Read saamia 1 Samueli 15 Bible Online

1 Samueli 15 - saamia bible

1 Samueli 15

¹Samueli yaboolera Saulo ati, “Ese niise yi Omwaami yatuma ohuhuchuhaho amafuta ohuba omutuki w'abaandu baange Abaisiraeli. Mani bulaanu, wulira bi Omwaami w'Obunyala bwoosi by'aboola.

²Omwaami w'Obunyala bwoosi aboola ati achia ohusaandya abaandu ba Amaleki olwohuba bakuuka yaabwe bayiingania Abaisiraeli nibali nibatula Misiri.

³Chia oseete Abamaleki mani osihirisire elalira buli siindu syoosi si bali nasyo. Otalehaho esiindu syoosi daawe; yiita abasaacha boosi, abahasi, abaana, neende abadoto bosi; eng'oombe, amakoondi, engamia, neende esuhiri.”

⁴Saulo yalaanga abalwaani bae naababuusa alala, mani naababalira Telemu. Bali abanamaye aboola elifu emia chibiri (200,000) ohutula mu Yisiraeli, neende abaandi elifu ehumi (10,000) ohutula mu Buyudaaya.

⁵Saulo alala neende abasaacha ba yali nabo niboola mu siko sya Amaleki, mani nibabeeboondera mu hooho lw'omwaalo kwahama.

⁶Saulo n'atuma ohulabula eyiri Abakeeni, abaandu bakuuka yaabwe bakwiiraho Abaisiraeli esisa nibali nibatula mu Misiri n'aboola ati, “Eng'we mweweereo mutule hu Bamaleki, haye ohubeetera alala nabo.” Mani Abakeeni nibatula hu Bamaleki.

⁷Saulo yayiingira Abamaleki, naabalwaanakania ohutulira elalira hu Hafila, ohwoola hu Suuri, ebukwe wa Misiri.

⁸Yawaamba Agaga omutuki w'Amaleki naali omulamu haandi niyeeta abaandu boosi.

⁹Nae Saulo neende abasaacha bali nae bawonia obulamu bw'Agaagi haandi nibateeta amakoondi kahiramo obulai, neende eng'oombe, emoosi chihiramo obulai neende amakoondi madoto kahiramo obulai, neende buli siindi syoosi esyali esilai syoosi. Basihirisa ebiindu bitali neende obuhoonyi, haandi ebibulamo echamu.

¹⁰Omwaami yaboolera Samueli ati,

¹¹“Ndeeyichulisa lwasiina ndahola Saulo ohuba omutuki. Akaluhaane n'andulaho haandi n'ahaya ohuwulira ebilagiro byaange.” Samueli yanyoolera muno, mani esiro syoosi yakona niyekongooya Omwaami.

¹²Hu ludaalo lwaloondaho, Samueli yawuuna ohuchia ohukoonya Saulo. Yawulira ati, Saulo yali naachiire mu siko sya Karimeeli, haandi eyo yoombahayo esyohweyichulirisiraho; mani niyehirira ohuchia Giligaali.

¹³Ao mani Samueli naachia eyiri Saulo. Saulo yamuboolera ati: “Omwaami ahuberese ehabi, ewe Samueli! Noondere elako ly'Omwaami.”

¹⁴Nae Samueli yamuteeba ati, “Siina syeene si ndi ohuwulira koti eng'oombe chiri ohwaana, neende amakoondi kabikiicha?”

¹⁵Saulo yakobolamo ati, “Abasaacha bali naange nibo ababiyaayire ohutula hu Abamaleki. Beedooleremo amakoondi kahiramo obulai, alala neende eng'oombe chihiramo obulai ohwiicha ohubiyaanayo koti ebiyaanwa eyiri Omwaami Nasaae wao, nae ebidoong'ereo, hwabisihirisira elalira.”

¹⁶Samueli yaboolera Saulo ati, “Leha mberi huboolere Omwaami biyambooleere esiro sino.” Saulo mani naakobolamo ati, “Mboolere.”

¹⁷Samueli n'aboola ati, “Kata ayahaba mbwe wali omweene welekeeresa, niiwe omwimirisi w'enono cha Yisiraeli. Omwaami yahuchuhaho amafuta ohuba omutuki wa Yisiraeli.

