Read sango Tongo nda ti aye 28 Bible Online

Tongo nda ti aye 28 - sango bible

Tongo nda ti aye 28

¹Isaac airi Jacob si asara tufa na ndö ti lo. Lo mu yanga na lo, lo tene: “Mo mu mbeni molenge-wali ti Kanaan titene lo ga wali ti mo pepe.

²Londo, mo gue na sese ti Mezopotamii ti nduzu, na ndo ti Betuel, babâ ti mama ti mo. Kâ, mo mu mbeni molenge-wali ti Laban, ita ti mama ti mo, titene lo ga wali ti mo.

³Ayeke nzoni Nzapa so ngangu ti lo ahon angangu kue asara tufa na ndö ti mo. Lo yeke sara titene mo du amolenge, ala wu mingi. Lo yeke sara titene azo ti amara mingi mingi abaa gigi na lege ti mo.

⁴Ayeke nzoni tufa so lo sara na ndö ti Abraham so, lo sara ni na ndö ti mo, na *ahale ti mo. Tongaso kodro so Nzapa amu ando na Abraham si mo yeke duti daa tongana wande so, kodro ni ayeke ga ti mo.”

⁵Tongaso Isaac atokua Jacob na sese ti Mezopotamii ti nduzu, na ndo ti Laban, molenge ti Betuel, zo ti mara ti Aram. Laban ayeke ita ti Rébecca, mama ti Jacob na Ezau.

⁶Ezau ama so Isaac asara tufa na ndö ti Jacob si atokua lo na sese ti Mezopotamii ti nduzu titene lo mu wali kâ. Lo ma nga so na sarango tufa ni, Isaac amu yanga na Jacob, atene: “Mo mu wali ti kodro ti Kanaan pepe.”

⁷Andaa Jacob ama yanga ti babâ na mama ti lo si lo hon na Mezopotamii.

⁸Tongaso Ezau ahinga atene babâ ti lo aye tënë ti awali ti kodro ti Kanaan pepe.

⁹Ezau aye ti mu mbeni wali ti zia na ndö ti akozo wali ti lo; nilaa lo gue, lo wara Ismael, molenge ti Abraham si lo mu Mahalat, molenge ti Ismael ti wali ti ga wali ti lo. Mahalat ayeke ita ti Nebayot ti wali.

¹⁰Jacob alondo na Bersheba ti gue na Haran.

¹¹Lo si na mbeni ndo si lo lango daa, ngbanga ti so lâ akui awe. Lo mu mbeni têne so ayeke na ndo ni so, lo zia na gbe ti li ti lo si lo lango na ndo ni so.

¹²Lo baa li ti lo: lo baa mbeni eskalie so ague ngbii akpo le ti nduzu. *A-ange ti Nzapa ayeke tambula na ndö ni ti gue na nduzu wala ti zu na sese.

¹³KOTA GBIA ayeke luti nduru na Jacob si atene na lo: “Mbi yeke KOTA GBIA, Nzapa ti babâ ti mo Abraham na Nzapa ti Isaac. Sese so mo yeke lango daa so, fade mbi yeke mu na mo, na *ahale ti mo.

¹⁴Fade ahale ti mo ayeke wu mingi tongana fuku ti sese. Ala yeke mu ndö ti sese ni kue, na mbage ti Do, na mbage ti To, na mbage ti Banga, nga na mbage ti Mbongo. Fade a yeke sara tufa na ndö ti amara ti dunia kue na lege ti mo, na ahale ti mo.

¹⁵Baa, mbi wani, mbi yeke na mo. Mbi yeke bata mo na ndo so kue mo yeke gue daa si mbi yeke kiri na mo na sese so ge so. Biani, mbi yeke zia mo pepe, ngbii mbi sara ye so mbi tene tënë ni na mo so si.”

¹⁶Jacob azingo na lango si lo tene: “Biani, KOTA GBIA ayeke na ndo so si mbi hinga ti mbi fade pepe so!”

¹⁷Mbeto agbu lo si lo tene: “Ndo so ayeke ndo ti ziango mbeto mingi na be ti zo! Mbeni ndo nde laa pepe, da ti Nzapa laa; yanga ti yayu laa!”

¹⁸Na ndaperere so ndo angba kâ, Jacob alondo, lo mu têne so lo zia na gbe ti li ti lo so; lo leke ni, aluti na nduzu si lo tuku mafuta na li ni.

¹⁹Lo di iri ti ndo ni Betel. Me kozo iri ti gbata ni ayeke Luz.

²⁰Jacob amu zendo, atene: “Tongana Nzapa ayeke na mbi si lo bata mbi na lege so mbi yeke tambula daa so, tongana lo mu na mbi kobe ti tengo ni na abongo ti yungo ni,

²¹tongana mbi kiri na nzoni tere na da ti babâ ti mbi, fade KOTA GBIA ayeke ga Nzapa ti mbi.

²²Têne so mbi leke ni aluti na nduzu so, fade ayeke ga da ti Nzapa. Aye so kue lo yeke mu ande na mbi, fade mbi yeke mu na lo *dime ni.”