Read sango Tongo nda ti aye 27 Bible Online

Tongo nda ti aye 27 - sango bible

Tongo nda ti aye 27

¹Isaac aga mbakoro awe; le ti lo avuko si lo kiri lo baa ndo pepe. Lo iri kozo molenge ti lo Ezau si lo tene na lo: “Molenge ti mbi!” Ezau ayeda, atene: “Mbi laa, babâ.”

²Isaac akiri atene: “Baa, mbi ga mbakoro awe; mbi hinga lango ti kuâ ti mbi pepe.

³Fadeso, mu aye ti gingo na nyama ti mo, na bozo ti ale ti kokora ti mo na kokora ti mo. Mo gue na ngonda, mo gi nyama, mo ga na ni na mbi.

⁴Mo to mbeni nzerengo kobe so mbi ye ni mingi, mo ga na ni na mbi, mbi te ni titene mbi wani, mbi sara tufa na ndö ti mo kozoni si mbi kui.”

⁵So Isaac ayeke tene tënë na molenge ti lo Ezau, Rébecca ayeke ma tënë ni. Ezau ague na ngonda ti gi nyama ti ga na ni.

⁶Rébecca atene na molenge ti lo Jacob: “Baa, mbi ma babâ ti mo atene na ita ti mo Ezau, atene:

⁷‘Ga na mbi nyama ti ngonda; mo to na mbi mbeni nzerengo kobe, mbi te si. Mbi yeke sara tufa na ndö ti mo na le ti KOTA GBIA kozoni si mbi kui.’

⁸Fadeso, molenge ti mbi, ma mbi nzoni: ye so mbi mu yanga na mo ti sarango ni, mo sara ni.

⁹Gue na ndo so a yeke bata angasa daa; mo mu anzoni kete koli-ngasa use, mo ga na ala na mbi si. Mbi yeke to na babâ ti mo mbeni nzerengo kobe so lo ye mingi.

¹⁰Fade mo gue na ni na babâ ti mo, lo te si lo sara tufa na ndö ti mo kozoni si lo kui.”

¹¹Jacob akiri tënë na mama ti lo Rébecca, atene: “Kua ti tere ti ita ti mbi Ezau ayeke daa mingi. Ti mbi, kua ti tere ti mbi ayeke daa pepe.

¹²E hinga pepe, fade babâ ti mbi atara tere ti mbi; tongana lo baa mbi tongana zo ti handango ndo, fade lo zia lege ti sarango tufa ni, lo deba mbi.”

¹³Mama ti lo atene na lo: “Molenge ti mbi, ayeke nzoni deba ni agbu gi mbi. Ma gi tënë so mbi tene na mo so. Gue mo ga na mbi angasa ni.”

¹⁴Jacob ague, amu ala, lo ga na ala na mama ti lo si lo to na babâ ti lo nzerengo kobe so babâ ni aye mingi.

¹⁵Na pekoni, Rébecca amu apendere bongo ti kozo molenge ti lo Ezau so lo yeke na ni na da si lo yu na Jacob, ngambe molenge ni.

¹⁶Lo mu poro ti tere ti kete ngasa, lo kanga na tere ti amaboko ti Jacob, nga na tere ti go ti lo so kua ti tere ayeke daa pepe.

¹⁷Lo mu nzerengo kobe na mapa so lo leke ni so na molenge ti lo Jacob.

¹⁸Jacob ague, awara babâ ti lo si lo iri lo, lo tene: “Babâ!” Babâ ni ayeda, atene: “Mbi laa, molenge ti mbi. Mo yeke zo wa?”

¹⁹Jacob atene na babâ ti lo: “Mbi Ezau, kozo molenge ti mo laa. Mbi sara ye so mo hunda na mbi so awe. Mbi gbu gere ti mo, londo, mo duti mo te nyama ti ngonda so mbi to so si mo wani, mo sara tufa na ndö ti mbi.”

²⁰Isaac akiri tënë na molenge ti lo, atene: “Molenge ti mbi, mo sara tongana nyen si mo wara nyama ti ngonda ni hio so?” Jacob akiri tënë, atene: “KOTA GBIA, Nzapa ti mo asara si nyama ti ngonda ni aga na mbage ti mbi.”

²¹Isaac atene na Jacob: “Molenge ti mbi, ga nduru na tere ti mbi, mbi tara tere ti mo. Mo yeke molenge ti mbi Ezau biani wala mo yeke mbeni zo nde?”

²²Jacob aga nduru na tere ti babâ ti lo Isaac, babâ ni andu tere ti lo, atene: “Go ni ayeke go ti Jacob, me maboko ni ayeke ti Ezau.”

²³Lo hinga lo tene Jacob laa pepe, ngbanga ti so kua ti tere ti maboko ti lo ayeke daa mingi tongana ti Ezau. Nilaa kozo titene lo sara tufa na ndö ti lo,

²⁴lo hunda lo: “Taa mo molenge ti mbi Ezau laa?” Jacob akiri tënë, atene: “Mbi laa.”

²⁵Isaac atene: “Molenge ti mbi, mu na mbi kobe ni, mbi te nyama ti ngonda ni si mbi sara tufa na ndö ti mo.” Jacob amu kobe ni na Isaac si lo te ni. Na pekoni, lo ga na vin na lo si lo nyon ni.

²⁶Tongaso Isaac, babâ ti lo, atene na lo: “Molenge ti mbi, ga nduru na tere ti mbi, mo su ngbangba ti mbi.”

