Read sango Tongo nda ti aye 1 Bible Online

Tongo nda ti aye 1 - sango bible

Tongo nda ti aye 1

¹Na tongo nda ni, Nzapa asara yayu na sese.

²Sese ni ayeke gi senge, ye oko ayeke daa pepe. Ndo avuko pitipiti na ndö ti angu so ali mingi; yingo ti Nzapa ayeke ya na ndö ti angu ni.

³Nzapa atene: “Ayeke nzoni ndo avuru!” Si ndo ni avuru.

⁴Nzapa abaa so vurungo ndo ayeke nzoni. Lo kangbi popo ti vurungo ndo na vukongo ndo.

⁵Nzapa adi iri ti vurungo ndo “kota lâ”, lo di iri ti vukongo ndo “bi”. Lakui ahon, ndaperere asi. Kozo lango laa.

⁶Nzapa atene: “Ayeke nzoni mbeni ye asigigi si akangbi popo ti angu!”

⁷Ye ni asi tongana ti so lo tene. Nzapa asara mbeni ye so akangbi popo ti angu ti nduzu na angu ti sese.

⁸Nzapa adi iri ti ye so akangbi popo ti angu “le ti nduzu”. Lakui ahon, ndaperere asi. Use lango laa.

⁹Nzapa atene: “Ayeke nzoni angu so ayeke na gbe ti nduzu abongbi tere ti ala na ndo oko si holengo ndo asigigi.” Ye ni asi tongana ti so lo tene.

¹⁰Nzapa adi iri ti holengo ndo ni “sese” si lo di iri ti gba ti angu ni “akota ngu-ingo”. Nzapa abaa so ye ni ayeke nzoni.

¹¹Nzapa atene: “Ayeke nzoni sese asara titene apere na akeke asigigi, amara ni nde nde. Apere ni na ale ti lungo ni na tere ni, na akeke nde nde so ayeke le, na ale ti lungo ni na ndö ni. Ye ni asi tongana ti so lo tene.

¹²Sese asara si apere na akeke asigigi, amara ni nde nde. Apere ni ayeke na ale ni so ayeke sara titene afini ni asigigi. Akeke ni ayeke na alengo ti ala so ayeke sara titene ambeni fini keke ni asigigi. Nzapa abaa so ye ni ayeke nzoni.

¹³Lakui ahon, ndaperere asi. Ota lango laa.

¹⁴Nzapa atene: “Ayeke nzoni aye so ayeke su asigigi na le ti nduzu ti kangbi popo ti kota lâ na bi. Fade aye ni ayeke sara titene azo ahinga alango ti amatanga, na ambeni lango nde nde, na angu so ayeke hon.

¹⁵Na nduzu kâ, fade ala yeke su na ndö ti sese!” Ye ni asi tongana ti so lo tene.

¹⁶Nzapa asara akota ye so ayeke su so use. Lo sara kota ni titene aduti tongana makonzi na kota lâ si lo sara kete ni titene aduti tongana makonzi na bi. Lo sara nga atongoro.

¹⁷Nzapa azia aye ni na le ti nduzu titene ala su na ndö ti sese,

¹⁸ala duti tongana amakonzi na kota lâ nga na bi si ala kangbi popo ti vurungo ndo na vukongo ndo. Nzapa abaa so ye ni ayeke nzoni.

¹⁹Lakui ahon, ndaperere asi. Osio lango laa.

²⁰Nzapa atene: “Ayeke nzoni aye so ayeke na fini asi singo na ya ti angu si andeke ahuru na ndö ti sese, na le ti nduzu.”

²¹Nzapa asara akota nyama ti ya ti kota ngu-ingo, na amara ti aye nde nde so kue ayeke na fini, ala so asi singo si ayeke tambula na ya ti angu, na amara ti andeke so kue ayeke huru. Nzapa abaa so ye ni ayeke nzoni.

²²Nzapa asara tufa na ndö ti ala, atene: “Ala du amolenge, ala wu mingi, ala mu ya ti akota ngu-ingo kue; andeke awu, amu ndö ti sese kue!”

²³Lakui ahon, ndaperere asi. Oku lango laa.

²⁴Nzapa atene: “Ayeke nzoni sese asara titene amara ti anyama nde nde kue abaa gigi: anyama ti kodro, anyama so ayeke hara harango, na anyama ti ngonda!” Ye ni asi tongana ti so lo tene.

²⁵Nzapa asara amara ti anyama nde nde ti ngonda; lo sara amara ti anyama nde nde ti kodro, na amara ti anyama nde nde so ayeke hara harango. Nzapa abaa so ye ni ayeke nzoni.

²⁶Nzapa atene: “Ayeke nzoni e sara zo titene lo kpa e, titene lo duti tongana e! Lo sara komandema na ndö ti asusu ti ya ti kota ngu-ingo, na ndö ti andeke ti nduzu, na ndö ti anyama ti kodro, na ndö ti sese kue, na ndö ti anyama so ayeke hara harango na sese!”

²⁷Nzapa asara zo, zo ni akpa Nzapa, lo sara zo ni akpa gi lo Nzapa. Lo sara ala, koli na wali.

²⁸Nzapa asara tufa na ndö ti ala si lo tene na ala: “Ala du, ala wu mingi, ala mu ndö ti sese kue, ala sara titene aye ti sese kue aduti na gbe ti ala! Ala sara komandema na ndö ti asusu ti ya ti kota ngu-ingo, na ndö ti andeke ti nduzu, na ndö ti anyama so kue ayeke hara harango na sese!”

²⁹Nzapa atene: “Mbi mu na ala apere so kue ayeke na ndö ti sese si ale ni ayeke daa, na akeke so kue alengo ni ayeke daa si le ni ti lungo ni ayeke daa. Mbi mu ni na ala titene aga kobe ti ala.

³⁰Ti anyama so kue ayeke na ndö ti sese, na andeke so kue ayeke huru na nduzu, na aye so kue ayeke tambula na sese si ayeke na fini, mbi mu apere na akeke titene aga kobe ti ala.” Ye ni asi gi tongana ti so lo tene.

³¹Nzapa abaa aye so kue lo sara: aye ni ayeke nzoni mingi. Lakui ahon, ndaperere asi. Omene lango laa.