Read saamia 1 Samueli 14 Bible Online

1 Samueli 14 - saamia bible

1 Samueli 14

¹Ludaalo luundi, Yonatani yaboolera omuraaga yamukiingiraanga ebilwaaniso byae ati, “Leha huhalakanie huchie eyiri ekaambi y'Abafilisiti.” Nae Yonatani haba siyabooleeraho Saulo laatang'ene daawe.

²Saulo yali naateere ekaambi yae mu siiniha sy'omusaala kwa pomeguranaati okuli abuundu mbwe Migironi, ataali eyale neende Gibbeya. Abaandu bali nae bali aambi emia chisaasaba (600).

³(Omulaamisi yali naakiingire esyefwaalo silaangwa efodi yali Ahija, omwaana wa Ahituubbu, mwanaang'ina Yikabodi, omwaana wa Finehaasi, omwaana wa Eli, omulaamisi w'Omwaami mu Silo.) Abasaacha bano haba sibamanyire bati Yonatani yali aweereo.

⁴Mu muhoosi kw'ohwiingiramo n'ochia Mikimasi, ku Yonatani yali owohubitiraho n'achia ena kaambi y'Abafilisiti, mwalimo enyaanda chibiri emambaafu muno, buli olwaanda niluli olwaande lw'omuhoosi okwo. Olwaanda lulala lwali lulaangwa Bboseesi, nae oluundi nilulaangwa Sene.

⁵Lulala lwali niluli hu luwaande lw'emukulu lw'omuhoosi, nilulingaalire Mikimasi, nae oluundi lwali hu luwaande lw'emwaalo, nilulingaalire Gebba.

⁶Yonatani yaboolera omuraaga oyo ati, “Leha huhalakanie huchie eyiri ekaambi y'Abafilisiti, abaandu bataali abahebe abo. Awuundi Omwaami anyala ohutuhoonya; naatuhoonya, sibulao esiindu sinyala ohumukayira ohukera hwayiingira, kata hwahaba nihuli abadiidi baaka batye.”

⁷Nae omuraagaya mudiiriraanga ebilwaaniso oyo yakobolamo ati, “Buli siindu sy'odaha ohuhola, ese ndi alala naawe.”

⁸Yonatani yaboola ati, “Esyo silai. Mani efwe hwiicha ohuchia huhalakanie mani Abafilisiti batubone.

⁹Nibatuboolera ohubaliinda beeche yi huli, ao mani huchia ohweema abuundu yi huli ano.

¹⁰Nae nibatuboolera bati huchie yi bali, huchia ohuchia, olwohuba esyo siba sichia ohuba esyohuboneraho siti Omwaami atubeere ohubayiingira.”

¹¹Boombi beeyekesa eyiri Abafilisiti, mani Abafilisiti nibaboola bati, “Bone! Abaibburania baandi ngaandi bali ohutula mu meena kaabwe kababereenge nibeekisiremo!”

¹²Mani nibalaanga Yonatani neende omuraaga yakiingaanga ebilwaaniso byae nibaboola bati, “Mwiiche aakulu ano! Muchia ohubona si huchia ohubahola!” Yonatani yaboolera omuraaga oyo ati, “Noonde. Omwaami abereese Yisiraeli ohubayiingira.”

¹³Yonatani yaniina hu muhoosi okwo maafula, mani omuraaga oyo naamuloondaho. Yonatani yaseeta Abafilisiti yaabakoka aasi, nae omuraaga yakiingaanga ebilwaaniso byae naabeeta.

¹⁴Mani mu biita bwataangira obwo, Yonatani neende omuraaga yakiingaanga ebilwaaniso byae oyo, beeta aambi abasaacha amahumi kabiri abuundu adiidi woola aambi w'esituundu sy'eyeeka.

¹⁵Mani Abafilisiti boosi abali mu ngoongo bakwaamo oluteengo. Abo abali nibachiire ohunyaka neende abanamaye abali mu kaambi bachaaka ohuteengereha olw'obuti; esyaalo syosi syateengereha, mani oluteengo luungi nilukwaao.

¹⁶Abasaacha baliindaanga Saulo abali Gibbeya esiri mu situundu sya Bbenjamini nibatingaala, babona Abafilisiti nibeeruha nibawuungire.

¹⁷Mani Saulo naaboolera abasaacha abali nae ati, “Mubale abanamaye, mufuumbule oyo otaaliwo.” Bosi nibahola batyo, nibafuumbula bati Yonatani neende omuraaga wamukingiiraanga ebilwaaniso byae nibo abali nibataaliwo.

