Read sango Tongo nda ti aye 20 Bible Online

Tongo nda ti aye 20 - sango bible

Tongo nda ti aye 20

¹Abraham alondo na ndo so, lo gue na sese ti mbage ti Mbongo. Lo sara kodro na popo ti akodro ti Kades na Shur. Na pekoni, lo gue, lo duti na gbata ti Gerar.

²Abraham atene na azo, atene: “Sara ayeke ita ti mbi.” Abimelek, gbia ti gbata ti Gerar atokua azo, ala ga amu Sara ague na lo na lo.

³Me na bi, Nzapa asi na Abimelek na ya ti bango-li si atene na lo: “Mo kui awe ndali ti wali so mo mu lo so! Lo yeke wali ti zo.”

⁴Andaa Abimelek ade ti duti na Sara pepe, lo dekongo, lo tene: “Kota Gbia! Mo yeke fâ azo ti kodro, ataa so azo ni asara ye ti mbirimbiri?

⁵Abraham laa atene na mbi: ‘Sara ayeke ita ti mbi.’ Sara nga atene: ‘Ita ti mbi ti koli laa.’ Mbi sara ye ni na sioni be pepe; tënë ayeke na li ti mbi pepe.”

⁶Nzapa akiri tënë na lo na ya ti bango-li, atene: “Mbi kue, mbi hinga, mbi tene, mo sara ye so na sioni be pepe. Gi mbi nga laa mbi kanga lege na mo titene mo sara siokpari ti ke mbi pepe. Ndani laa mbi zia mo, mo ndu lo pepe.

⁷Mo kiri na wali ti koli so na lo, ngbanga ti so koli ni ayeke wayanga-Nzapa. Fade lo yeke sambela ndali ti mo titene mo ngba na fini. Me tongana mo kiri na wali ni pepe, ayeke nzoni mo hinga, mo tene, mo na azo ti mo kue ayeke kui biani.”

⁸Na ndaperere so ndo angba kâ, Abimelek alondo, lo iri azo ti kua ti lo kue si lo fa peko ti ye so asi so kue na ala. Mbeto agbu azo ni mingi.

⁹Na pekoni, Abimelek airi Abraham si atene na lo: “Nyen laa mo sara na e tongaso? Sioni ti nyen laa mbi sara na mo si mo mu mbi na azo ti kodro ti mbi, mo zia e na lege ti sara kota siokpari tongaso? Ye so mo sara na mbi so, ayeke ye so azo ayeke sara ka ni pepe.”

¹⁰Abimelek akiri atene: “Nyen laa mo ye ti gi fade na peko ti ye so mo sara so?”

¹¹Abraham akiri tënë, atene: “Mbi tene na be ti mbi, mbi tene: ‘Azo so ge so ahinga ti ala ti kpe mbeto ti Nzapa oko pepe. Fade ala yeke fâ mbi ndali ti wali ti mbi.’

¹²Tongana e baa ye ni mbirimbiri, lo yeke ita ti mbi biani. Babâ ti mbi na lo oko. Me mama ti e ayeke nde nde si lo ga wali ti mbi so.

¹³Na ndembe so Nzapa asara titene mbi zia da ti babâ ti mbi, mbi hon, mbi tene na Sara, mbi tene: ‘Fade mo sara nzoni na mbi: na ndo so kue e yeke si ande daa, mo tene na azo, mo tene, mbi yeke ita ti mo.’ ”

¹⁴Abimelek amu angasa na ataba, abagara, na angbaa ti koli na ti wali, lo mu ala na Abraham. Lo kiri na lo wali ti lo Sara.

¹⁵Lo tene: “Baa, sese ti mbi laa ayeke na le ti mo so. Baa ndo so anzere na le ti mo, mo duti daa.”

¹⁶Na pekoni, lo tene na Sara, lo tene: “Baa, mbi mu ale ti nginza saki oko na ita ti mo. So aye ti fa na azo so kue ayeke na tere ti mo atene, tënë ayeke na li ti mo pepe si mo kiri mo wara nengo ti mo.”

¹⁷Abraham asambela ndali ti Abimelek si Nzapa akai kobela na tere ti Abimelek, na wali ti lo, na azo ti kua ti lo ti wali si ala kiri adu amolenge.

¹⁸Andaa KOTA GBIA akanga fade lege biani na awali so kue ayeke na yangbo ti Abimelek titene ala du pepe, ndali ti Sara, wali ti Abraham.