Read sango Tongo nda ti aye 18 Bible Online

Tongo nda ti aye 18 - sango bible

Tongo nda ti aye 18

¹KOTA GBIA asi na Abraham nduru na tere ti akeke ti shene ti Mamre. Abraham ayeke duti na yanga ti da ti lo ti bongo, na ndembe so ndo-wâ ayeke mingi.

²Abraham ayo le ti lo na nduzu si lo baa azo ota so aluti nduru na tere ti lo. So lo baa ala, lo londo na yanga ti da ti lo ti bongo, lo kpe, lo gue, lo wara ala. Lo kuku, lo kpo li ti lo na sese

³si lo tene: “Kota Gbia, tongana mo baa mbi na nzoni le, mbi gbu gere ti mo, mo zia mbi zo ti gbe ti mo, mo hon pepe.

⁴Fade a ga na kete ngu titene ala sukula na gere ti ala; ala wu tere ti ala na gbe ti keke so.

⁵Mbi yeke ga na kete kobe titene ala te, ala wara ngangu si ala hon, ngbanga ti so ala si na tere ti mbi, zo ti gbe ti ala awe.” Ala kiri tënë na lo, atene: “Sara tongana ti so mo tene so.”

⁶Abraham ague hio na ya ti da ti bongo ni si lo tene na Sara, lo tene: “Londo hio! Mo mu ye ti hakango na farini, mo haka nzoni farini fani ota, mo sara na gatoo.”

⁷Na pekoni, lo kpe na ndo so lo yeke bata anyama ti lo daa, lo mu mbeni kete bagara so nyama ti lo awoko nzoni, lo ga na ni. Lo mu bagara ni na mbeni maseka-koli so ayeke sara kua na lo; maseka ni ato ni hio.

⁸Abraham amu ngu ti me ti bagara so ala sara ni si ane nengo so, lo mu nga mbeni fini ngu ti me ti bagara si lo mu nga kasa ti kete bagara so a to so, lo zia ni na gbe ti agene so. Lo luti na gbe ti keke ni, nduru na tere ti ala. Ala te kobe ni

⁹si na pekoni, ala hunda lo, atene: “Wali ti mo Sara ayeke na ndo wa?” Lo kiri tënë, lo tene: “Lo yeke kâ na ya ti da ti bongo.”

¹⁰KOTA GBIA akiri amu tënë si lo tene: “Na ngu ti peko, gi na mara ti ngoi so e yeke daa so, mbi yeke kiri ge, fade wali ti mo Sara ayeke du molenge-koli.” Andaa Sara aduti na yanga ti da, na peko ti Abraham si lo dingi mê ti lo, lo yeke ma tënë ni.

¹¹Abraham na Sara aga mbakoro awe; ngu ti ala ahon mingi si Sara ayeke baa ya ti lo mbeni pepe.

¹²Sara ato nda ti hengo ngia na be ti lo kâ si lo tene: “Mbi so mbi woko kue awe so, mbi lingbi ti kiri ti sara mara ti ngia so? Koli ti mbi nga aga mbakoro awe!”

¹³KOTA GBIA atene na Abraham: “Nda ti ngia so Sara ahe so ayeke nyen? Ngbanga ti nyen si lo hunda tere ti lo, lo tene: ‘Mbi so mbi ga mbakoro awe so, mbi lingbi ti du molenge biani?’

¹⁴Mbeni ye ti kpene so KOTA GBIA alingbi ti sara pepe ayeke daa? Na ngu ti peko, gi na mara ti ngoi so e yeke daa so, na ndembe so mbi yeke kiri ti ga ge, Sara adu molenge-koli awe.”

¹⁵Mbeto asara Sara si lo bere, lo tene: “Mbi he ngia pepe.” KOTA GBIA akiri tënë: “Taa-tënë, mo he ngia fade.”

¹⁶Azo ni alondo ti gue si ala baa ndo na mbage ti Sodome. Abraham ague ti zia ala na lege.

¹⁷KOTA GBIA atene: “Fade mbi honde na Abraham ye so mbi ye ti sara?

¹⁸Fade Abraham ayeke ga kotara ti mbeni kota mara so ayeke ngangu. Na lege ti lo, mbi yeke sara tufa na ndö ti azo ti amara ti ndö ti sese kue.

