Read saamia 1 Samueli 3 Bible Online

1 Samueli 3 - saamia bible

1 Samueli 3

¹Ao omwaana Samueli yali ahalaabanira Omwaami naali aasi w'obunyala bwa Eli. Mu ndaalo echo, Omwaami siyaheera ohulomaloma neende abaandu oba ohubabonehera.

²Mani mu siro siindi, Eli owali naatabona bulai olwohuba emoni chae chali aambi ohuwofula, yali niyeyaliise mu siseenge syae syeene.

³Samueli nae yali naakonere Abuundu Woolerefu, yi Esanduuku ly'Endagaano lyali. Obwiire bwali nibutamuuhana, etaara nilisyaaduha

⁴Omwaami yalaanga Samueli. Samueli yakobolamo ati, “Ndiwo omuhuluundu!”

⁵Mani niyeeruha n'achia eyiri Eli n'aboola ati, “Mbano nduwo, olwohuba wunaangire.” Eli naakobolamo ati, “Haba sihulaangire daawe; kobolerayo weyalise.” Samueli naakobolerayo mani niyeyalisa.

⁶Haandi Omwaami naalaanga Samueli ehabi liindi. Samueli yali n'asisiiri ohumanya ati Omwaami niye owali naamulaanga, olwohuba Omwaami yali n'asisiiri ohulomaloma nae. Samueli mani naasimuha n'achia eyiri Eli, n'aboola ati, “Mbano nduwo, olwohuba wuunangire.” Nae Eli yakobolamo ati, “Mwaana waange, haba sihulaangire daawe, kobolayo weyalise.”

⁷Bulaanu Samueli yali n'asisiiri ohumanya Omwaami haandi Omwaami yali n'asisiiri ohulomalomaho neende Samueli daawe.

⁸Omwaami haandi naalaanga Samueli ehabi lyohudatu; Samueli yasiingira mani naachia eyiri Eli, n'aboola ati, “Wuunaangire, mani mbano nduwo.” Eli bulaanu naamanya ati Omwaami niye owali naalaangaanga omwaana wuno,

⁹mani naaboolera Samueli ati, “Kobolayo weyalise, nae naahulaanga haandi, boola oti, ‘Omwaami lomaloma, omuhalaabani wao awulira.’ ” Samueli mani n'akobolayo niyeyalisa.

¹⁰Omwaami yeecha mani niyeema ao, mani naalaanga koti lu yali naaholere hale ati, “Samueli! Samueli!” Samueli naakobolamo ati, “Lomaloma, omuhalaabani wao awulira.”

¹¹Omwaami yaboolera Samueli ati, “Njia ohuhola esiindu hu baandu ba Yisiraeli bano, esy'amatiichasi si buli muundu ochia ohusiwulira yahawukeho sa.

¹²Hu ludaalo olwo, njia ohwooseresa ebyo byoosi bi ndalomaloma ebidiira hu bomu nyuumba ya Eli, ohutulira elalira hu njaako ohwoolera hu njakamo.

¹³Ndamala ohumuboolera endi njia ohusaandya abomu nyuumba yae endaalo choosi pe, olwohuba abaana bae baanomanomaho ebiindu bibi. Eli yali n'amanyire sino, nae naahaya ohubaakamia.

¹⁴Mani maliriire ohulaangirira eyiri abomu nyuumba ya Eli endi sibulao esiyaanwa syoosi oba esisaambwa syoosi esichia ohumalao ebiholwa bituunga esyonoono syamatiichasi sino.”

¹⁵Samueli yadoong'a mu buliri ohwoola lu bwahya echuli; mani naasiingira niyeekulao emilyaango ky'enyuumba y'Omwaami. Yali naatiire ohuboolera Eli ebidiira hu ohuboneherwa huno.

¹⁶Nae Eli yeecha yamulaanga ati, “Samueli, mwaana waange!” Samueli yamukobolamo ati, “Ndiwo, omuhuluundu.”

¹⁷Eli yamuteeba ati, “Omwaami ahubooleere siina? Otaangisaho esiindu syoosi daawe. Nasaae achia ohuhusaandya muno n'otamboola buli siindu.”

¹⁸Mani Samueli naaboolera Eli buli siindu syoosi; haba siyamukisaho esiindu syoosi daawe. Eli yaboola ati, “Omwaami niye; leha ahole koti lu asiima.”

¹⁹Samueli mani naahula, haandi Omwaami naaba alala nae. Omwaami naatakanya emboosi chae kata ndala yoong'ene ohuhaya ohwoolerera.

²⁰Ao mani abaandu boosi ba Yisiraeli, ohutula hu lwaande lw'esyaalo lulala ohwoola hu luundi, bamanya bati Samueli yali omunabbi w'Omwaami wadyeeri.

²¹Omwaami yemeeda ohumubonehera mu Silo, yi yali niyabonehera Samueli haandi naalomaloma nae. Mani Samuel buli si yalomalomaanga, Abaisiraeli boosi basiwuliraanga.