Read sango Tongo nda ti aye 11 Bible Online

Tongo nda ti aye 11 - sango bible

Tongo nda ti aye 11

¹Azo ti ndö ti sese kue ayeke tene gi yanga ti kodro oko; atënë ti yanga ti ala kue ague gi oko.

²Me na hongo ti azo ni na mbage ti To, ala wara mbeni sese ti lando na kodro ti Shinear si ala duti daa.

³Ala tene na popo ti ala, atene: “E londo, e gboto abiriki, e zö ni.” Ala mu abiriki ni tongana atêne ti da, ala mu gudron tongana potopoto.

⁴Na pekoni, ala tene na popo ti ala, atene: “E londo, e leke mbeni gbata; e leke mbeni kota da so li ni ayo, akpo le ti nduzu. Tongaso si iri ti e awu si e kangbi na ndö ti sese kue pepe.”

⁵KOTA GBIA azu ti baa gbata ni na da so ayo na nduzu, so amolenge ti Adam ayeke leke ni so.

⁶Lo tene: “Mo baa awe? Ala kue ayeke gi mara oko; ala kue ayeke tene gi yanga ti kodro oko. Kozo kua ti ala so ala yeke sara ni so laa? Ye so ala leke na be ti ala ti sarango ni so, fadeso mbeni ye ti kangango lege na ni ayeke daa pepe!

⁷Tongaso e zu, e buba ya ti yanga ti kodro ti ala si mbeni zo akiri ama tënë so mba ti lo atene na lo pepe!”

⁸Gi na ndo so laa KOTA GBIA akangbi ya ti ala na ndö ti sese kue si ala zia lege ti sarango gbata ni.

⁹Ndani laa a di iri ti ndo ni so Babel, ngbanga ti so na ndo so laa KOTA GBIA abuba ya ti yanga ti kodro so azo ti sese kue ayeke tene. Na ndo so nga laa KOTA GBIA akangbi ya ti ala na ndö ti sese kue.

¹⁰Tënë ti sewa ti Sem ayeke tongaso: Sem ayeke na ngu ngbangbo oko si lo du Arpaksad; ngu use na peko ti ngu so asuku amu ndo kue si lo du lo.

¹¹Na peko ti dungo Arpaksad, Sem aduti na gigi ngu ngbangbo oku. Lo du amolenge-koli na amolenge-wali.

¹²Arpaksad ayeke na ngu baleota na oku si lo du Shela.

¹³Na peko ti dungo Shela, Arpaksad aduti na gigi ngu ngbangbo osio na ota. Lo du amolenge-koli na amolenge-wali.

¹⁴Shela ayeke na ngu baleota si lo du Eber.

¹⁵Na peko ti dungo Eber, Shela aduti na gigi ngu ngbangbo osio na ota. Lo du amolenge-koli na amolenge-wali.

¹⁶Eber ayeke na ngu baleota na osio si lo du Peleg.

¹⁷Na peko ti dungo Peleg, Eber aduti na gigi ngu ngbangbo osio na baleota. Lo du amolenge-koli na amolenge-wali.

¹⁸Peleg ayeke na ngu baleota si lo du Reu.

¹⁹Na peko ti dungo Reu, Peleg aduti na gigi ngu ngbangbo use na gumbaya. Lo du amolenge-koli na amolenge-wali.

²⁰Reu ayeke na ngu baleota na use si lo du Serug.

²¹Na peko ti dungo Serug, Reu aduti na gigi ngu ngbangbo use na mbarambara. Lo du amolenge-koli na amolenge-wali.

²²Serug ayeke na ngu baleota si lo du Nahor.

²³Na peko ti dungo Nahor, Serug aduti na gigi ngu ngbangbo use. Lo du amolenge-koli na amolenge-wali.

²⁴Nahor ayeke na ngu baleuse na gumbaya si lo du Tera.

²⁵Na peko ti dungo Tera, Nahor aduti na gigi ngu ngbangbo oko na baleoko na gumbaya. Lo du amolenge-koli na amolenge-wali.

²⁶Tera ayeke na ngu balembarambara si lo du Abram, Nahor na Haran.

²⁷Tënë ti sewa ti Tera ayeke tongaso: Tera adu Abram, Nahor na Haran. Haran adu Lot.

²⁸Haran akui kozo ti babâ ti lo Tera, na ndembe so ala ngba na gbata ti Ur, na sese ti Babilonii. Ur ayeke kodro so a du lo daa.

²⁹Abram na Nahor amu awali. Iri ti wali ti Abram ayeke Sarai; iri ti wali ti Nahor ayeke Milka, molenge ti Haran ti wali. Haran ayeke nga babâ ti Iska.

³⁰Sarai ayeke na molenge pepe, ngbanga ti so lo yeke wali ti dungo ni pepe.

³¹Tera amu molenge ti lo Abram, na ata ti lo Lot, molenge ti Haran, na kogara ti lo Sarai, wali ti molenge ti lo Abram si lo na ala alondo na sese ti Babilonii, na gbata ti Ur ti gue na kodro ti Kanaan. Ala gue, asi na gbata ti Haran si ala sara kodro kâ.

³²Tera aduti na gigi ngu ngbangbo use na oku si lo kui na gbata ti Haran.