Read saamia 1 Samueli 16 Bible Online

1 Samueli 16 - saamia bible

1 Samueli 16

¹Omwaami yaboolera Samueli ati, “Wahachuunirwe Saulo ohwoola liina? Ese ndamala hale ohumujwaang'a ohuba omutuki wa Yisiraeli. Nae bulaanu, bukula amafuta ka olifa mani ochie Bbetilehemu, eyiri omusaacha olwaangwa Yese, olwohuba ndoolere mulala hu baana bae ohuba omutuki.”

²Samueli yamuteeba ati, “Nyala endye ohuhola esiindu sifwaana sityo? Niwiichuhana Saulo yasiwuliraho, achia ohuunjita-bwiita!” Omwaami yakobolamo ati, “Bukula emoosi ochie nayo oboole oti, ‘Njichire ohuyaana esiyaanwa eyiri Omwaami.’

³Chia mani olaange Yese yesi yeeche abeeo n'oyaana esiyaanwa esyo, njia ohuhuboolera esiindu sy'ohuhola. Ochia ohuchuha amafuta hu oyo yi njia ohuhuboolera ohumuchuhaho ohuba omutuki.”

⁴Samueli yahola esyo si Omwaami yamuboleere ohuhola mani n'achia Bbetilehemu. Abeemirisi b'esiko bamubukaanira nibateengereha mani nibateeba bati, “Ewe omuboni, wiichire huno olw'omuleembe kose?”

⁵Samueli yabakobolamo ati, “Njichire olw'omuleembe. Njichire ohuyaanayo esiyaanwa eyiri Omwaami. Mweelabye mani mwiiche huchie.” Haandi yaboolera Yese alala neende abaana bae abasyaani bosi ohweelabya, mani naabalaanga babeeo n'ayaana esiyaanwa esyo.

⁶Ao mani Yese neende abaana bae basyaani niboola, Samueli yabona Eliabbu omwaana wa Yese mani naamuboola ati, “Wuno oweemere ano mu moni w'Omwaami niye oyo yi Omwaami adoolere.”

⁷Nae Omwaami yaboolera Samueli ati, “Otadeeba hu buleeyi bwae oba esiiso syae silai daawe. Ese muhayire, olwohuba haba siheengao koti lu baandu baheengao daawe. Abaandu batingaala emboneha yohumukulu, nae ese tingaala mu mwooyo.”

⁸Ao Yese mani naalaanga Abbinadabbu naamuleeta eyiri Samueli. Samueli n'aboola ati, “Bbe, wuno yesi Omwaami haba s'amudoolere.”

⁹Yese mani naaleeta Saama. Samueli haandi n'aboola ati, “Haba Omwaami s'adoolere wuno yesi.”

¹⁰Yese naaleeta eyiri Samuel abaana bae baandi bataanu-na-babiri. Samueli naamuboolera ati, “Omwaami haba s'adoolere abo daawe.”

¹¹Samueli yateeba Yese ati, “Abaana bao basyaani boosi bali ano?” Yese yakobolamo ati, “Yidoong'ereyo walaka, oli ohwaaya amakoondi.” Samueli naamuboolera ati, “Tuma bamuleete ano. Haba sihuchia huyaanayo ebiyaanwa ohwoola lu anoole.”

¹²Mani Yese n'atuma bachie bamuleete. Omwaana oyo yali ow'esiiso silai, omuraaga ow'obulamu bulai, haandi oli neende emoni ememu. Omwaami yaboolera Samueli ati, “Wuno niye oyo, tulaniramo omuchuheho amafuta!”

¹³Samueli yabukula amafuta ka olifa, naakachuha hu Daudi naali mu moni wa bamwanaang'ina boosi. Esiha syeene esyo, Mwooyo w'Omwaami niyeeha hu Daudi neende amaani, haandi Mwooyo oyo yabechaanga nae ohutula hu ludaalo olwo ohwemeeda mu moni. Ao mani Samueli naakobolayo Rama.

¹⁴Mwooyo w'Omwaami yatula hu Saulo, mani esihyeeno nisimusaandya.

¹⁵Abahalaabani ba Saulo bamuboolera bati, “Efwe humanyire huti esihyeeno nisyo esimusaandya.

¹⁶Mani ewe omuhuluundu weefwe, tulagire efwe abahalaabani bao mani huchia ohukoonya omuundu omanyire ohuubba bulai obuhana. Mani esihyeeno nisinamwiicheho, omuundu oyo anyala ohuubbaannga obuhana bwae mani anyala ohukobola ohuba bulai haandi.”

¹⁷Saulo yalagira abahalaabani bae abo ati, “Muchie munyoolere omuundu onyala ohuubba bulai obuhana mani mumundeetere.”

¹⁸Mulala hu baandu bamuliindaanga yaboola ati, “Yese owomu siko sya Bbetilehemu ali neende omwaana omweembi mulai muno. Haandi w'esinani muno haandi ow'esiiso silai, mulwaani mulai muno, haandi anyala ohulomaloma bulai. Omwaami ali alala nae.”

¹⁹Mani sakira Saulo yatuma bawamwaanda ohuchia eyiri Yese ohuboola bati, “Ndeetere omwaana wao Daudi, omwaayi w'amakoondi oyo.”

²⁰Yese yabukula esuhiri, naayidwiiha emigaati, neende emeeme, neende esikiingiro sy'eseero esichuule efiini, mani naabidiisa omwaana wae Daudi abiyirire Saulo.

²¹Daudi yeecha eyiri Saulo mani naachaaka ohumuhalaabanira. Saulo yaheera Daudi muno mani naamudoola omukiingiraanga ebilwaaniso byae.

²²Mani Saulo n'atuma emboosi eyiri Yese n'aboola ati: “Daudi mufukiriire. Leha adoong'e ano yaahalaabanireenge.”

²³Mani ohutula hu ludaalo olwo, buli lu siyeeno syasaandyaanga Saulo, Daudi yabukulaanga obuhana mani naachaaka ohubuubba. Esihyeeno esyo syatulaanga hu Saulo, naachaaka ohwewulira bulai naaba bulai haandi.