Read saamia 1 Samueli 9 Bible Online

1 Samueli 9 - saamia bible

1 Samueli 9

¹Yaluwo omusaacha muyiinda haandi omanyihaane, olaangwa Kisi ohutula mu nono ya Bbenjamini. Kisi yali omwaana wa Abbieli. Abbieli yali omwaana wa Serori, Serori yali omwaana wa Bbekorati, ow'enyuumba ya Afia.

²Kisi yali neende omwaana omusyaani olaangwa Saulo, owali omuundu oboneha bulai haandi naali omuraaga. Saulo yali omuleeyi muno ohuhira Abaisiraeli badoong'ereo boosi, haandi naabahira boosi ohuboneha bulai.

³Ao mani esuhiri chiindi cha Kisi chakota, mani Kisi naaboolera Saulo ati, “Bukula mulala hu bahalaabani b'oli nabo ochie okoonye esuhiri echo.”

⁴Mani nibachia nibabita mu syaalo sy'ebigulu esya Efuraimu, haandi naabita neende mu syaalo sya Salisa, nae haba sibachinyoola. Mani nibabita mu syaalo sy'ebigulu sy'Efuraimu haandi nibabita mu situundu sya Salimu, nae esuhiri haba sibachinyoolayo daawe. Ao mani nibabita mu situundu sya Bbenjamini, nae haba sibachinyoola daawe.

⁵Nae nibeecha mu situundu sya Suufi, Saulo yaboolera omuhalaabani wae ati, “Leha hukoboleyo engo, ataali ao, laata achia ohwaakama ohubaasa hu suhiri achaake ohwelalihirira ebidiira hweefwe.”

⁶Omuhalaabani oyo yakobolamo ati, “Liindaho mberi! Mu siko muno mulimo omusaacha mwoolerefu, owiiswamo oluyaali muno olwohuba buli siindu sy'aboola syoolerera abweene. Leha huchie yi ali, awuundi anyala ohutuboolera abuundu yi hunyala ohwakaana esuhiri echo.”

⁷Saulo yateeba omuhalaabani wae ati, “Nihuchia yi ali, hunamuberesa siina syeene? Ebikiingiro byeefwe biweeremo ebyohulya, haandi hubula esiindi syoosi si hunyala ohumuberesa. Huliho neende siina syeene?”

⁸Omuhalaabani oyo yakobolamo ati, “Ese ndi neende etoongolo ly'efeesa ediidi lala. Nyala ndaamuberesa elyo, mani achia ohutuboolera abuundu yi hunyala ohuchinyoola.”

⁹Saulo yakobolamo ati, “Oteesere bulai! Leha huchie.” Ao mani nibachia yi musaacha mwoolerefu yamenya.

¹⁰Nibali hu baniina esigulu ohuchia mu siko esyo, babukaanana neende abahaana nibachia hu mwaalo.

¹¹Bateeba abahaana bano bati, “Omuboni ali mu siko?” (Ebiha ebyo, omunabbi yali naalaangwa omuboni, mani omuundu yeesi owadahaanga ohweteeba hu Nasaae, bamubooleraanga bati, “Leha huchie eyiri omuboni.”)

¹²Abahaana babakobolamo bati, “Eee alimo, haandi nguyo ali sa mu moni weeng'we. Nimwaalalaho, muchia ohumunyoola. Nimwiingira mu siko sa muti, muchia ohumunyoola. Yoolere mu siko enyaanga yino, olwohuba abaandu bali ohuchia ohuyaana ebiyaanwa hu alutaari hu sigulu.

¹³Abaandu balaange haba sibachia ohuchaaka ohulya n'asisiiri ohwoolayo, olwohuba ahoyere mberi ohuberesa ebiyaanwa ehabi. Nimuchia buti, muchia ohumunyoola n'asisiiri ohuchia hu sigulu ohulya.”

¹⁴Mani Saulo neende omuhalaabani wae bemeeda ohuchia mu siko, mani nibali hu beengira sa bati, babona Samueli naatula niyeecha yi bali, naali ohuchia abuundu wohwiinamiramo.

¹⁵Bulaanu nilusidoong'ereyo oludaalo lulala Saulo yeeche, Omwaami yali naaboolere Samueli ati,

¹⁶“Muchuli, esiha koti siti, njia ohuhutumira omusaacha ohutula mu nono ya Bbenjamini. Onamuchuheho amafuta abe omwimirisi w'abaandu baange, Abaisiraeli. Niye ochia ohubanunula ohutula mu bunyala bw'Abafilisiti. Mbweene ohusaanda hw'abaandu baange, haandi mbuliire amaliro kaabwe nibadaha obuhoonyi.”

¹⁷Samueli niyabona Saulo, Omwaami yamuboolera ati, “Wuno niye omusaacha yi hubolereengeho. Oyo niye ochia ohutuka abaandu baange.”

¹⁸Saulo yachia eyiri Samueli, owali niyeemere aambi neende esiruwa, mani n'amuteeba ati, “Mboolereho, ‘omuboni’ yamenya yeena?”

¹⁹Samueli yamukobolamo ati, “Niise omuboni. Nyimiriremo huchie abuundu wohwiinamiramo. Eng'we mweembi muhoyere ohulya naange enyaanga yino. Muchuli echuli, njia ohubakobolamo buli siteebo syeeng'we, mani mbaseebule muweeo.

²⁰Nae ebidiira hu suhiri chali nichikotere endaalo chidatu chibitireo, mutachelalihirira daawe; bamalire ohuchakaana. Nae wiina mweene yi Abaisiraeli badaha muno? Niye ewe, ewe neende edaala lya lataao lyoosi.”

²¹Saulo yakobolamo ati, “Ese ndi ow'enono ya Bbenjamini, enono yihiramo obudiidi mu Yisiraeli, haandi edaala lyeefwe nilyo elihiramo obudiidi mu nono yino. Siina syeene esikera n'olomaloma naange otyo?”

²²Ao mani Samueli naayira Saulo neende omuhalaabani wae, naabengisa mu siseenge sihoongo, naabehasa mu bwiihalo bwomu moni w'emeesa alala neende abakeni balaange, abali boola aambi amahumi kadatu.

²³Samueli yaboolera omudeehi ati, “Leeta enyama yi hubereese, yi huboolere ohukabula oyibiihe.”

²⁴Mani omudeehi oyo naaleeta esinama neende oluliho, naayita mu moni wa Saulo. Samueli naaboolera Saulo ati, “Yino niyo enyama yi ndahubiihira. Yirye. Olwohuba njikabuule mani nihubiihira oyirye bulaanu neende abakeni ba naangire.” Mani Saulo n'aliira alala neende Samueli hu ludaalo olwo.

²⁵Beehirira ohuchia mu siko nibatula abuundu wohwiinamiramo Samueli naakaniaya neende Saulo nibali aakulu hu nyuumba,

²⁶mani niyeyalisa eyo. Mani obwiire nibuhya mu mabwiibwi, Samueli yalaanga Saulo aakulu hu nyuumba, n'aboola ati, “Simuha, leha huseebule weweereo.” Saulo naasimuha, mani nibatula boombi, omweene neende Samueli.

²⁷Mani niboola hu ndulo w'esiko esyo, Samueli yaboolera Saulo ati, “Boolera omuhalaabani oyo abiteo, atwiimiriremo.” Omuhalaabani oyo niyabitao, Samueli yemeeda ohuboola ati, “Ewe yemaho ano budiidi, hweekesa si Nasaae aboolere.”