Read saamia 1 Samueli 24 Bible Online

1 Samueli 24 - saamia bible

1 Samueli 24

¹Saulo niyakobola naatula ohulwaania Abafilisiti, bamuboolera bati, Daudi yali naali mu sichiimi aambi neende Engedi.

²Saulo yabukula ab'amaye bahiramo obulai mu Yisiraeli elifu chidatu (3,000), mani naachia ohukoonya Daudi neende abasaacha bae ebukwe w'Enyanda ch'Embusi Chomu siino.

³Saulo yoola hu ng'uungu yiri aambi neende ebidwooli by'amakoondi ebiri hu ndulo w'engira, mani naakabuha ohwehoonya. Daudi neende abasaacha bali nae bali nibeekisire ematyeelo w'eng'uungu eyo.

⁴Abasaacha bali neende Daudi bamuboolera bati, “Yino niyo ehabi yao yeene! Luno nilwo oludaalo lu Omwaami yahweekesaho ati achia ohuta omusuku wao mu bunyala bwao, mani ohumuhola koti lu odaha.” Daudi yaafula yasuda aambi bweene neende Saulo, mani n'aheenga esicheere hu byefwaalo bya Saulo, Saulo n'atasimanyireho daawe.

⁵Nae luunyuma, Daudi yachaaka ohuwulira bubi muno mu mwooyo,

⁶mani naaboolera abasaacha bali nae ati, “Omwaami ahoya yangayira ohuholaho esibi syoosi hu mwaami waange, yi Omwaami yadoola ohuba omutuki! Haba tamunyaalaho kata nabudiidi, olwohuba oyo niye omutuki yi Omwaami yadoola!”

⁷Daudi mani naakayira abasaacha ohutaseeta Saulo bamuholeho esyonoono daawe. Saulo yasiingira mani naatula mu ng'uungu, mani niyeweerao.

⁸Luunyuma Daudi yesi yatula mu ng'uungu mani naalaanga Saulo naamuboolera ati, “Ewe ow'Oluyaali!” Saulo yakaluuhana, mani Daudi niyenama aasi hu loba naamwiisamo oluyaali

⁹mani naateeba ati, “Lwasiina otekeeresa bi baandu bahuboolera bati ngiiya ohuhunyaala?

¹⁰Ewe bulaanu weboneraho omweene oti bulaanu buti mu ng'uungu muno, Omwaami abeere amalire ohuhuta mu bunyala bwaange. Abasaacha baange baandi babeere nibambooleere bati hwiite, nae ese hukwiriire esisa, mani ndaboola endi haba siinjia ohuhunyaalaho daawe, olwohuba ewe niiwe yi Omwaami yadoola ohuba omutuki.

¹¹Bona laata, bona esicheere sy'ebyefwaalo byao si ndiirire sino! Mba hwiitire hale, nae bona heengere esicheere sino syoong'ene hu byefwaalo byao. Esiholwa sino sihoyere si hweekesa siti mbulahoomo esibaaso syohuhujeemera daawe. Ewe oli ohungiiyaanga buli y'ochiira oti wuunjite, kata ese nitaaliho neende esiindu sibi syoosi si huholere daawe.

¹²Omwaami ahoya omweene yatuheengerao oli mu sibi! Ahoya yahusaandya hulw'ebiholwa by'oli ohuuhola, olwohuba ese haba siinjia huhunyaalaho kata nabudiidi.

¹³Omanyire bulai olukaado lu bahale bakaada bati, ‘Omubi yeeng'ene niye ohola esibi.’ Mani ese haba siinjia huhuholaho esibi syoosi daawe.

¹⁴Ewe omutuki wa Yisiraeli, wiina y'oteemaho ohwiita? Wiina y'oli ohukiiyaanga? Okiiya embwa yifwiire, oba esikoroomboto?

¹⁵Omwaami mweene achia ohuheenga omusaango, haandi omweene niye ochia ohuheengao omusaango kweefwe, ese naawe, wiina mweene oli mu sibi. Leha omweene atingaale mu bidinyu byeefwe, yaangayirire, mani yaanjabiine ohutula mu mahono kao.”

¹⁶Daudi niyamala ohulomaloma atyo, Saulo yateeba ati, “Mubwadyeeri bweene, ewe niiwe Daudi mwaana waange?” Mani yaatuunduha ohulira.

¹⁷Saulo mani n'aboola Daudi ati, “Ewe oli owadyeeri, nae ese niise omudoondobanu. Ewe wahaba omulai muno yi ndi, nae ese ndahahuhola ebibi muno!

¹⁸Nyaanga yino, wekeseere elalira koti lu wuundaha muno, olwohuba haba siwuunjitire daawe, kata ayahaba mbwe Omwaami abeere naandeere mu bunyala bwao.

¹⁹Mahabi kaanga ka muundu yahadiira omusuku wae mani yamulehuula yawaao nisibulao esiindu syoosi syamuholere? Leha Omwaami ahube ehabi hulw'esiindu si wuholeere enyaanga yino!

²⁰Bulaanu manyiire elalira endi ndi ochia ohuba omutuki wa Yisiraeli haandi endi obutuki obwo buchia ohuchiiririra esiha sileeyi muno n'oli omutuki.

²¹Nae bulaanu ndeechubire mu liita ly'Omwaami oti haba soochia husihirisa abeechuhulu baange, mani eliita lyaange lihaye ohwiibirirwa endaalo choosi pe.”

²²Daudi mani naasuubisa Saulo atyo. Mani Saulo naakobolayo engo wae, nae Daudi neende abasaacha ba yali nabo nibakobolayo abuundu yi bali nibeekisire.