Read sango Tongo nda ti aye 19 Bible Online

Tongo nda ti aye 19 - sango bible

Tongo nda ti aye 19

¹*A-ange use so ague, asi na Sodome na lakui. Andaa Lot ayeke duti na yanga ti gbata ni. Gi so lo baa ala, lo londo si lo gue, lo wara ala. Lo kuku, lo kpo li ti lo na sese.

²Lo tene: “Mbi gbu gere ti ala, akota zo! Ayeke nzoni ala ga na da ti mbi, ala sukula gere ti ala, ala lango. Kekereke na ndaperere, ala mu lege ahon senge.” Ala kiri tënë na lo, atene: “Ên-en! E yeke lango gi na be ti kodro na ndo so.”

³Me Lot ague na ala ngangu ngangu ngbii si ala gue na da ti lo. Lo to pendere kobe, lo zö mapa so a sara na mama ni pepe, lo mu na ala si ala te.

⁴So ala de ti lango pepe, akoli ti gbata ni, akoli ti Sodome, ti londo na amaseka ngbii asi na ambakoro, ala kue aga, ala ngoro tere ti da ni.

⁵Ala iri Lot si ala hunda lo, atene: “Akoli so aga na ndo ti mo na bi so ayeke na ndo wa? Sigigi na ala titene e lango na ala.”

⁶Lot asigigi, lo luti gi na yanga ti da si lo kanga yanga ti da ni na peko ti lo.

⁷Lo tene na ala: “Mbi gbu gere ti ala, a-ita ti mbi, ala sara sioni pepe.

⁸Mbi yeke na amaseka-wali use so ade ti hinga koli pepe. Mbi yeke mu amaseka-wali ni na ala titene ala sara ye so kue be ti ala aye na ala. Me gi ye oko: ala sara sioni na akoli so pepe, ngbanga ti so ala yeke agene ti mbi.” —

⁹Azo ni akiri tënë na lo: “Hon kâ! Mo so mo yeke gi wande so, mo ga ge ti fa lege na e? Fade e yeke sara sioni na mo ahon ti so e yeke sara na akoli so.” Ala pusu Lot na ngangu si ala ga nduru na yanga ti da ni titene ala kungbi ni.

¹⁰Me akoli use so ayoro maboko ti ala, ala gboto Lot na tere ti ala na ya ti da ni. Ala kanga yanga ti da ni,

¹¹ala sara si le ti azo so ayeke na yanga ti da ni so avuko, ti londo na amolenge ngbii asi na akota zo. Ala gi yanga ti da ni gbaa, akara ala.

¹²Akoli ni atene na Lot: “Ambeni zo nde ayeke na tere ti mo ge? Kogara ti mo? Amolenge ti mo ti koli? Amolenge ti mo ti wali? Asewa ti mo kue, mo sigigi na ala na ya ti gbata ni, mo na ala ahon.

¹³E yeke buba gbata ni, ngbanga ti so toto so ayeke na iri ti gbata ni asi na mê ti KOTA GBIA. Nilaa lo tokua e titene e buba gbata ni.”

¹⁴Lot asigigi, atene na akogara ti lo so aye ti mu amolenge ti lo ti wali so, atene: “Ala londo na gbata so, ala sigigi, ngbanga ti so KOTA GBIA ayeke buba gbata ni.” Me akogara ti lo abaa ti ala atene, so tënë ti ngia laa.

¹⁵So ndo ayeke han, a-ange ni akiri atene tënë mingi na Lot titene lo sigigi na ya ti gbata ni. Ala tene: “Mo londo, mo mu wali ti mo na amolenge ti mo ti wali use so ayeke ge so, ala sigigi, ngbanga ti mo wara kuâ ndali ti sioni ti azo ti gbata so pepe.”

¹⁶So tere ti Lot angba ti ne nengo, akoli use so agbu maboko ti lo, agboto lo, lo na wali ti lo, na amolenge ti lo ti wali use kue, ala sigigi na lo. Ala sigigi na Lot na ya ti gbata ni si ala zia lo na gigi, ngbanga ti so KOTA GBIA abaa mawa ti lo.

¹⁷So ala sigigi na lo awe, ala tene na lo: “Kpe, mo hon! Tongaso si mo soo fini ti mo. Mo baa ndo na peko ti mo pepe! Mo luti na mbeni ndo na lando ni so pepe! Mo kpe, mo gue na ndö ti hoto! Tongaso si mo kui pepe.”

