Read sango Tongo nda ti aye 22 Bible Online

Tongo nda ti aye 22 - sango bible

Tongo nda ti aye 22

¹Na peko ti aye so, Nzapa atara be ti Abraham. Lo iri lo, lo tene: “Abraham!” Abraham ayeda, atene: “Mbi laa.”

²Nzapa atene: “Mu molenge ti mo ti koli, oko molenge ti mo Isaac so mo ye lo mingi so, mo gue na lo na sese ti Moria, na ndö ti mbeni hoto so mbi yeke fa na mo. Kâ, mo mu lo na *sandaga so a yeke gbi ni kue na wâ.”

³Na ndaperere so ndo angba kâ, Abraham alondo, lo suru keke ti wâ ti zongo na sandaga. Lo leke lele ti lo; lo mu amaseka-koli use so ayeke sara kua na lo, na molenge ti lo Isaac, na tere ti lo si lo mu lege, lo gue na ndo so Nzapa afa na lo.

⁴Na lango ota ni, Abraham ayo le ti lo na nduzu si lo baa ndo ni yongoro kâ.

⁵Abraham atene na amaseka-koli ni: “Ala na lele ni angba ti ala ge. Mbi na molenge ni, e yeke gue na mbage ti nduzu kâ ti voro Nzapa. Na pekoni, e yeke kiri ande na tere ti ala.”

⁶Abraham amu akeke ti wâ ti zongo na sandaga ni si lo zia na ndö ti go ti molenge ti lo Isaac. Lo mu ale ti wâ na zeme si ala use kue ague legeoko.

⁷Isaac atene na babâ ti lo Abraham: “Babâ!” Babâ ni ayeda: “Mbi laa, molenge ti mbi!” Isaac ahunda babâ ti lo, atene: “Le ti wâ na keke ti wâ laa. Me taba ti mungo na sandaga so a yeke gbi ni kue na wâ so ayeke na ndo wa?”

⁸Abraham akiri tënë, atene: “Molenge ti mbi, fade Nzapa wani ayeke baa lege ti mu na e taba ti mungo na sandaga so a yeke gbi ni kue na wâ.” Ala use kue angba ti tambula ti gue legeoko.

⁹So ala si na ndo so Nzapa afa na lo awe, Abraham aleke mbeni gbalaka si lo leke akeke ti wâ ni na ndö ni. Lo kanga molenge ti lo Isaac na kamba si lo zia lo na ndö ti akeke ti wâ ni, na ndö ti gbalaka ni.

¹⁰Lo yoro maboko ti lo, lo mu zeme si lo ye ti fâ go ti molenge ti lo ni.

¹¹Me na nduzu kâ, *ange ti KOTA GBIA airi Abraham, atene: “Abraham! Abraham!” Abraham ayeda, atene: “Mbi laa!”

¹²Ange ni atene: “Ndu molenge ni pepe. Sara ye oko na lo pepe, ngbanga ti so mbi hinga fadeso mbi tene, mo yeke zo ti kpengo mbeto ti Nzapa. Mo gbanzi oko molenge ti mo na mbi pepe.”

¹³Abraham ayo le ti lo na nduzu si lo baa mbeni koli-taba na peko ti lo; akete keke agbu koli-taba ni na didi ti lo. Lo gue, lo mu koli-taba ni si lo mu lo na sandaga so a yeke gbi ni kue na wâ na plase ti molenge ti lo.

¹⁴Abraham adi iri ti ndo ni so “KOTA GBIA ayeke baa lege ti mungo ye na zo.” Ndani laa laso azo ayeke tene: “Na ndö ti hoto laa KOTA GBIA ayeke baa lege ti mungo ye na zo.”

¹⁵Na yayu kâ, ange ti KOTA GBIA akiri airi Abraham ti fani use ni;

¹⁶lo tene na lo: “So tënë ti yanga ti KOTA GBIA laa: Ndali ti so mo sara tongaso si mo gbanzi oko molenge ti mo na mbi pepe, mbi deba na iri ti mbi wani,

¹⁷fade mbi yeke sara tufa na ndö ti mo gbani gbani. Mbi yeke sara titene *ahale ti mo awu mingi tongana atongoro ti le ti nduzu, nga tongana mbutu ti yanga ti kota ngu-ingo. Fade ahale ti mo ayeke mu akodro ti awato ti ala.

¹⁸A yeke sara tufa na ndö ti azo ti amara ti ndö ti sese kue na lege ti ahale ti mo, ngbanga ti so mo ma yanga ti mbi.”

¹⁹Abraham akiri na mbage ti amaseka so ayeke sara kua na lo si ala kue amu lege ti gue na Bersheba, ndo so Abraham aduti daa.

²⁰Na peko ti aye so, azo aga atene na Abraham: “Milka nga adu amolenge na Nahor, ita ti mo.

²¹Kozo molenge ni ayeke Us; a-ita ti Us ayeke Buz, na Kemuel so ayeke babâ ti Aram,

²²Kesed, Hazo, Pildash, Yidlaf, na Betuel.”

²³Amolenge miombe so Milka adu na Nahor, ita ti Abraham so laa. Betuel adu Rébecca.

²⁴Sambâ ti Milka, so iri ti lo Reuma, lo nga lo du amolenge: Teba, Gaham, Tahash na Maaka.