Read saamia 1 Samueli 29 Bible Online

1 Samueli 29 - saamia bible

1 Samueli 29

¹Abafilisiti babuusira alala amaye kaabwe koosi mu Afeki, nae Abaisiraeli boombaha ekaambi yaabwe hu sulo yomu Hooho lya Yesireeli.

²Abatuki b'Abafilisiti bataanu bahuumba nibabitaao mu mikaanda ky'abasaacha emia-emia neende elifu-elifu. Daudi neende abasaacha ba yali nabo bosi bahuumbira enyuma alala neende Omutuki Akiisi.

³Abeemeresi b'Abafilisiti bababona mani baabateeba bati, “Abaibburania bano bali ohuhola siina ano?” Akiisi yakobola mu bahulira abo ati, “Wuno niye Daudi, omuhalaabani wa Saulo omutuki wa Yisiraeli. Abeere naange bulaanu ohumala embaka ndeeyi hooho. Sibulao esibi syoosi si mubweeneho daawe, ohutula hu ludaalo lu yeechera yi ndi.”

⁴Nae abeemeresi b'amaye k'Abafilisiti nibanyoolerera Akiisi muno, nibamuboolera bati, “Lagira omusaacha wuno akoboleyo mu siko siwamuberesa. Otamufukiirira yaachia naafwe mu biita daawe; olwohuba anyala ohutwekaluuhanira nihuli ohulwaana. Naluundi omusaacha wuno anyala ohukwa alala neende omwaami wae yeeta ab'amaye beefwe?

⁵Wuno haba siniye Daudi, oyo yi bahasi beembaanga nibahina nibaboola bati, ‘Saulo yeetere elifu, nae Daudi yeetere emitwaalo.’ ”

⁶Akiisi yalaanga Daudi mani naamuboolera ati, “Ese ndeechuba neende Nasaae mulamu wa Yisiraeli endi ewe obeere omutiiririrwa muno yi ndi; mani ese mbeere sangaalire muno ohubona endi ochia naange hulwaane mu biita bino. Sisiiri ohuhubonaho esibi syoosi daawe, ohutulira elalira hu ludaalo lu weechera yi ndi. Nae abatuki baandi haba sibahudaha daawe.

⁷Bulaanu kobolayo engo wao mu muleembe, mani otaholaho esiindu syoosi esinyala syaabanyoolesa daawe.”

⁸Daudi yakobolamo ati, “Holere esibi, ewe omuhuluundu? Nikali oli ohuboola oti, otambonaho esibi syoosi ohutula hu ludaalo lu ndachaakiraho ohuhuhalaabaniraanga, siina syeene esiingayira ohuchia naawe, ndaalwaania abasuku bao, ewe omwaami waange haandi omutuki waange?”

⁹Akiisi yakobola mu Daudi ati, “Manyire koti lu oli omulai yi ndi, oli omuwulisi koti malaika wa Nasaae. Nae abatuki baandi bala baboolere bati haba s'ohoyera ohuchia naafwe mu biita daawe.

¹⁰Mani sakira, muchuli echuli, ewe Daudi neende abahalaabani b'omwaami wao, ba weecha nabo, muchia ohusimuha echuli, mani muweeo bwaangu muno obwiire nibutaahya.”

¹¹Ao mani Daudi neende abasaacha ba yali nabo nibasimuha echuli, nibawuuna ohukobolayo mu syaalo sy'Abafilisiti. Mano Abafilisiti nibachia Yesireeli.