Ekoondi doto elyo lyahalaka lyekula esifuundiho sy'omuhuuri kwa hadatu. Haandi ndeecha ndawulira esiloonge silamu syohudatu nisiboola siti, “Yicha!” Ndeecha ndaalingaala, ao ndaabona efaraasi mali. Omwiirusi wayo yali akiingire elatiri chibiri mu muhono kwae.

⁶Haandi ndawulira ekono liri koti ekono ly'omuundu nilitulira mu biloonge bilamu bine bira niliboola liti, “Elita y'engaano yichiira hu musaara kw'oludaalo lulala, nae eliita chidatu ech'amabeere, chichiira hu misaara ch'oludaalo lulala. Nae mutanyaasa emisaala misabbiibbu neende emisaala mituli daawe!”

⁷Ao, Ekoondi doto lira lyahalaka lyeekula esifuundiho sy'omuhuuri kwa hane. Haandi ndeecha ndawulira esiloonge silamu syohune nisiboola siti, “Yicha!”

⁸ Ndalingaala, ndaabona efaraasi y'obukoondo bufwiiririra. Omwiirusi wao nae bali nibamulaanga bati Ohufwa neende Emakoombe, yali n'ayiloondaho emukoongo aambi-aambi. Babeereswa obunyala hu situundu silala hu bine by'esyaalo syoosi, ohwiita nibehoonyera eye, enjala, oluumbe, neende ebisolo byomu siino.

⁹Bulaanu Ekoondi doto lira lyahalaka lyeekula esifuundiho sy'omuhuuri kwa hataanu. Ndalingaala mu lwaalo wa alutaari, mani ndaabona obulamu bw'abaandu bali nibeetwa sa hulw'ohuyaala emboosi ya Nasaae, nihaandi balichiingi abeesikwa muno mu hutusa obuloli hwaabwe.

¹⁰Behuuma mu kono hoongo bati, “Omwaami w'Obunyala bwoosi, omwoolerefu haandi owadyeeri mweene! Hwahaliinde ohwoola liina, hu weemeo oheengere abaandu bohu syaalo omusaango haandi obasaandye hulw'ohutwiita?”

¹¹Buli mulala hu beene abo, mani yaberesebwaanga eganjuula lya rachaari, mani nibeecha nibaboolerwa ohuwuluuhaho budiidi haandi, ohwoolera elalira lu buungi bw'abahalaabani basyaabwe haandi neende Abakristo basyaabwe buchia ohwiitwa bwoolerere, koti lu beene abo beetwa.

¹² Ao mani nimbona Ekoondi doto lira haandi nilihalaka ohwiikula esifuundiho sy'omuhuuri kwa hasaasaba. Ao yeecha yaabaawo musisi njalaba muno, mani elyuuba lyeecha lyakaluuhana lyamaliya ti koti engubo enyaandale emali, nae omwoosi kweecha kwakaluuhana elalira ranjaayi koti amabaanga.

¹³ Eng'ining'ini chachaaka ohubuluunguha nichikwa hu syaalo huno, koti enduli embisi nichikwa nichibuluunguha ohutula hu musaala kwaacho, omuyaka kw'amaani nikukudengaania.

¹⁴ Ekulu lyahamyuuhao, koti olupapula lwali nilwasiriingiswa nilumalwao, nae buli lugulu alala neende esisiinga syoosi, nilusudisibwa ohutusibwa mu bweyaango bwalwo.

¹⁵ Mani bulaanu, abatuki bohu syaalo huno, abeemirisi, alala neende abahuluundu b'amaye, abayiinda neende ab'obunyala buhoongo, neende abaandu baandi boosi, abawaambe neende abalehuule, bachaaka ohwekisaanga mu ng'uungu neende mu lwaalo w'enyaanda chiri hu ngulu.

¹⁶ Bachaaka ohulangaanga engulu neende enyaanda nibaboola bati, “Mutukweeho mutufuunihe mutukise huhaye ohubonehana mu moni ch'oyo owiihale hu sisaala sy'obutuki, haandi neende ohutula hu tima ly'Ekoondi doto!

¹⁷ Oludaalo lwaabwe lululu, lw'etima lyaabwe mbano lwoolere, nae naanu mweene onyala ohulweekaya?”