¹⁸Saulo yaboola omulaamisi Ahiija ati, “Leeta ano Esanduuku ly'Endagaano ya Nasaae.” (Hu ludaalo olwo, Ahija yali naakiingire Esanduuku lya Nasaae niyemiisiremo Abaisiraeli.)

¹⁹Ao mani Saulo naasilomalomaanga neende omulaamisi, ohuwuunga hwali mu kaambi y'Abafilisiti nihwemeeda ohubiiya, mani Saulo naamuboolera ati, “Bulaanu buti sibulao esiha sy'ohweteeba hu Omwaami daawe!”

²⁰Saulo neende abaandu abali nae boosi nibahuumba nibachaaka ebiita ohulwaania Abafilisiti, abali nibalwaanakana abeene-na-beene mu huwuunga hw'amaani hwaluwo.

²¹Abaibburania baandi, abali hu lwaande lw'Abafilisiti haandi abali nibachiire nabo mu kaambi yabwe, bakaluuhana mani nibeeyambaania hu Saulo neende Yonatani.

²²Haandi abaandi, abalichiingi nibeekisire mu bigulu bya Efuraimu, bawulira bati Abafilisiti bali nibeeruha nibeweerao, bosi beyiingisa mu biita ohuseeta Abafilisiti.

²³Mani nibalwaana ohwoolera elalira Bbetafeeni. Omwaami naawonia Abaisiraeli hu ludaalo olwo.

²⁴Abaisiraeli bali abajoong'u muno hulw'enjala yi baoonga hu ludaalo olwo, olwohuba Saulo yahola esichubo, mani naalagira ati: “Omuundu yeesi onalyeeho esiindu enyaanga yino nisisiiri ohwetuunga hu basuku baange, achia ohubwaabwa.” Mani abulao omuundu yeesi owalyaaho esiindu syoosi oludaalo olwo lwoosi.

²⁵Abaandu boosi niboola mu sichaha mani banyoolamo obuuhi buli buli abuundu.

²⁶Esichaha esyo syali syeechulamo ohuuhi, nae abulao omuundu yeesi owabulyaaho daawe, olwohuba boosi bali nibatiire esichubo sya Saulo.

²⁷Nae Yonatani haba siyali naawuliire esiindu si laatang'ene yali yechubiire abaandu bano; yeyeneeresa neende olusaala lu yali n'akiingire, nalwiiniha mu sibbaangara sy'obuuhi, mani naalyaho hu buuhi obwo. Niyamala sa ati ohubulyaaho, mani naakobolamo amaani.

²⁸Nae mulala hu basaacha ba yali nabo naamuboolera ati, “Laatao yalagira abaandu naahola esibwaabo n'aboola ati, ‘Omuundu yeesi onalyeeho esiindu syoosi enyaanga yino wohulaamwa.’ ”

²⁹Nae Yonatani yakobolamo ati, “Laata aholere esiindu sibi muno eyiri abaandu beefwe! Bone ese ngoboolemo amaani olwohuba hoombereho sa hu buuhi buno!

³⁰Syahabeere esilai muno enyaanga yino, abaandu beefwe baba nibaliireho ebyohulya bibayaayire nibayingiire omusuku wuno. Baasaho sa, obuungi bw'Abafilisiti ba baheetere!”

³¹Hu ludaalo olwo, Abaisiraeli bayiingira Abafilisiti, balwaana nabo ohutula Mikimasi ohwoolera elalira Aijalooni. Mu biha ebyo, Abaisiraeli bali nibajoong'ere muno hulw'enjala.

³²Mani nibakwa hu biindu bi bali nibayaayire hu basuku. Babukula amakoondi neende eng'oombe, mani nibabisiinjira ao, abaandu nibalya enyama niyisisiirimo amabaanga.

³³Mani nibaboolera Saulo bati, “Bona, abaandu bali ohwonoona eyiri Omwaami nibalya enyama yisisiirimo amabaanga.” Saulo yaboola ati, “Muli ab'olukwe eng'we! Musiindikise okukina kuhoongo mukuleete ano yi ndi.”

³⁴Haandi n'aboola ati: “Muchie mu baandu mani mubaboolere boosi baleete eng'oombe chaabwe, neende amakoondi kaabwe ano. Bachisiinjire haandi bachiriire ano: bahaye ohwonoona eyiri Omwaami nibalya enyama eyisiirimo amabaanga.” Mani esiro esyo, buli muundu naaleeta eng'oombe yae mani nibachisiinjira ao.

³⁵Saulo yoombahira Omwaami alutaari. Eyo niyo eyataangira Saulo ohwoombahira Omwaami.

