Read saamia 1 Samueli 11 Bible Online

1 Samueli 11 - saamia bible

1 Samueli 11

¹Luunyuma lw'embaka y'omwoosi mulala, Omutuki Nahasi Omwaamooni yemirira eye lyae ohuseeta esiko sya Yabbesi esiri mu situundu sya Gileadi mani naamala naasyebodoohania. Abasaacha bomu Yabbesi baboolera Nahasi bati, “Hola naafwe endagaano, mani huchia ohufukiirira obe omutuki weefwe.”

²Nahasi yakobolamo ati, “Njia ohuhola naang'we endagaano nimufukiirira esiindu silala: Nimufukiirira ohubatusa mu buli muundu emoni yae yohu muhono muluungi, mani nyaambye esoni hu Yisiraeli syoosi.”

³Abeemirisi ba Yabbesi baboola bati, “Tubereseho endaalo chitaanu-na-chibiri mberi hunyale ohusalaania emboosi yino mu syaalo sya Yisiraeli syoosi. Nihutanyoola omuundu yeesi ochia ohutununula, ao huchia ohweyaanayo y'oli.”

⁴Bawamwaanda boola Gibbeya, yi Saulo yali niyamenya, mani nibaboolera abaandu emboosi echo. Ao mani abaandu boosi nibatuunduha ohulira nibakwiiremo oluteengo.

⁵Saulo yali sa hwakobola naatula mu mikuunda n'ali neende endaawu chae, mani naateeba ati, “Siina syeene esikwiireo? Lwasiina buli muundu ali ohulira?” Bamuboolera emboosi chi bawamwaanda bali nibaleetere ohutula Yabbesi.

⁶Saulo niyawulira sino, mwooyo wa Nasaae yamuniina, mani yachaaka etima liingi nilimudiira.

⁷Yabukula endaawu chibiri, mani naachidonyoladonyolamo ebituundu, naabiberesa bawamwaanda ebituundu ebyo babiyire buli abuundu mu Yisiraeli nibaboolera abaandu bati: “Oyo yeesi onahaya ohuloonda hu Saulo neende Samueli ohuchia mu biita, eng'oombe eyeeyi chae ohudonyoladonyolwamo koti chino!” Abaandu ba Yisiraeli batya muno esiindu si Omwaami anyala ohuhola, mani boosi ataali odoong'a yeesi, nibaba silala.

⁸Saulo yababuusira abuundu mbwe Bbeseki: bali elifu emia chidatu (300,000) ohutula mu Yisiraeli, neende elifu amahumi kadatu (30,000) ohutula mu Yuda.

⁹Baboolera bawamwaanda batula Yabbesi bati, “Muboolere abaandu beeng'we muti, nichitoola esaa chisaasaba ch'esideete, bachia ohununulwa.” Abaandu bomu Yabbesi nibanyoola emboosi chino, basangaala muno

¹⁰mani nibaboolera Nahasi bati, “Muchuli efwe huchia ohweyaanayo yi muli, mani mutuholeho esyo syoosi si mudaha.”

¹¹Esiro esyo, Saulo yakabulamo abasaacha bae mu bikaanda kidatu. Mani echuli mu mabwiibwi nibwahya, hu ludaalo luloondaho beengira mu kaambi y'abasuku, mani nibaseeta Abaamooni. Ohwoola esideete akati, bali nibabasiinjire boosi. Abawonao mani nibasalaana, buli muundu naadiira engira yae yeeng'ene.

¹²Mani abaandu ba Yisiraeli nibaboolera Samueli bati, “Abaandu baboolere bati Saulo haba s'ahoyere ohuba omutuki bali yeena? Baleete, hubeete!”

¹³Nae Saulo n'aboola ati, “Abulao omuundu yeesi ochia enyaanga yino, olwohuba luno nilwo oludaalo lu Omwaami anunuliireho Yisiraeli.”

¹⁴Mani Samueli naababoolera ati, “Lehe fweesi huchie Giligaali mani haandi hulaangirire Saulo koti omutuki weefwe.”

¹⁵Mani boosi nibachia Giligaali, mani nibali eyo Abuundu Woolerefu, balaangirira bati Saulo niye omutuki. Bayaana ebiyaanwa by'ohusaasania. Haandi Saulo alala neende abaandu boosi ba Yisiraeli bahusa omuholo okwo.