¹⁸Lot atene: “Ye ni ayeke tongaso pepe, kota zo! Mbi gbu gere ti mo.

¹⁹Baa, mbi, zo ti gbe ti mo, mo baa mbi na nzoni le. Mo ye mbi mingi si mo sara titene mbi ngba na fini. Me mbi lingbi ti kpe ti gue na ndö ti hoto pepe. Na ndembe so mbi ngba ti kpe ti gue, fade ye ti sioni ayeke wara mbi na lege si mbi kui.

²⁰Mo baa gbata so kâ so? Gbata ni ayeke nduru ge; mbi lingbi ti kpe ti gue daa si mbi soo kuâ. Gbata ni ayeke mbeni kete gbata so akpa pepe. Zia mbi kpe kâ si mbi ngba na fini.”

²¹Lo kiri tënë na Lot, lo tene: “Baa, mbi sara nzoni be na mo. Mbi yeke buba kete gbata so mo tene tënë ni so pepe.

²²Mo kpe hio, mo gue kâ titene mo soo kuâ. Mbi yeke sara ye oko pepe, ngbii mo si na ya ti gbata ni awe si.” Ndani laa azo adi iri ti gbata ni so Soar.

²³Lot asi na gbata ti Soar na ndembe so lâ ayeke sigigi.

²⁴Na ndembe ni so laa KOTA GBIA asara titene wâ na *sufre alondo na nduzu, atuku na ndö ti Sodome na Gomore tongana ti so ngu-Nzapa ayeke pika so.

²⁵Lo sara si aye ti agbata ni aga kirikiri: lando ni kue, azo ti agbata ni kue, akeke na apere ni kue.

²⁶Wali ti Lot abaa ndo na peko si lo ga ngbongboro ingo.

²⁷Na ndaperere so ndo angba kâ, Abraham alondo si lo gue na ndo so lo luti fade daa na le ti KOTA GBIA so.

²⁸Lo baa ndo na mbage ti Sodome na Gomore nga na mbage ti lando ni. Lo baa so guru ti wâ alondo na sese si ayeke gue na nduzu tongana guru ti kota wâ.

²⁹Me na ndembe so Nzapa abuba agbata so ayeke na lando ni kâ so, lo dabe ti lo na Abraham. Lo zi Lot na ya ti ye ti sioni na ndembe so agbata ni aga kirikiri.

³⁰Lot alondo na gbata ti Soar, lo gue, lo duti na ndö ti hoto. Amolenge ti lo ti wali use ague na lo. Mbeto ti dutingo na Soar asara lo si lo gue, lo lango na ya ti du ti têne, lo na amolenge ti lo use so.

³¹Mbeni lâ, kozo molenge ni atene na ngambe ti lo, atene: “Babâ ti e aga mbakoro awe. Na ya ti kodro ni ge, mbeni koli ti mungo e ayeke daa pepe tongana ti so azo ayeke mu awali na ya ti akodro kue so.

³²Ga e mu samba na babâ ti e, lo nyon si e lango na lo. Tongaso si e sara titene babâ ti e awara amolenge ti zia na peko ti lo.”

³³Ala mu samba na babâ ti ala na bi ni so, lo nyon si kozo molenge ni aga alango na babâ ti lo. Babâ ni ahinga langongo so lo lango na tere ti lo so pepe; lo hinga nga londongo ti lo pepe.

³⁴Lango oko na pekoni, kozo molenge ni atene na ngambe ti lo, atene: “Baa, biri na bi, mbi lango na babâ ti mbi. Ayeke nzoni e kiri e mu samba na lo na bi so, lo nyon si mo gue, mo lango na lo. Tongaso si e sara titene babâ ti e awara amolenge ti zia na peko ti lo.”

³⁵Na bi ni, ala kiri amu samba na babâ ti ala si lo nyon. Ngambe ni ague, alango na babâ ti lo. Babâ ni ahinga nga langongo so lo lango na tere ti lo so pepe; lo hinga nga londongo ti lo pepe.

³⁶Amolenge ti Lot ti wali use so amu ngo; ngo ni ayeke ti babâ ti ala.

³⁷Kozo molenge ni adu molenge-koli si lo di iri ti molenge ni Moab. Lo laa lo yeke kotara ti azo ti mara ti Moab ti laso so.

³⁸Ngambe ni nga adu molenge-koli si lo di iri ti molenge ni Ben-Ami. Lo laa lo yeke kotara ti azo ti Amon ti laso so.