³⁶Saulo yaboolera abasaacha bali nae ati, “Lehe hwiihirire huchie huseete Abafilisiti esiro, hunyake ebiindu ohwoola obwiire lu bunahya, haandi hubeete boosi.” Mani nibamukobolamo bati, “Hola buli siindu syoosi sy'obaasa oti nisyo esihoyera.” Nae omulaamisi yaboola ati, “Lehe mberi hweteebeho hu Nasaae.”

³⁷Saulo mani n'ateeba Nasaae ati, “Njie seete Abafilisiti, kose? Ochia ohutuberesa ohuyiingira?” Nae Nasaae haba siyakoboleramo esiindu syoosi hu ludaalo olwo.

³⁸Bulaanu Saulo yaboolera abeemirisi b'abaandu ati, “Mwiiche ano mweesi, humanye syonoono siina syeene si huholere enyaanga yino.

³⁹Ndeechubira Omwaami mulamu, okera Yisiraeli ohuyiingira endi, oyo yeesi ochia ohubaaho omusaango, achia ohwiitwa, kata ayahaba naali omwaana waange Yonatani.” Nae naabulao owakobolamo esiindu syoosi.

⁴⁰Haandi Saulo naababoolera ati, “Eng'we mweesi muchie mweeme era, nae Yonatani naange huchia ohweema ano.” Bakobolamo bati, “Hola buli siindu si obaasa oti sihoonyera.”

⁴¹ Saulo yateeba Omwaami Nasaae wa Yisiraeli ati, “Omwaami, lwasiina haba s'imungoboolemo nyaanga yino? Ewe Nasaae wa Yisiraeli, ngobolemo niwehoonyera amakina moolerefu kano. Nikali mbwe omusaango kuli hu Yonatani oba kuli hweese mweene, ngoboleremo niwehoonyera Urimu; nae nikali okwa abaandu bao Abaisiraeli, yoosi abaandu bao, kobolamo niwehoonyera Tumimu.” Eha niyikwa hu Yonatani neende Saulo, mani abaandu nibawona.

⁴²Mani Saulo n'aboola ati, “Mweheengereo akatikaati w'omwaana waange Yonatani neende ese.” Mani eha nihakwa hu Yonatani.

⁴³Saulo mani naateeba Yonatani ati, “Oholere siindu siina syeene?” Yonatani yakobolamo ati, “Ese Hoombeereho obuuhi budiidi hu lusaala lu mbeere nindiirire. Mani mbano ano. Ndi omweetekefu ohufwa.”

⁴⁴Saulo yamuboolera ati, “Nasaae ahoya yaanjitirao, ewe Yonatani noteetwa!”

⁴⁵Nae abaandu bateeba Saulo bati, “Mubwadyeeri bweene Yonatani, owayiingirira Yisiraeli ebiita by'amaani bino, niye ochia ohwiitwa? Haba bbe! Efwe husuubisa huti koti lu Omwaami ali omulamu, lubuleo kata olufwiiri lulala oluchia ohutula hu mutwe kwae. Olwohuba esiindu sino sy'aholere enyaanga yino, asiholere naali alala neende Nasaae.” Mani ao abaandu nibawonia Yonatani, naateetwa.

⁴⁶Luunyuma lw'esyo, Saulo yaakamisira ao ohwiiruhania Abafilisiti, mani nibeekobolerayo mu syaalo syaabwe.

⁴⁷Saulo n'amalire ohuba omutuki wa Yisiraeli, yalwaania abasuku bae boosi buli abuundu: yalwaania Abaandu ba Moabbu, neende Abaamooni, neende ab'Edomu, neende abatuki ba Sobba, neende Abafilisiti. Buli abuundu yi yachichaanga yayiingiraanga.

⁴⁸Yalwanaanga neende obululu mani naayiingira kata Abamaleki. Yanyala ohuwonia Abaisiraeli boosi mu buli huseetwa hwoosi.

⁴⁹Abaana ba Saulo bali, Yonatani, Yisifi, neende Malikisua. Ameeta k'abaana bae bahaana niko kano: omuhuluundu yali n'alaangwa Merabbu, nae omuyere yali alaangwa Mikaali.

⁵⁰Omuhasi wa Saulo yali niye Ayinowamu, owali omwaana wa Ahimaasi; omuhoongo w'amaye wae yali Abbuneeri mwanaang'ina wa Neeri owali laatang'ene wuundi.

⁵¹Kisi laatang'ene Saulo, neende Neeri laatang'ene Abbuneeri, boombi bali abaana ba Abbieli.

⁵²Saulo mu bulamu bwae bwoosi yalwaania muno Abafilisiti. Niyanyoolaanga omusaacha w'amaani haandi ow'esinani abuundu woosi, yamwiingisaanga mu eye lyae.