Read saamia 1 Samueli 30 Bible Online

1 Samueli 30 - saamia bible

1 Samueli 30

¹Endaalo chibiri nichabitao, Daudi neende abasaacha bae mani niboola Sikilaagi. Abamaleki bali nibayaayire esituundu sy'emwaalo wa Buyudaaya haandi nibaseetere Sikilaagi. Bali nibasaambire esiko esyo nisiwereere aasi

²haandi nibawaambire abahasi boosi, neende buli muundu walimo. Nae haba sibeetaho omuundu yeesi daawe, nae bawaamba sa mani nibawaao.

³Daudi neende abasaacha ba yali nabo niboola, banyoola esiko esyo nisisaambirwe nisiwereere aasi, neende abahasi baabwe, abaana baabwe basyaani, neende abaana baabwe bahaana, nibawaambirwe nibayirirwe.

⁴Daudi neende abasaacha ba yali nabo batuunduha ohulira amasika, mani nibahaya ohuwuleera ohwoola lu baweeramo elalira amaani k'ohulira.

⁵Abahasi ba Daudi boombi, Ahinoamu neende Abbigaili, bosi bali nibayirirwe.

⁶Engisa nyiingi muno yadiira Daudi, olwohuba abasaacha bae boosi bali nibanyoleere muno olwohuyirwa hw'abaana baabwe. Mani abaandu boosi nibadaha ohumuhuya amakina. Nae Omwaami Nasaae wae naamugumya omwooyo.

⁷Daudi yaboolera Abbiataari omulaamisi, omwaana wa Ahimeleki ati, “Ndeetere ano ‘efodi.’ ” Mani Abbiataari naaleeta efodi eyiri Daudi.

⁸Daudi yateeba Omwaami ati, “Noonde hu banyaka abo kose? Mani ndabadiire kose?” Omwaami yamukobolamo ati, “Ewe baloondeho; ochia ohubadiira haandi owabine abawaambe abo.”

⁹Mani Daudi alala neende abasaacha bae emia chisaasaba (600) nibabaloondaho, niboola hu haalo Bbesoori, abaandi hu abo nibadoong'a abweene ao.

¹⁰Daudi mani niyemeedayo neende abasaacha emia chine (400); abaandi bala abasaacha emia chibiri (200) bali nibajoong'ere nibatahanyala ohwaambuha ahaalo aho, mani nibadoong'a enyuma.

¹¹Abasaacha bali neende Daudi banyoola Omumisiri muraaga naang'alaalaanga mani nibamuleeta eyiri Daudi. Bamuberesa ebyohulya mani naalya haandi nibamuberesa amaachi naang'wa.

¹²Haandi bamuberesa enduli chooma, neende ebyaaku bibiri eby'emisabbiibbu. Niyamala ohulya, amaani kamukobolamo; olwohuba yali n'ataliireho esiindu syoosi, kata ohung'waaho esiindu syoosi ohumala endaalo chidatu.

¹³Daudi yamuteeba ati, “Omwaami wao niye naanu, haandi otula yeena bweene?” Yakobolamo ati, “Ese ndi Omumisiri, omuwaambe wa Omumaleki. Omwaami waange yaandeha ano endaalo chidatu chibitireo olwohuba ese ndali omulwaae.

¹⁴Hwali nihunyakire esituundu sy'Abakereti esiri emwaalo wa Buyudaaya, neende mu situundu sy'enono ya Kalebbu, haandi nihusaambire esiko sya Sikilaagi.”

¹⁵Daudi yamuteeba ati, “Onyala waanjira eyiri abanyaka abo?” Nae yakobolamo ati, “Wechube eyiri Nasaae oti haba soochia hunjiita oba wambwaayo eyiri omwaami waange, ao mani njia ohuhuyira hwoose eyiri abanyaka abo.”

¹⁶Mani naayira Daudi eyiri abanyaka abo. Niyamwoosayo, mani nibanyoola abanyaka nibasalaniire buli abuundu, nibali ohulya, ohung'wa, haandi nibasangaalire muno, olwohuba bali nibanyakire mu syaalo sy'Abafilisiti neende mu Buyudaaya ebiindu biingi muno.

¹⁷Mu mabwiibwi hu ludaalo luloondaho, Daudi yabaseeta mani n'abalwaania ohwoola engoloobe. Mani abulao omuundu kata mulala owawonao, ohutusaho abaraaga emia chine (400), abali nibali hu ngamia abeeruha bawaao.

¹⁸Daudi yaabina buli muundu neende buli siindu bi Abamaleki bali nibanyakire, omwo nimwo omwaali abahasi bae boombi.

¹⁹Sibulao esiindu syaabwe syoosi esyakotaho daawe. Daudi yakobosa abasyaani neende abahaana b'abasaacha ba yali nabo boosi, haandi neende ebyanyakwa byoosi bi Abamaleki bali nibayirire.

²⁰Daudi haandi yaabina ebyaayo byoosi neende eng'oombe choosi. Abasaacha bae niboobba ebyaayo ebyo nibabimiisemo, nabo nibaloondaho nibaboola bati: “Bino byoosi bya Daudi.”

²¹Daudi mani naakobolayo eyiri abasaacha emia chibiri (200) abali nibajoong'ere muno nibatanyala ohuchia nae mani nibadoong'a hu haalo ha Bbesoori. Batulayo mani nibeecha ohubukaanana neende Daudi neende abasaacha bali nae. Daudi niyoola yi bali yabaheesa bulai niyeehoya.

²²Nae abasaacha baandi abeemani haandi abataali neende obuhoonyi abali nibachiire neende Daudi baboola bati, “Abo bahayire ohuchia naafwe, mani haba sihuchia hubakabaho ebiindu bi huyaayire bino daawe. Banyala babukula abahasi baabwe alala neende abaana baabwe boong'ene mani beweerao.”

²³Nae Daudi yakobolamo ati, “Basyaange, haba simunyala ohuhola esiindu sifwaana sityo neende ebiindu bi Omwaami atubereese! Niye otuliindire bulai, mani yakera hwayiingira abanyaka abo.

²⁴Abulao omuundu yeesi onyala ohufukiirisania neende bi muboola daawe! Abaandu bahoyere ohukabana ebyaakanilira: oyo owadoong'a enyuma n'aliindire eby'ohwehoonyera, yesi achia ohunyoola omukabo kwaakana neende oyo owachia mu biita.”

²⁵Ohutula hu ludaalo olwo, Daudi yalihola elako, mani li loondwaanga mu Yisiraeli ohwoola buti.

²⁶Mani Daudi niyakobola Sikilaagi, yayirira abeecha bae, abeemirisi ba Buyudaaya esituundu sy'ebipeeye, n'aboola ati, “Sino nisyo esirabo si mbabereese hu biindu bi hwapeeya ohutula hu basuku b'Omwaami.”

²⁷Yasitumira abaandu ba Bbeteli, neende aba Rama mu situundu sy'emwaalo sya Buyudaaya, neende abaandu bomu biko bya Yatiiri,

²⁸Aroeri, Sifimooti, Esitemoa,

²⁹neende Rakali; neende ab'enono ya Yerahimeeli, neende eyiri Abakeeni,

³⁰haandi neende eyiri abaandu bomu biko bya Horima, Bborasaani, Ataaki,

³¹neende Hebburoni. Yasiyiraanga abuundu woosi yi Daudi neende abasaacha bae bali nibakeendera-keenderaanga.