Read saamia 1 Samueli 1 Bible Online

1 Samueli 1 - saamia bible

1 Samueli 1

¹Yaluwo omusaacha wuundi olaangwa Elikana, ohutula mu nono ya Efuraimu, owali niyamenya mu siko sya Rama mu syaalo sy'ebigulu sya Efuraimu. Yali omwaana wa Yerohaamu, Yerohaamu yali omwaana wa Elihu, Elihu yali omwaana wa Tohu, Tohu yali omwaana wa Sufu.

²Elikana yali neende abahasi babiri, Hana neende Penina. Penina yali neende abaana, nae Hana yali omukuumba.

³Buli mwaaka, Elikana yatulaanga Rama naachia Silo ohwiinamira Nasaae, neende ohuyaaniraanga Omwaami w'Obunyala ebiyaanwa. Hofini neende Finehaasi, abaana ba Elikana babiri, nibo abali abalaamisi b'Omwaami Silo.

⁴Buli siha si Elikana yayaanaanga ebiyaanwa byae, yaberesaanga omuhasi wae Penina omukabo, haandi yaberesaanga abaana bae bahaana neende abasyaani emikabo.

⁵Nae kata Elikana kata neende niyali yaheera Hana muno, yamuberesaanga sa omukabo mulala kwoong'ene, olwohuba Omwaami yali niyamuhola omukuumba.

⁶Penina mwaalihwang'ene Hana, yaholaanga ebiindu bya munyoolesaanga haandi ebyamudiisaanga engisa, olwohuba Omwaami yali niyamuhola omukuumba.

⁷Sino syeholaanga sityo buli mwaaka. Buli lu bachichaanga mu nyuumba y'Omwaami, Penina yanyoolesaanga Hana muno. Sakira Hana yaliraanga amasika, mani bi muhayaanga kata ohulyaaho esiindu syoosi.

⁸Nae Elikana, wamwe yamuteebaanga ati, “Hana, siina syeene esikeraanga noolira oti, haandi lwasiina ohayire olya? Lwasiina omwooyo kwao kubulamo esangaalo? Ese haba si ndi neende obuhoonyi yooli ohuhira abaana basyaani ehumi?”

⁹Ludaalo luundi, nibali nibamalire ohulya neende ohung'wa mu nyuumba y'Omwaami Silo, Hana yasiingira. Engisa nyiingi yali niyimudiirire, mani naalaama eyiri Omwaami n'alira muno.

¹⁰Eli, omulaamisi yali niyehaale hu sisaala, aambi neende omulyaango kw'enyuumba y'Omwaami eyo. Hana wuno yali niyeelalihirira muno mani naalaamanga eyiri Omwaami haandi n'alira muno.

¹¹ Hana yeemao yeeyama n'asuubisa ati, “Omwaami ow'Obunyala, ndewuunje, ese omuhalaabani wao! Bona ebidinyu byaange mani wuunjichulise! Otaanjibiririra elalira daawe! Niwuumba omwaana musyaani, husuubisa endi njia ohumuyaanayo yooli obulamu bwae bwoosi, haandi haba saacha ohubekwaho efwiiri lyae daawe.”

¹²Hana yemeeda ohulaama eyiri Omwaami ohumala embaka ndeeyi muno, mani Eli niyeehaliirisa bulai omunwa kwae.

¹³Hana yali nalaamiraanga mu mwooyo; omunwa kwae nikuli ohuhinaakiriraanga sa, ekono lyae nilitatuumbuha daawe. Mani Eli naabaasa ati, awuundi yali naameerere,

¹⁴mani naamuboolera ati, “Wahameere ohwoola li? Lehera ao ohung'wa obeeho omwaaywe!”

¹⁵Nae yakobolamo ati, “Haba daawe, ese haba simeerere, omwaami waange. Ese haba sing'weereho kata nabudiidi! Ese ndi neende engisa nyiingi muno, ndi ohulaamaanga, ninjekesa Omwaami ebidinyu byaange.

¹⁶Otabaasa oti ndi omuhasi okoterwe esiindu si hola. Mu bidinyu neende etima lyaange bibitiiriire, nibyo ebikerere niinomanoma ohwoola buti.”

¹⁷Eli yeemao yaamukaluhamo ati, “Waao neende omuleembe, haandi leha Nasaae wa Yisiraeli ahuberese esiindu sy'omusabire.”

¹⁸Nae Hana yamukobolamo ati, “Weebale ohuusabira ehabi.” Mani Hana niyeweraayo, naalya ebyohulya, niyaakama ohwelalihiraanga.

¹⁹Nibwahya echuli, Elikana alala neende abomu daala lyae basimuha, beenamira Omwaami, mani baakobolayo engo waabwe, boola mu nyuumba yaabwe Rama. Elikana yeemao yaaba neende omuhasi wae Hana, mani Omwaami yeechulisa Hana.

²⁰Hana yanyoola amabaanga, yeebula omwaana musyaani. Yamukuliha ati, Samueli, olwohuba yaboola ati, “Ndamusaba Omwaami.”

²¹Esiha haandi syoola Elikana alala neende abomu daala lyae ohuchia Silo, ohuyaanira Omwaami esiyaanwa sya buli mwaaka, neende ohwooseresa esiyaanwa syae si yeyama.

²²Nae ehabi lino, Hana haba siyacha nabo daawe. Yaboolera wamwe ati, “Niisisa sa omwaana wuno ohunuuna endi, njia ohumuyira mu nyuumba y'Omwaami, yaacha ohumenyaanga endaalo ch'obulamu bwae choosi.”

²³Elikana yakobolamo ati, “Esyo siri abweene, ewe hola sa sy'obaasa oti sihoyera; doong'a ango ohwoola lwaalisirira ohunuuna. Leha Omwaami yomiise esisuubise si wahola esyo.” Mani Hana naadoong'a ango, ohulera omwaana wae.

²⁴Niyali niyahamusisa sa ati ohunuuna, yamuyira Silo, alala neende ewuunwa y'emyaaka kidatu, ekiloguraamu ehumi ech'obusye, neende esikiingiro sy'eseero esichuule efiini. Yayira Samueli n'asisiiri omuyere atyo, mu nyuumba y'Omwaami Silo.

²⁵Beemao beeta esurusi eyo, mani nibayira omwaana oyo eyiri Eli.

²⁶Hana yaboolera Eli ati, “Husaba huteebeho omwaami waange. Mani wuunjichulisa? Niise omuhasi weemaanga ano mu moni wao, niinaama eyiri Omwaami.

²⁷Wuno niye omwaana yi ndasaba Omwaami, mani naawulira ohusaba hwaange, niyamberesa si ndali nimusabire.

²⁸Mani sakira syesi ndi ohumuyaanayo eyiri Omwaami. Mu bulamu bwaye bwoosi, achia ohuba ow'Omwaami.” Mani nibeenamira Omwaami eyo.