Read sango Tongo nda ti aye 29 Bible Online

Tongo nda ti aye 29 - sango bible

Tongo nda ti aye 29

¹Jacob amu lege ti gue na sese ti azo so ayeke na mbage ti To.

²Mbeni lâ, lo baa mbeni du ti ngu na ya ti ngonda si lo baa bongbi ota ti ataba na angasa so alango nduru na du ti ngu ni. Ngu ti du so laa ala yeke nyon. A kanga yanga ti du ti ngu ni na mbeni kota têne.

³Tongana a bongbi anyama ni kue awe, azo ayeke pusu kota têne ti yanga ti du ti ngu ni, ala to ngu ni na anyama ni, anyon si na pekoni, azo ni akiri azia têne ni na yanga ti du ti ngu ni.

⁴Jacob ahunda awabatango-nyama ni, atene: “A-ita, ala yeke azo ti kodro wa?” Ala kiri tënë na lo, atene: “E yeke azo ti kodro ti Haran.”

⁵Lo hunda ala, lo tene: “Ala hinga Laban, molenge ti Nahor?” Ala kiri tënë na lo, atene: “E hinga lo.”

⁶Lo hunda ala, lo tene: “Lo yeke nzoni?” Ala kiri tënë, atene: “Lo yeke nzoni. Baa Rachel, molenge ti lo ti wali laa ayeke ga na anyama ti lo so.”

⁷Lo kiri lo tene: “Baa, lâ angba ti su; so ngoi ti bongbingo anyama na ndo oko laa pepe. Ala mu ngu na anyama ni anyon; na pekoni, ala gue na ala titene ala te pere.”

⁸Ala kiri tënë: “E lingbi ti sara tongaso pepe. E yeke bongbi anyama ni kue na ndo oko kozoni. Na pekoni, e yeke pusu kota têne ni na yanga ti du ti ngu ni si e to ngu na anyama ni titene ala nyon.”

⁹So lo ngba ti tene tënë na ala, Rachel asi na anyama ti babâ ti lo, ngbanga ti so Rachel ayeke wabatango-nyama.

¹⁰So Jacob abaa Rachel, molenge ti Laban, ita ti mama ti lo, na anyama ti Laban, lo gue na tere ti du ti ngu ni; lo pusu têne ti yanga ti du ni si lo to ngu na anyama ti Laban titene ala nyon.

¹¹Na pekoni, Jacob asu ngbangba ti Rachel si lo toto.

¹²Lo tene na Rachel, ni yeke zo ti sewa ti babâ ti lo si ni yeke molenge ti Rébecca. Rachel akpe, ague, atene tënë ni na babâ ti lo.

¹³So Laban ama tënë ti singo ti Jacob, molenge ti ita ti lo ti wali, lo kpe, lo gue, lo wara lo. Lo gbu lo ngangu na kate ti lo, lo su ngbangba ti lo si lo gue na lo na da ti lo. Jacob afa na lo peko ti aye so kue asi.

¹⁴Na pekoni, Laban atene na lo: “Taa-tënë, mo yeke zo ti sewa ti mbi, mo yeke taa mene ti mbi.” Jacob asara nze oko na ndo ti Laban.

¹⁵Mbeni lâ, Laban atene na Jacob: “Mo yeke zo ti sewa ti mbi. Me ndali ni si mo lingbi ti sara kua na mbi senge senge? Fa na mbi ye so mo ye mbi futa mo na ni.”

¹⁶Andaa Laban ayeke na amolenge-wali use: iri ti kozo molenge ni Lea; iri ti ngambe ni Rachel.

¹⁷Lea ayeke baa ndo nzoni pepe; me Rachel ayeke pendere mingi si lo nzere na le ti azo.

¹⁸Jacob aye Rachel si lo tene: “Mbi yeke sara kua na mo na ya ti ngu mbarambara ndali ti Rachel, molenge ti mo ti ngambe ni.”

¹⁹Laban atene: “Ti mbi, mbi ye mingi ti mu lo na mo ahon titene mbi mu lo na mbeni koli nde. Ngba na ndo ti mbi ge.”

²⁰Tongaso Jacob asara kua ngu mbarambara ndali ti Rachel. Ti lo, lo baa ngu mbarambara so gi tongana mbeni kete lango, ngbanga ti so lo ye Rachel.

²¹Na pekoni, Jacob atene na Laban: “Ngoi so mo fa na mbi so alingbi awe. Mu na mbi wali ti mbi; mbi ye titene lo ga wali ti mbi.”

²²Laban asara matanga ti mungo tere si lo iri azo ti ndo ni kue ti ga na matanga ni.

²³Me na lakui, lo mu molenge ti lo Lea, lo gue na lo na Jacob titene Jacob aduti na lo.

²⁴Laban amu Zilpa, zo ti kua ti lo ti wali na molenge ti lo Lea ti ga zo ti kua ti lo.

²⁵So ndo ahan awe, Jacob abaa so Lea laa. Lo hunda Laban, lo tene: “Nyen laa mo sara na mbi tongaso? Mbi sara kua na mo ndali ti Rachel pepe? Mo handa mbi ngbanga ti nyen?”

²⁶Laban akiri tënë na lo, atene: “Na ndo ti e, na lege ti sarango ye ti e, a yeke mu ka ngambe molenge na koli kozo ti yaya ti lo pepe.

²⁷Mo hunzi yenga oko ti matanga ti mungo tere ti mo na lo so si. Na pekoni, a yeke mu na mo ngambe ni si mo kiri mo sara kua na mbi na ya ti ngu mbarambara.”

²⁸Jacob ayeda. Lo hunzi yenga oko ti matanga ti mungo tere ti lo na Lea. Na pekoni, Laban amu molenge ti lo Rachel titene lo ga wali ti Jacob.

²⁹Laban amu Bila, zo ti kua ti lo ti wali na Rachel ti ga zo ti kua ti lo.

³⁰Jacob aduti nga na Rachel. Lo ye Rachel ahon Lea. Tongaso lo kiri lo sara kua na Laban na ya ti ngu mbarambara.

³¹So KOTA GBIA abaa atene Jacob aye Lea mingi pepe, lo sara si Lea aga wali ti dungo ni. Me Rachel ayeke ti lo wali ti dungo ni pepe.

³²Lea amu ngo, lo du molenge-koli si lo di iri ti lo Ruben, ngbanga ti so lo tene: “KOTA GBIA abaa vundu ti be ti mbi awe. Fadeso koli ti mbi ayeke ye mbi.”

³³Lo kiri lo mu ngo si lo du mbeni molenge-koli; lo tene: “KOTA GBIA ahinga so koli ti mbi aye mbi pepe. Nilaa lo kiri lo mu na mbi molenge so.” Lo di iri ti lo Siméon.

³⁴Lo kiri lo mu ngo si lo du mbeni molenge-koli; lo tene: “Ti so, fade koli ti mbi ayeke bongbi oko na mbi, ngbanga ti so mbi du na lo amolenge-koli ota awe. Ndani laa lo di iri ti molenge ni Lévi.”

³⁵Lo kiri lo mu ngo si lo du mbeni molenge-koli; lo tene: “Ti so, mbi yeke gonda KOTA GBIA.” Ndani laa lo di iri ti molenge ni Juda. Na pekoni, lo kiri lo du pepe.