¹⁸Yahutuma ohuhola omulimo n'aboola ati: ‘Chia osihiirisire elalira abonooni abo Abamaleki. Yahuboolera obalwaanie ohwoola lu onabeete boosi.’

¹⁹Mani siina syeene esikerere waahaya ohumuwulira? Siina syeene esikerere wabbibbiirihana ohuyaaya ebipeeywa, mani waahola esiindu sinyoolesa Omwaami?”

²⁰Saulo yakobolamo ati, “Ndafunihira ekono ly'Omwaami, mani niinjia nihola omulimo ku Omwaami yaatuma, nindeeta Agagi omutuki w'Abaamaleki, haandi nisisihirisa Abamaleki boosi.

²¹Nae abasaacha bali naange haba sibeeta amakoondi kahiramo obulai neende eng'oombe chihiramo obulai hu biindu byali ebyohusihiriswa. Babileeta ano Giligaali ohubiyaana eyiri Omwaami Nasaae wao.”

²²Samueli yateeba Saulo ati, “Siindu siina syeene si Omwaami ahira ohudaha: ohumuwulira, kose ebiyaanwa neende ebirabo? Ohumuwulira huhirira elalira ohumuyaanira amakoondi kahiramo obulai.

²³Obujeemu nisyo nasilala neende esyonoono sy'obulakusi, haandi esyeejo nisyo nasilala neende esyonoono sy'ohwiinamira ebiloongaloongwe. Koti lu ohayire ohuhola bi Omwaami yahulagira, Omwaami yesi ohwebwaabire ohuba omutuki.”

²⁴Ao Saulo naaboolera Samueli ati: “Ndonoona, olwohuba ndajeemera esilagiro sy'Omwaami, neende engeraka yao. Ndatya abasaacha bali naange mani nibahola bi bali nibadaha.

²⁵Nae bulaanu, hwekweeda, wundeheremo esyonoono syaange, hukoboleyo fweembi, hu syesi nyale ohwiinamira Omwaami.”

²⁶Samueli yakobolamo ati, “Ese haba siinjia hukobolayo naawe daawe, olwohuba wajeemera esilagiro sy'Omwaami, mani yesi ahwebwaabire ohuba omutuki wa Yisiraeli.”

²⁷Ao Samueli yakaluuhana ohweweerao, nae Saulo naadiira hu ganjuula lyae naalyoomeraho, mani naalitaandula.

²⁸Samueli yamuboolera ati, “Omwaami ataandule-taandulemo Obwaami bwa Yisiraeli enyaanga yino mani naabuberesa omuundu wuundi omulai ohuhiraho.

²⁹Haandi Nasaae amaani ka Yisiraeli haba saabacha oba yakaluuhania ebibaaso byae. Olwohuba haba si muundu ati yekaluuhania daawe.”

³⁰Saulo yakobolamo ati, “Ese ndonoona, nae njisemo oluyaali mu moni w'abeemirisi b'abaandu baange, neende mu moni wa Yisiraeli, okoboleyo naange, nyinamire Omwaami Nasaae wao.”

³¹Mani Samueli naakobolayo nae, Saulo niyeenamira Omwaami.

³²Samueli yalagira ati, “Mundeetere ano Agaga omutuki w'Abaamaleki.” Agagi niyeecha eyiri Samueli naateengereha olw'obuti, naabaasa ati, “Ohufwa nga siindu silulu muno!”

³³Samueli yaboola ati, “Koti lu lugaanga lwao lwaleha abahasi beebula nibatali neende abaana, bulaanu olwo nilwo lu maakoo anaabe mu bahasi baasye n'ataali neende omwaana.” Mani Samueli n'adonyadonyamo Agaga mu moni wa alutaari Giligaali.

³⁴Mani Samueli n'achia mu Rama, nae omutuki Saulo n'achia engo wae abuundu mbwe Gibbeya.

³⁵Samueli mu bulamu bwae bwoosi, haandi siyabonaho Saulo, ohutusaho engisa nyiingi yamudiira muno hulwa Saulo. Omwaami yeyichulisa muno ohuhola Saulo ohuba omutuki wa Yisiraeli.