Read saamia 1 Samueli 21 Bible Online

1 Samueli 21 - saamia bible

1 Samueli 21

¹Daudi yoola Noobbu, ew'omulaamisi Ahimeleki. Ahimeleki yeecha naateengereha ohubukaanira Daudi mani n'amuteeba ati, “Lwasiina wiichire ano weeng'ene n'otaali neende omuundu yeesi?”

²Daudi yamukobolamo ati, “Siluwo esiindu si mutuki yaandumire ohuhola, haandi yamboleere ati: ‘Otabooleraho omuundu yeesi yaamanya esiindu siaandumire ohuhola.’ Nae ebidiira hu basaacha ba ndi nabo, mbaboleere baambukaane abuundu waandi.

³Mani bulaanu, oliho neende esyohulya siina? Mbeeho emigaati kitaanu, oba esyohulya syoosi sy'oli nasyo.”

⁴Omulaamisi oyo yakobola mu Daudi ati, “Mbulaho emigaati kya buli ludaalo, ndi neende emigaati myoolerefu kyoong'ene; onyala waakibukula nikali mbwe abasaacha b'oli haba sibaakonereho neende abahasi mu ndaalo chibitireo chino.”

⁵Daudi yamukobolamo ati, “Abasaacha ba ndi nabo buli siha beeliindaanga muno, kata hwahaba hu lukeendo lwabuli ludaalo. Nae koti lu huli hu lukeendo lukabuhaane, beriindire bulai muno ohuhiraho koti lu beeliindaanga.”

⁶Mani omulaamisi oyo naaberesa Daudi emigaati myoolerefu ekyo, olwohuba emigaati ki yali naadoong'ereho nakyo kyali ekyo ekyali nikiyaanirwe eyiri Nasaae, ekyali nikitusirwe hu meesa njoolerefu mani nibataao emigaati kyali nikyahoobbwa.

⁷(Omwaayi muhunuufu wa Saulo, olaangwa mbwe Doegi, otula Edomu, yaluwo hu ludaalo olwo, olwohuba yali n'ahoyeere ohwooseresa omuduunga kw'esinadiini.)

⁸Daudi yateeba Ahimeleki ati, “Oliho neende efumo lyoosi, oba olugaanga, lu onyala wambaaho? Haba sibeere neende esiha sy'ohubukula olugaanga lwaange oba esilwaaniso syoosi; olwohuba ebilagiro by'omutuki bikerere ndaabbibbiirihana ndaahaya ohunyoola obweyaango.”

⁹Ahimeleki nae yakobolamo ati, “Ndi neende olugaanga lwali olwa Goliati Omufilisiti, yi weeta mu Hooho lya Ela. Luli emukoongo w'efodi, luboyerwe mu ngubo. N'odaha olwo, luyire olwohuba lubulao oluundi ohutusaho olwo lwoong'ene.” Daudi yaboola ati, “Luumberese otyo. Olwohuba lubulao olugaanga luhira luno abuundu woosi!”

¹⁰Mani Daudi naasiingira hu ludaalo olwo, olwohuba yali naatiire Saulo, mani n'achia eyiri Akiisi omutuki wa Gaati.

¹¹Abahalaabani b'omutuki bamuteeba bati, “Wuno haba siniye Daudi, omutuki w'esyaalo syae? Wuno siniye omusaacha yi bahasi beemba nibahina, nibaboola bati, ‘Saulo yeetere elifu, nae Daudi yeetere emitwaalo.’ ”

¹²Daudi yeyendeherera muno hulw'emboosi echo, mani naachaaka ohutya muno Omutuki Akiisi.

¹³Mani buli lu Daudi yalichiingi aambi nabo, yekadiaanga ohuba omulalu, niyeehola koti omuundu mulalu nibamudiiraanga. Yeyindikaniaanga hu biruwa by'esiko esyo haandi yalehaanga amate nikahulukusa nikeehirira hu sirefu syae.

¹⁴Mani Akiisi naaboolera abahalaabani bae ati, “Bone! Omusaacha wuno mulalu niye! Lwasiina mumuleetere yi ndi?

¹⁵Mubaasa muti mbula abalalu baamala hu mweemeo mundeetere haandi owuundi ohulaluhira mu moni waange haandi neende mu nyuumba yaange?”