Read saamia 1 Samueli 23 Bible Online

1 Samueli 23 - saamia bible

1 Samueli 23

¹Daudi yawulira ati Abafilisiti bali nibaseeta esiko sya Keila haandi bali nibeeba emere yali huyahakeswa.

²Daudi yeteeba hu Omwaami ati, “Njie seete Abafilisiti kose?” Omwaami yakobolamo ati, “Eee. Chia obaseete mani owonie esiko sya Keila.”

³Nae abasaacha bali neende Daudi bamuboolera bati, “Efwe huli neende ohutya muno mu Buyudaaya; nae hunaake yeena ohutya nihunaachie Keila ohulwaania Abafilisiti!”

⁴Ao Daudi niyeteeba hu Omwaami ehabi liindi, mani Omwaami naamuboolera ati, “Chia mani oseete Keila, olwohuba ese mweene njia ohuhuberesa Abafilisiti obayiingire.”

⁵Ao Daudi alala neende abasaacha ba yali nabo nibachia Keila mani nibaseeta Abafilisiti. Beeta Abafilisiti baangi muno haandi nibayaaya ebyaayo byaabwe. Mani eyo niyo engeri yi Daudi yawoneseramo esiko sya Keila.

⁶Abbiataari omwaana wa Ahimeleki niyeeyiba mani yeyambaania hu Daudi mu Keila, yakiinga yaachia neende olusibiro lwomu sibuno.

⁷Ao mani nibaboolera Saulo bati: “Daudi yeechere mu siko sya Keila.” Saulo mani n'aboola ati: “Nasaae amuteere mu bunyala bwae. Daudi omweene yeetekere, koti lu yengiire mu siko sya Keila, esyasitwa neende ebida biriho ebiruwa.”

⁸Saulo mani naalaanga amaye kae kachie kalwaane ebiita, kahuumbe nikachoomere Keila mani bebodoohania Daudi neende abasaacha ba yali nabo boosi.

⁹Daudi niyamanya ati Saulo yali naatekeha ohumuseeta, yaboolera Abbiataari omulaamisi ati, “Leeta esyefwaalo syohu sirifu ano.”

¹⁰Mani Daudi naateeba ati, “Ewe Omwaami Nasaae wa Yisiraeli, mubwadyeeri Saulo ali ohutekehaanga ohwiicha mu Keila, asisihirise esiko hulwaange, ese omuhalaabani wao.

¹¹Haandi mbwe abaandu bomu Keila bachia ohumbwaayo eyiri Saulo? Saulo ali ohwiicha, koti lu mbuliire, kose? Ewe Omwaami, Nasaae wa Yisiraeli, hwekweeda wumbulire!” Omwaami yakobolamo ati, “Saulo achia ohwiicha.”

¹²Daudi yateeba ati, “Mani abaandu bomu Keila ohumbwaayo alala neende abasaacha ba ndi nabo eyiri Saulo?” Omwaami yakobolamo ati, “Eee, bachia ohuhuwaayo.”

¹³Ao mani Daudi alala neende abasaacha ba yali nabo, aboola aambi emia chisaasaba, nibatula mu Keila, nibachaaka ohuyikanaanga. Saulo niyawulira ati Daudi yeruuhe mu ohutula Keila, ao mani naalehana neende endekeha yae ey'ohuseeta esiko esyo.

¹⁴Daudi yadoong'a niyeekisire mu syaalo sy'ebigulu, mu sichiimi siri aambi neende Siifu. Saulo yamukonyaanga buli abuundu, nae Nasaae haba siyakanya ohumuyaanayo mu mahono ka Saulo daawe.

¹⁵Daudi yabona ati, Saulo yali naamukoonya ohumwiita. Daudi yali naali Horeesi, mu sichiimi aambi neende Siifu.

¹⁶Yonatani yachia yi Daudi yali mani naamugumya omwooyo ati Nasaae achia ohumuliinda.

¹⁷Yonatani yaboolera Daudi ati: “Otatya daawe. Saulo laata haba saachia hunyala ohuhuholaho esibi syoosi daawe. Amanyire bulai bweene ati, ewe niiwe ochia ohuba omutuki wa Yisiraeli, haandi ati ese niise ochia ohuhuloondereraho mu bunyala.”

¹⁸Mani boombi nibahola esisuubise syoolerefu esy'obwiicha eyiri buli otula. Daudi yadoong'a Horeesi, nae Yonatani yeekobolerayo engo waabwe.

¹⁹Abaandu baandi ohutula Siifu bachia eyiri Saulo Gibbeya mani nibaboola bati, “Daudi yeekisire mu syaalo syeefwe sya Horeesi hu Lugulu lwa Hakila, emwaalo we'sichiimi sya Yuda.

²⁰Humanyire bulai ewe ow'Oluyaali, koti lu odaha muno ohumudiira; mani yicha mu syaalo syeefwe, huchia ohubona huti omudiira.”

²¹Saulo yabakobolamo ati, “Leha Omwaami ababerese ehabi olwohundiirira esisa mutyo!

²²Muchie haandi mwehaliirise bulai; mwomiisire elalira abuundu yaali haandi neende oyo owamubonayo. Olwohuba mukalaangatanu muno.

²³Manyire elalira yi beekisaanga, haandi bone muti muungobosera emboosi ano bwaangu. Ao niwo yi syesi njia ohuchia naang'we, mani naaba n'asisiiri mu syaalo omwo, njia ohumukiiya, kata ayahaba mbwe njia ohumukiiya mu syaalo sya Buyudaaya syoosi, esyo njia ohusihola.”

²⁴Mani nibasiingira nibakobola Siifu, ohutaangiriramo Saulo. Daudi neende abasaacha ba yali nabo, bali mu sichiimi sya Maoni, mu hooho libulamo abaandu eliri emwaalo we'sichiimi sya Buyudaaya.

²⁵Saulo neende abasaacha bae mani nibachia ohukiiya Daudi, nae Daudi niyawulira atyo, yachia hu sigulu sy'enyaanda mu siparara sya Maoni mani naaba eyo. Saulo yesi niyawulira atyo, yemeeda ohukiiya Daudi mu sichiimi sya Maoni.

²⁶Saulo neende abasaacha bae bali hu lawaande lulala lw'esigulu esyo, nae Daudi neende abasaacha ba yali nabo bali hu lawaande luundi lw'esigulu esyo. Bali nibaanguyaho bwaangu ohweeyiba hu Saulo neende abasaacha bae, abali nibabebodoohania nibali aambi ohubawaamba.

²⁷Nae ebiha byeene ebyo, wamwaanda wuundi niyoola mani naaboolera Saulo ati, “Yaanguwaho okobole! Abafilisiti mbano baseetere esyaalo syao!”

²⁸Mani Saulo naalehera ao ohukiiya Daudi, nae naachia ohulwaania Abafilisiti. Mani sakira abuundu ao alaangwa ati, Esigulu Sikabuhania.

²⁹Daudi mani naatulao naachia mu syaalo sya Engedi, yi yamenya niyeekisire.