Read saamia 1 Samueli 26 Bible Online

1 Samueli 26 - saamia bible

1 Samueli 26

¹Abasaacha baandi ba Siifu beecha eyiri Saulo mu Gibbeya mani nibamuboolera bati Daudi yali niyeekisire hu Sigulu sya Hakila, hu ndulo w'esichiimi sya Buyudaaya.

²Saulo yasiingira yaachia mu sichiimi sya Sifu neende ab'amaye bahiramo obulai mu Yisiraeli elifu chidatu (3,000) ohukiiya Daudi.

³Saulo yoombaha ekaambi aambi neende hu ngira yiri hu Sigulu sya Hakila. Daudi nae yali n'asisiiri mu sichiimi esyo, mani niyamanya ati Saulo niyoolere mu siparara ohumukiiya,

⁴yatuma abahemeresi bamanya bulai ebweene bati Saulo yali naaliwo.

⁵Ao mani Daudi n'asiingiriramo naachia abuundu bweene yi Saulo neende Abbuneeri omwaana wa Neeri, omuhoongo w'eye lya Saulo bali nibeyaliise. Saulo yali niyeyaliise mu kaambi bweene, nae abaandu bae nibamweebodohanie erwaanyi w'ekaambi.

⁶Mani Daudi naateeba Ahimeleki Omuhiiti, neende Abbisai mwanaang'ina Yoabbu (ng'inaabwe yali Seruya) ati, “Wiina mweene hweeng'we babiri ochia ohuchia naange eyiri ekaambi ya Saulo?” Abbisai yakobolamo ati, “Ese niise ochia ohuchia naawe.”

⁷Mani esiro esyo, Daudi neende Abbisai bachia beengira mu kaambi ya Saulo mani nibakaana Saulo niyeyaliise akatikaati w'ekaambi, efumo lyae nilichomeehwe mu loba enamutwe wae. Abbuneeri alala neende abalwaani bali nibeyaliise nibamweebodohaanie.

⁸Abbisai yaboolera Daudi ati, “Nasaae ateere omusuku wao mu bunyala bwao esiro sino. Bulaanu leha mufumite neende efumo lyae lyeene ehabi lala lyoong'ene, haba siinjia humufumita amahabi kabiri daawe.”

⁹Nae Daudi yaboolera Abbisai ati, “Otamunyaalaho kata nabudiidi! Mubwadyeeri bweene, Omwaami achia ohusaandya oyo yeesi owuholaho esibi hu omutuki yi yadoola.”

¹⁰Daudi haandi yaboola ati, “Koti lu Nasaae ali omulamu, Omwaami mweene niye ochia ohwiita Saulo, oba esiha syae syeene nisyoolere esy'ohufwa oluumbe lwa buli nyaanga, oba yahache mu biita mani n'afwiirayo.

¹¹Omwaami ahoya yaangayira ohuhola esibi hu muundu yi Omwaami yahola ohuba omutuki! Leha hubukule efumo lyae neende enjaagi y'amaachi lyae, mani hweweereo.”

¹²Mani Daudi n'abukula efumo elyo, neende enjaagi y'amaachi ebyali enamutwe wa Saulo, mani niyeweerao alala neende Abbisai. Abulao omuundu yeesi owababonaho, oba owamanyaho esyo syoosi esyali nisiholehaane, oba kata owasimuhaho daawe, olwohuba Omwaami niye owali naabatumiire endoolo ch'amaani muno hu buli muundu yeesi.

¹³Mani Daudi niyaambuha engereha w'ehooho elyo ohwoola aakulu w'esigulu esyo, niyeemaho eyale nabo.

¹⁴Yahuumulira mu kono ly'aakulu eyiri ab'amaye ba Saulo neende eyiri Abbuneeri ati, “Ewe Abbuneeri! Oli ohuumbulira, kose?” Abbuneeri yateeba ati, “Oyo niye wiina oli ohwehuumanga haandi oli ohusimusa omutuki?”

¹⁵Daudi yakobolamo ati, “Abbuneeri, ewe haba siniiwe omuhoongo ohiramo mu Yisiraeli? Mani lwasiina s'oliindire omwaami wao, omutuki? Aliwo omuundu owaheengira mu kaambi buti ohwiita omwaami wao.

¹⁶Ewe Abbuneeri, ohayiswe ohwooseresa omulimo kwao! Ndeechuba eyiri Omwaami mulamu endi eng'we mweesi muhoyeere ohufwa, olwohuba bibahaire ohuliinda omuhoongo weeng'we, yi Omwaami mweene yahola ohuba omutuki. Bone! Efumo ly'Omutuki weeng'we liri yeena? Enjaagi y'amaachi yae yibeere enamutwe wae yiri yeena?”

¹⁷Saulo mani naamanyirisa ati elyo kono lya Daudi, mani naateeba ati, “Elyo kono lyao, Daudi mwaana waange?” Daudi yakobolamo ati, “Eee, Ewe Ow'oluyaali.”

¹⁸Daudi haandi naateeba ati, “Ewe omuhuluundu waange, lwasiina osikiiyaanga omuhalaabani wao? Holere siina syeene? Musaango siina ku holere?

¹⁹Ewe ow'Oluyaali, tekeeresa owulire si mboola. Nikali mbwe Omwaami niye oli ohuhungaluuhaniaho, esiyaanwa syali sichia ohukaluuhania ebibaaso byae. Nae nikali mbwe abaandu baandi sa nibo abahola batyo, esibwaabo sy'Omwaami sihoya syabakwaaho. Olwohuba nibo ababa nibaanjirusa ohutula mu syaalo sy'Omwaami, ndaachia mu syaalo si nyinamira banasaae bateende boong'ene.

²⁰Mani otakanya ndeeterwa mu syaalo siteende daawe, si Omwaami ataalimo daawe. Lwasiina omutuki wa Yisiraeli yeecha ohukiiya ohwiita ese oli sa koti esikoroomboto? Lwasiina oli ohunyiima koti eyoni lyomu siino?”

²¹Saulo yakobolamo ati, “Niise owonoona. Daudi mwaana waange, kobola! Haba siinjia ohwemeeda ohuhunyaala daawe, olwohuba ewe owoniisye obulamu bwaange haandi esiro sy'olwaleero luno. Mubwadyeeri mbeere omusiru! Holere esiindu sibi muno!”

²²Daudi yakobolamo ati, “Efumo lyao ndino ewe ow'Oluyaali. Leha mulala hu basaacha bao yeeche alyeende.

²³Omwaami atungaanga buli muundu ohweema hu bweesikwa bwae neende obuluungifu bwae. Nyaanga yino, Omwaami abeere ateere obulamu bwao mu bunyala bwaange, nae ndaahaya-buhaya ohuhunyaala daawe, ewe yi Omwaami yahola ohuba omutuki.

²⁴Mani koti lu ndehere obulamu bwao enyaanga yino, Omwaami yesi ahoya yaahola yaawonia obulamu bwaange, mani yamonia ebidinyu byoosi!”

²⁵Saulo yaboolera Daudi ati, “Nasaae ahoya yaahuba ehabi, mwaana waange ewe!” Ao Daudi mani niyeweerao, nae Saulo yesi naakobola engo wae.