Read sango Tongo nda ti aye 13 Bible Online

Tongo nda ti aye 13 - sango bible

Tongo nda ti aye 13

¹Abram alondo na Ezipte, lo gue na sese ti mbage ti Mbongo, lo na wali ti lo na aye so kue lo yeke na ni. Lot ayeke nga na tere ti lo.

²Abram ayeke na gba ti anyama, gba ti nginza na gba ti lôro.

³Lo londo na sese ti mbage ti Mbongo, lo si na mbeni ndo, lo kiri lo londo na ndo so lo si na mbeni ndo; lo sara tongaso ngbii lo si na Betel, na ndo so lo duti daa kozoni, na popo ti Betel na Ai;

⁴na ndo so lo leke ando mbeni gbalaka daa so, lo iri KOTA GBIA na iri ti lo si lo voro lo.

⁵Lot so ayeke tambula na Abram, lo nga lo yeke na angasa, ataba, abagara na ada ti bongo.

⁶Ndo ni kâ alingbi titene ala use kue aduti daa pepe, ngbanga ti so aye so ala yeke na ni ayeke mingi ahon ndoni. Ala use kue alingbi ti sara kodro na ndo oko pepe.

⁷Na ngoi ni so, andaa azo ti Kanaan na azo ti mara ti Perizi laa ayeke lango na ya ti kodro ni. Papa alondo na popo ti awabatango-nyama ti Abram na ala ti Lot.

⁸Abram atene na Lot: “Ayeke nzoni mbi na mo, e papa na popo ti e pepe si awabatango-nyama ti mbi na ala ti mo apapa nga na popo ti ala pepe, ngbanga ti so e yeke a-ita.

⁹Kodro ni kue laa ayeke na le ti mo so pepe? Ayeke nzoni e kangbi tere. Tongana mo gue na mbage ti maboko ti koli, fade mbi yeke gue ti mbi na mbage ti maboko ti wali. Tongana mo gue na mbage ti maboko ti wali, fade mbi yeke gue na mbage ti maboko ti koli.”

¹⁰Lot ayo le ti lo na nduzu, lo baa so sese ti tere ti ngu ti Jourdain, ngu asua na ya ni nzoni mingi. Kozo titene KOTA GBIA abuba agbata ti Sodome na Gomore, nzoni sese ni ague ngbii asi na Soar, sese ni ayeke tongana yaka ti KOTA GBIA, wala tongana kodro ti Ezipte.

¹¹Lot asoro ti lo sese ti tere ti ngu ti Jourdain si lo hon na mbage ti To. Lege so ala kangbi tere ti ala laa.

¹²Abram aduti na sese ti Kanaan; Lot aduti ti lo na tere ti agbata ti tere ti ngu ti Jourdain. Lo zia ada ti lo ti bongo kete na kete, alondo na ndo so ngbii asi na Sodome.

¹³Azo ti Sodome ayeke azo ti kirikiri mingi, ala sara siokpari mingi so ake KOTA GBIA.

¹⁴Na peko ti so Lot na Abram akangbi tere awe, KOTA GBIA atene na Abram: “Luti na ndo so mo yeke daa so, yo le ti mo na nduzu, mo baa ndo na mbage ti Banga, na mbage ti Mbongo, na mbage ti To, na mbage ti Do.

¹⁵Tongaso, kodro so mo yeke baa ni so, mbi yeke mu ande ni na mo nga na *ahale ti mo, titene aga ti ala biani biani.

¹⁶Mbi yeke sara titene ahale ti mo aga mingi tongana fuku ti sese; tongaso, zo so alingbi ti diko fuku ti sese, fade lo lingbi ti diko ahale ti mo.

¹⁷Londo, mo tambula na sese ni. Mo baa yongo ni na nduru ni, ngbanga ti so mbi mu ni na mo awe.”

¹⁸Abram amu ada ti lo ti bongo si lo gue ti duti na ndo so akeke ti shene ti Mamre ayeke daa na Hebron. Lo leke mbeni gbalaka ndali ti KOTA GBIA kâ.