Read saamia Ruusi 3 Bible Online

Ruusi 3 - saamia bible

Ruusi 3

¹Luunyuma haandi hooho, Naomi yaboolera Ruusi ati, “Ese hoyeere ohuhunyoolera omusaacha ohudeehya, hu weesi onyale ohunyoola edaala lyao hu bwao.

²Yichulisa oti, omusaacha wuno Bboasi, omweene bahalaabani bahasi bawaholereenge nabo, mwiiho weefwe mweene. Mani bulaanu tekeeresa bulai bweene. Engoloobe ya nyaanga yino, achia ohuba naali ohuhubbakaanga amabere masuungu.

³Weeyoke bulai bweene, weebahe amafuta k'esing'aari, mani wefwaale engubo chao chihiramo obulai. Noomala otyo, wiiche ochie yaali ohuubbakiraanga, nae otakanya yaamanya nooli ebweene eyo, ohwoolera elalira naanaba n'amalire ohulya, haandi neende ohung'wa.

⁴Wehaliirisaanga omanyira elalira abuundu yaaba naachia ohweyalisira, endoolo nichimalire ohumuyira, ewe chia yaali mani obwiihule ebyebwiiho byae mani weeyalisire enamakulu wae. Omweene aba achia ohuhuboolera esiindu syooba ohole.”

⁵Ruusi yakobolamo ati, “Ese njia ohuhola sa buli siindu si oboola.”

⁶Ruusi yachia abuundu w'ohubbakiraangamo, naahola koti lu masaalang'ene yali n'amuboleere.

⁷Mani Bboasi niyali n'amalire ohulya, neende ohung'wa, mani yachaaka ohwewulira bulai. Yaachia eyiri esituuli sya amabere masuungu, mani yaakona aasi yeyalisa endoolo. Ruusi yeeyiba kaala yaachia yabwiihula ebyebwiiho byae, niyeyalisa aasi enamakulu wae.

⁸Mu siro bweene, Bboasi yeecha yaamumuha yasiingira, yeekaluuhania, mani yesiinduha ohunyoola omuhasi naakonere enamakulu wae.

⁹“Niiwe naanu?” Yateeba olwohuba ewe oli omwiiho woohubweene, ewe niiwe ohoyera ohuniinda. Mani sakira ewe ndeehye budeehya.

¹⁰“Omwaami ahuberese ehabi,” Bboasi yamuboolera. “Ewe mbao oli ohweekesera elalira obutiiririrwa bw'olwaanyi luno, mu siindu esyo syooli ohuhola bulaanu, ohuhiraho haandi mu ebyo byoosi biwaaholeraanga masaalao. Ewe oba awuundi wachia wachaaka ohukoonya omusyaani muyere, kata omuyinda, kata omumanani, nae ewe haba s'oholere otyo daawe.

¹¹Mani bulaanu ewe Ruusi otelalihirira daawe. Ese njia ohuhola buli siindu syoosi syoochia ohusaba; koti sa buli muundu yeesi mu siko muno amalire ohumanya, ewe oli omuhasi omuyenjeefu mweene.

¹²Syadyeeri syeene mbwe ese ndi omwiiho wohubweene, haandi niise oli neende obunyala hweewe, nae yiriyo omusaacha owuuhiraho ohuba aambi naawe.

¹³Doong'a ano esiro sino syoosi, mani echuli bweene, huchia ohuteeberesa humanye nikali mbwe, oba nikataali mbwe, niye ochia ohubukula obufunaanibwa hu ewe. Nikaba katyo, siba siri esilai muno; nisitaba sityo, mani ese mweene ndeechubira Omwaami mulamu endi, ese niise oba niinjia ohuhubukula mbe neende obunyala hweewe. Nae bulaanu buti, ewe kona sa ao mani oliinde ohwoola lu buchia ohuhya echuli.”

¹⁴Mani Ruusi yakona enamakulu wae eyo, nae yeeyina ohusiingira bwaangu obulafu nibuteecha bu muundu yeesi atanyala ohumuboneramo, olwohuba Bboasi mweene haba siyali naadaha omuundu yeesi ohumanya ati Ruusi abeereho abuundu ao.

¹⁵Bboasi yaamuboolera ati, “Ewe wefwaalulemo engubo yao eyo mani wiiche oyibaambule erwaanyi eno.” Yesi yaahola sa atyo, mani Bboasi yaachuhaho aambi ekiloguraamu amahumi kataanu amalaamba aka amabere masuungu, naamala naamuhoonya ohwedwiiha hu beka lyae. Ruusi naakobola nabyo mu siko.

¹⁶Mani yoola engo, masaalang'ene yamuteeba ati, “Ewe muhaanang'ene, bihuchiriire bitye?” Ruusi yaamuboolera buli siindu si Bboasi yali namuholeere.

¹⁷Haandi yameedaho ati, “Yamboleere ati ese haba sihoyeere ohukobola yooli mahono mahaya, sakira yambereese amabere masuungu kano koosi.”

¹⁸Naomi nae yaamuboolera ati, Mani bulaanu ewe Ruusi, wesimiirise sa, ohwoola lu ochia ohubona koti lu bino byoosi bichia ohuba. Bboasi haba saachia ohuyeera enyaanga yino, ohwoola lwaachia ohwooseresa bino byoosi.