Read sango Tongo nda ti aye 23 Bible Online

Tongo nda ti aye 23 - sango bible

Tongo nda ti aye 23

¹Ngu so kue Sara aduti na gigi ayeke ngu ngbangbo oko na baleuse na mbarambara.

²Lo kui na Kiriat-Arba, so ti tene na Hebron, na sese ti Kanaan. Tongaso Abraham atoto kuâ ti Sara si lo sara mua ti lo.

³Na pekoni, Abraham alondo na ndo so kuâ ti wali ti lo ayeke daa si lo gue, lo tene na azo ti mara ti Het, lo tene:

⁴“Mbi yeke wande so aduti na popo ti ala, mbi yeke wande so aga ndali ti mbeni kete ngoi. Ayeke nzoni ala mu na mbi mbeni sese ti ala titene mbi lu kuâ ti wali ti mbi daa, wali ti mbi so ahon na tere ti mbi so.”

⁵Azo ti mara ti Het akiri tënë na Abraham, atene:

⁶“Ma e si, kota zo! Nzapa asara si mo ga kota zo mingi na popo ti e. Baa mbeni du ti kuâ ti e so anzere na mo, mo lu kuâ ti wali ti mo daa. Na popo ti e, mbeni zo oko ti ke na mo ti lu wali ti mo na ya ti du ti kuâ ti lo ayeke daa pepe.”

⁷Abraham alondo, lo kuku, lo kpo li ti lo na sese na gbe ti azo ti mara ti Het so ala yeke azo ti sese ni.

⁸Lo tene na ala: “Tongana ala ye titene mbi lu kuâ ti wali ti mbi so ahon na tere ti mbi, ayeke nzoni ala ma mbi; ala gue na Efron, molenge ti Sohar, ala hunda mbeni ye ndali ti mbi.

⁹Ala hunda na lo titene lo mu na mbi du ti têne so ayeke na yanga ti yaka ti lo so. Ayeke nzoni lo ka ni na mbi na ngere so kue be ti lo aye. Mbi mu nginza ni na lo si du ni aga ndo ti mbi ti lungo akuâ daa na popo ti ala.”

¹⁰Efron ayeke duti na popo ti amba ti lo, azo ti mara ti Het. Efron akiri tënë na Abraham na le ti azo ti mara ti Het nga na azo so kue ayeke na yanga ti gbata ni, atene:

¹¹“Ma mbi si, kota zo! Tënë ni laa pepe! Mbi mu na mo yaka ni, na du ti têne ni senge senge. Na le ti azo ti kodro ti mbi laa mbi mu ni na mo. Lu kuâ ti wali ti mo daa.”

¹²Abraham akuku akpo li ti lo na sese na gbe ti azo ti sese ni.

¹³Na pekoni, lo tene na Efron na le ti azo ti sese ni, lo tene: “Ayeke nzoni mo nga, mo ma mbi si! Mbi yeke futa na mo nginza ti yaka ni. Yeda, mo mu ni na maboko ti mbi si mbi lu kuâ ti wali ti mbi daa.”

¹⁴Me Efron akiri tënë na Abraham, atene:

¹⁵“Ma mbi si, kota zo! Sese so zo ayeke futa na ale ti nginza ngbangbo osio so ayeke mbeni ye oko pepe na popo ti mbi na mo. Lu kuâ ti wali ti mo daa!”

¹⁶Abraham ama tere na Efron; lo diko ale ti nginza alingbi na ti so Efron adiko na le ti azo ti mara ti Het kue so si lo mu na lo. Wungo ti nginza ni ayeke ale ti nginza ngbangbo osio, so azo ayeke vo na ye na ngoi ni kâ.

¹⁷Lege so yaka ti Efron so ayeke na Makpela si ayeke na mbage ti To ti kodro ti Mamre so, yaka ni na du ti têne so ayeke na ya ni, na akeke so kue ayeke na yanga ti yaka ni so kue

¹⁸aga ti Abraham laa. Na le ti azo ti mara ti Het na azo so ayeke na yanga ti gbata ni laa yaka ni aga ti Abraham.

¹⁹Na pekoni, Abraham alu kuâ ti wali ti lo Sara na ya ti du ti têne so ayeke na yaka so ayeke na Makpela, na mbage ti To ti kodro ti Mamre, so ti tene na kodro ti Hebron, na sese ti Kanaan.

²⁰Lege so laa azo ti mara ti Het ayeda ti ka yaka ni, na du ti têne so ayeke na ya ni na Abraham titene aga ti lo biani si lo yeke lu akuâ ti lo daa.