²⁷Jacob aga nduru si lo su ngbangba ti babâ ti lo. Isaac ama fion ti abongo ti lo si lo sara tufa na ndö ti lo, lo tene: “Biani, fion ti tere ti molenge ti mbi ayeke tongana fion ti yaka so KOTA GBIA asara tufa na ndö ni.

²⁸Ayeke nzoni Nzapa asara titene ngu alondo na nduzu azu na ndö ti sese ti mo si sese ti mo adu ale ti kobe mingi; lo mu na mo ale ti *ble na fini vin gbani gbani.

²⁹Ayeke nzoni amara nde asara kua na gbe ti mo si azo ti akodro nde nde akuku na gbe ti mo! Mo ga makonzi ti a-ita ti mo si a-ita ti mo akuku na gbe ti mo! Deba aga na ndö ti zo so ayeke deba mo, tufa aga na ndö ti zo so ayeke sara tufa na ndö ti mo!”

³⁰Gi so Isaac ahunzi ti sarango tufa na ndö ti Jacob awe, Jacob azia babâ ti lo ti sigigi. Gi so lo yeke sigigi, ita ti lo Ezau alondo na lege ti gingo nyama akiri.

³¹Lo nga lo to mbeni nzerengo kobe si lo gue na ni na babâ ti lo. Lo tene na babâ ti lo, lo tene: “Babâ! Ayeke nzoni mo londo, mo te kobe ti nyama ti ngonda so mbi, molenge ti mo, mbi fâ mbi ga na ni. Na pekoni, mo wani, mo sara tufa na ndö ti mbi.”

³²Isaac ahunda lo, atene: “Mo yeke zo wa?” Ezau akiri tënë, atene: “Mbi yeke Ezau, kozo molenge ti mo.”

³³Tere ti Isaac kue ado ngangu mingi si lo hunda ndo, lo tene: “Ka zo wa laa ague na ngonda si aga na mbi nyama so, zo wa? Mbi te nyama ni kue awe kozo si mo ga so. Mbi sara tufa na ndö ti lo awe; fade tufa ni ayeke ngba na ndö ti lo.”

³⁴So Ezau ama tënë so babâ ti lo atene, be ti lo aso mingi si lo dekongo ngangu. Lo tene na babâ ti lo, lo tene: “Babâ, sara nga tufa na ndö ti mbi maa!”

³⁵Isaac akiri tënë: “Ita ti mo aga, lo handa mbi si lo nzi tufa ti mo ni awe.”

³⁶Ezau akiri atene: “Ngbanga ti so iri ti lo ayeke Jacob si lo mu ndo ti mbi fani use na lege ti handango ndo so? Lo nzi ndo ti mbi ti kozo molenge si fadeso lo kiri lo nzi tufa ti mbi. Mo bata mbeni tufa ni ndali ti mbi pepe?”

³⁷Isaac amu tënë si lo tene na Ezau, lo tene: “Baa! Mbi sara si lo ga makonzi ti mo awe. Mbi mu na lo a-ita ti lo kue titene ala ga azo ti gbe ti lo. Mbi mu na lo ale ti ble nga na fini vin. Molenge ti mbi, nyen laa mbi yeke kiri ti sara na mo, nyen?”

³⁸Ezau akiri tënë na babâ ti lo, atene: “Babâ, gi oko tufa so mo yeke na ni laa? Mbi nga, ayeke nzoni mo sara tufa na ndö ti mbi.” Ezau atoto ngangu.

³⁹Babâ ti lo akiri tënë na lo, atene: “Baa, fade ndo ti duti ti mo ayeke na ndo so akobe ayeke sigigi daa mingi pepe. Ndo ni ayeke yongoro na ndo so ngu ti nduzu ayeke ti daa.

⁴⁰Mo yeke duti nzoni gi ndali ti yongoro zeme ti mo. Me mo yeke sara kua na gbe ti ita ti mo si na hongo ti mo na ando nde nde, mo yeke zi *zuge so lo zia na go ti mo.”

⁴¹Ezau azia Jacob na be ndali ti tufa so babâ ti lo asara na ndö ti lo so. Lo tene na be ti lo, lo tene: “Lango ti kuâ ti babâ ti mbi aga nduru awe. Tongaso mbi yeke fâ ita ti mbi Jacob.”

⁴²Azo ague, atene na Rébecca peko ti tënë ti Ezau, kozo molenge ti lo. Tongaso lo iri Jacob, ngambe molenge ti lo si lo tene na lo: “Baa, ita ti mo Ezau aye ti fâ mo, ndali ti ye so mo sara na lo so.

⁴³Tongaso, molenge ti mbi, ma mbi. Londo, mo kpe na ndo ti ita ti mbi Laban, na kodro ti Haran.

⁴⁴Mo duti na ndo ti lo ndali ti mbeni ngoi, ngbii sioni ngonzo ti ita ti mo ade si mo kiri.

⁴⁵Tongana ngonzo ti lo ni ade na tere ti mo awe si lo girisa ye so mo sara na lo so awe, fade mbi yeke tokua mbeni zo kâ ti mu mo ti kiri na mo. Ndani nyen titene mbi girisa amolenge ti mbi use kue gi na ya ti lango oko?”

⁴⁶Rébecca atene na Isaac: “Nzara ti ngbango na fini asigigi na ya ti mbi awe, ngbanga ti so Ezau amu awali ti mara ti Het so. Tongana Jacob amu mbeni molenge-wali ti kodro so, fade mbi yeke ngba ti duti na fini ngbanga ti nyen?”