¹⁹Mbi soro lo titene lo mu yanga na amolenge ti lo, na *ahale ti lo so kue ayeke ga na peko ti lo titene ala ma yanga ti KOTA GBIA; ala sara ye so ayeke mbirimbiri, na ye so ayeke na legeni. Tongaso si mbi KOTA GBIA, mbi yeke sara ande na Abraham aye so kue mbi tene tënë ti sarango ni ndali ti lo.”

²⁰Na pekoni, KOTA GBIA atene na Abraham: “Toto so ayeke na iri ti agbata ti Sodome na Gomore so ahon ndoni. Siokpari ti azo ti agbata ni ane ahon ndoni.

²¹Ndani laa mbi ye ti zu ti baa wala ala sara ye ni biani alingbi na tënë ti toto so mbi ma so. Tongana tënë ni ayeke mvene wala taa-tënë, mbi yeke hinga ande.”

²²Azo use na popo ti agene ni alondo na ndo so ti gue na mbage ti Sodome. Me Abraham angba ti luti na dawa ti KOTA GBIA.

²³Abraham aga nduru si lo tene: “KOTA GBIA, mo yeke bongbi zo ti mbirimbiri na zo ti sioni kue ti fâ ala biani?

²⁴E hinga pepe, azo ti mbirimbiri ayeke baleoku na ya ti gbata ni. Mo yeke buba gbata ni biani? Mo yeke zi tënë na li ti azo ni ndali ti azo ti mbirimbiri baleoku so ayeke na ya ti gbata ni so pepe?

²⁵Titene mo bongbi azo ti mbirimbiri na azo ti sioni kue ti fâ ala, so alingbi na mo pepe. So ti fa atene, zo ti mbirimbiri na zo ti sioni kue gi legeoko? Sarango ye tongaso alingbi na mo pepe! Lo so ayeke fâ ngbanga na ndö ti azo ti dunia kue, lo lingbi ti fâ ngbanga ti kirikiri tongana nyen?”

²⁶KOTA GBIA atene: “Tongana mbi wara azo ti mbirimbiri baleoku na ya ti gbata ti Sodome, fade mbi zi tënë na li ti azo ni kue ndali ti azo baleoku so.”

²⁷Abraham akiri amu tënë si lo tene: “Kota Gbia, mbi so mbi yeke gi fuku ti sese si mbi yeke mburu ti wâ so, mbi ye ti kanga be ti mbi ti kiri ti tene tënë na mo.

²⁸E hinga pepe, azo ti mbirimbiri ni ayeke baleoku pepe si ala yeke gi baleosio na oku. Ndali ti azo oku so ayeke daa pepe so, mo yeke buba gbata ni kue?” KOTA GBIA akiri tënë, atene: “Tongana mbi wara azo ti mbirimbiri baleosio na oku, mbi yeke buba gbata ni pepe.”

²⁹Abraham akiri amu tënë si lo tene na KOTA GBIA, lo tene: “E hinga pepe, azo ti mbirimbiri na ya ti gbata ni ayeke gi baleosio!” KOTA GBIA atene: “Tongana mbi wara azo ni baleosio, mbi yeke buba gbata ni pepe.”

³⁰Abraham akiri atene: “Mbi gbu gere ti Kota Gbia; mo sara ngonzo ndali ti tënë so mbi yeke tene so pepe. E hinga pepe, azo ti mbirimbiri na ya ti gbata ni ayeke baleota!” KOTA GBIA atene: “Tongana mbi wara azo ni baleota, mbi yeke buba gbata ni pepe.”

³¹Abraham akiri atene: “Mbi ye ti kanga be ti mbi, ti kiri ti tene tënë na Kota Gbia. E hinga pepe, azo ti mbirimbiri na ya ti gbata ni ayeke baleuse!” KOTA GBIA atene: “Ndali ti azo baleuse so, mbi yeke buba gbata ni pepe.”

³²Abraham akiri atene: “Tongana mbi tene tanga ti tënë ti mbi so, ayeke nzoni Kota Gbia asara ngonzo pepe. E hinga pepe, azo ti mbirimbiri na ya ti gbata ni ayeke baleoko!” KOTA GBIA atene: “Ndali ti azo baleoko so, mbi yeke buba gbata ni pepe.”

³³So KOTA GBIA ahunzi ti tene tënë na Abraham awe, lo hon si Abraham akiri na ndo ti lo.