Read saamia 1 Samueli 18 Bible Online

1 Samueli 18 - saamia bible

1 Samueli 18

¹Saulo neende Daudi bamaliirisa embaha yaabwe eyo. Nibamala batyo, Yonatani omwaana wa Saulo yachaaka ohumudaha muno Daudi mani naamuheerera elalira koti lu yali niyeheera omweene.

²Saulo mani naaba neende Daudi ohutula hu ludaalo olwo haandi siyamufukiirira ohukobolayo engo waabwe.

³Yonatani yechuba ohutaao obwiicha butaakama neende Daudi olwohuba yamuheera koti lu yeheera omweene.

⁴Yonatani yefwaalula eganjuula lyae, li yali niyefwaalire mani naaliberesa Daudi, haandi naamuberesa ehuumba yae, neende olugaanga, oluyiingo, neende olusibiro byosi.

⁵Daudi yachichaanga buli abuundu woosi yi Saulo yamutumaanga, haandi yaholaanga buli siindu syoosi bulai. Mani Saulo naamuhola ohuba omuhoongo mu ye lyae. Sino syasangaasa muno abahalaabani ba Saulo boosi neende abaandu boosi.

⁶Ab'amaye nibali nibakobola engo, Daudi naakobola n'amalire ohwiita Goliati, abahasi ohutula mu buli siko mu Yisiraeli baatula erwaanyi ohubukaanira Omutuki Saulo. Bali nibeemba enyembo ch'esangaalo, nibahina, haandi niboobba nyaangili neende amalere.

⁷Olw'ohusangaala huungi, abahasi beemba bati, “Saulo yeetere mu elifu, nae Daudi mu mitwaalo.”

⁸Saulo haba siyasibona bulai, mani n'anyoolera muno. Yaboola ati, “Daudi bamubeerese emitwalo, nae ese baambereese elifu sa. Esidoong'ere nisyo ohumuhola omutuki!”

⁹Ohutula hu ludaalo olwo ohwemeeda mu moni, Saulo yadiirwa ehali-hali muno haandi yachaaka ohubaasira Daudi obubi.

¹⁰Oludaalo lwaloondaho, esihyeeno syechuhana nisimalire ohuniina Saulo, mani n'ahuumulira mu nyuumba yae koti omuundu mulalu. Daudi yali naahubbaanga obuhana bwae, koti lu yaholaanga buli ludaalo, nae Saulo yali naadiirire efumo lyae.

¹¹Saulo yaboola mu mwooyo kwae ati, “Ha fumite Daudi, ndiise neende esida syosi!” Mani naamubbaaya efumo amahabi kabiri maloondehana; nae Daudi niyeebalula buli fumo.

¹²Saulo yatya muno Daudi olwohuba Omwaami yali neende Daudi nae Omwaami yali naatulire hu Saulo.

¹³Mani Saulo yeecha niyeetusa hu Daudi, naamuhola ohuba omuhoongo w'ab'amaye elifu ndala. Daudi yabeemiriraanga mu biita.

¹⁴Buli siindu si Daudi yaholaanga, syamuchiraanga bulai olwohuba Omwaami yalichiingi nae.

¹⁵Saulo niyabona ati buli siindu si Daudi ahola simuchiira bulai, yemeeda muno ohumutya.

¹⁶Nae abaandu boosi mu Yisiraeli neende mu Buyudaaya, badaha Daudi muno olwohuba yali omwiimirisi mulai.

¹⁷Saulo mani naaboolera Daudi ati, “Omwaana waange muhaana muhuluundu Merabbu wuno, njia ohumuhuberesa omudeehye, nae ndaha obecheenge ow'esinani, olwaaneenge ebiita by'Omwaami.” (Saulo yahola sino n'abaasa mu mwooyo kwae ati, mu ngeri Abafilisiti bamwiite nae omweene ataamwiitire daawe.)

¹⁸Daudi yakobolamo ati, “Ese niise wiina, haandi edaala lyeefwe nilyo siina, ohuba omuhwe w'omutuki?”

¹⁹Nae esiha nisyoola Merabbu ohubereswa Daudi, mani naabereswa omusaacha wuundi olaangwa Adirieli Omumeholaati ohuba omuhasi wae.

²⁰Nae Mikaali omwaana wa Saulo, naaheerana neende Daudi. Saulo niyawulira atyo, yasangaala muno.

²¹Saulo mani n'aboola ati: “Ha muberese; njia ohwehoonyera Mikaali koti omuteego eyiri Daudi, Abafilisiti bamulwaanie bamwiite.” Ao mani Saulo naaboolera Daudi ehabi lyohubiri ati: “Ochia ohuba omuhwe waange.”

²²Yalagira abahalaabani bae ohulomaloma neende Daudi mu bweekisi, bamuboolere bati, “Omutuki ahusiimire muno haandi abahalaabani bae boosi bahuheera. Bulaanu esiha sihoyere odeehye omuhaana w'omutuki.”

²³Abahalaabani ba Sauli nibaboolera Daudi batyo, nae yakobolamo ati, “Siindu sy'oluyaali luhoongo muno ohuba omuhwe w'omutuki. Sihira omuundu mumanani haandi otamanyihaane koti ese.”

²⁴Abahalaabani abo mani nibaboolera Saulo bi Daudi yababoolera.

²⁵Saulo yabalagira bachie baboolere Daudi bati: “Omutuki haba s'adaha esiindu siindi syoosi koti eehwe, ohutusaho ebihoba biheberwe hu Abafilisiti bafwiire emia ndala, koti ohwetuunga hu basuku bae.” (Yino niyo engeri yi Saulo yali naabaasa ati Abafilisiti banyala ohwiita Daudi.)

²⁶Abahalaabani ba Saulo mani nibaboolera Daudi ebyo byoosi bi Saulo yali naaboolere, mani Daudi naasangaalira muno esibaaso esy'ohuba omuhwe w'omutuki. Mani oludaalo lw'obweeya nilwali nilutoola,

²⁷Daudi alala neende abasaacha abali nae, n'achia niyeeta Abafilisiti emia chibiri. Daudi mani naayira ebihoba bi yabahebaho eyiri omutuki oyo, mani naabimubalira byoosi, hu anyale ohuba omuhwe wae. Ao mani Saulo naamuberesa Mikaali omuhaana wae ohumudeehera.

²⁸Saulo yamanyira elalira ati Omwaami yali alala neende Daudi, haandi ati, Mikaali, omuhaana wae yali naadaha muno Daudi.

²⁹Ao mani Saulo niyemeeda ohutya muno Daudi, haandi naaba omusuku wa Daudi obulamu bwae bwoosi.

³⁰Amaye k'Abafilisiti kaseetaanga, nae mu buli biita, ebiindu byachiiraanga Daudi bulai ohuhira abahalaabani ba Saulo baandi. Mani eliita lya Daudi nilyemeeda ohufuumuha muno.