Read sango Tongo nda ti aye 30 Bible Online

Tongo nda ti aye 30 - sango bible

Tongo nda ti aye 30

¹So Rachel abaa atene lo yeke du molenge na Jacob pepe, lo sara kota be na tere ti ita ti lo. Rachel atene na Jacob: “Mu na mbi amolenge, tongaso pepe mbi yeke kui.”

²Jacob asara ngonzo na tere ti Rachel si lo tene: “Mbi laa mbi yeke Nzapa? Lo laa lo kanga lege na mo ti wara amolenge-aa!”

³Rachel akiri tënë, atene: “Baa, Bila, zo ti kua ti mbi ti wali laa. Mo gue, mo duti na lo titene lo du molenge si molenge ni aga tongana molenge ti ya ti mbi. Tongaso si na lege ti lo, mbi nga, mbi wara molenge.”

⁴Lo mu Bila, zo ti kua ti lo ti wali si lo mu lo na Jacob titene lo ga wali ti lo. Jacob aduti na lo.

⁵Bila amu ngo si lo du molenge-koli na Jacob.

⁶Rachel atene: “Nzapa afâ ngbanga ti mbi awe! Lo ma mbi si lo mu na mbi molenge-koli.” Ndani laa lo di iri ti molenge ni Dan.

⁷Bila, zo ti kua ti Rachel ti wali, akiri amu ngo si lo du use molenge-koli na Jacob.

⁸Rachel atene: “Mbi tiri ngangu bira na ita ti mbi ti wali si mbi hon ndö ti lo awe”. Lo di iri ti molenge ni Neftali.

⁹So Lea abaa atene lo yeke kiri ti du pepe, lo mu Zilpa, zo ti kua ti lo ti wali, lo mu lo na Jacob titene lo ga wali ti lo.

¹⁰Zilpa, zo ti kua ti Lea ti wali, adu molenge-koli na Jacob.

¹¹Lea atene: “So pasa!” Lo di iri ti molenge ni Gad.

¹²Na pekoni, Zilpa, zo ti kua ti Lea ti wali, akiri adu use molenge-koli na Jacob.

¹³Lea atene: “So ngia na mbi! Fadeso awali alingbi ti tene: mbi yeke na ngia.” Lo di iri ti molenge ni Aser.

¹⁴Mbeni lâ, na ngoi ti fango ale ti *ble, Ruben ague na ngonda; lo wara amandragore si lo ga na ni na mama ti lo Lea. Rachel atene na Lea: “Mu na mbi ambeni mandragore so molenge ti mo aga na ni so.”

¹⁵Lea akiri tënë, atene: “So mo mu koli ti mbi so, so alingbi na mo pepe? Na ndoni, mo ye ti kiri ti mu amandragore ti molenge ti mbi?” Rachel akiri atene: “Tongana mo mu na mbi amandragore ti molenge ti mo, Jacob ayeke duti na mo na bi so ndali ni.”

¹⁶Na lakui, so Jacob alondo na ngonda si lo yeke kiri, Lea ague, atengbi na lo si atene na lo: “Fade mo ga, mo duti na mbi, ngbanga ti so mbi mu mo na peko ti amandragore ti molenge ti mbi.” Tongaso Jacob aduti na Lea na bi ni so.

¹⁷Nzapa ama sambela ti Lea. Lo mu ngo si lo du oku molenge-koli na Jacob.

¹⁸Lea atene: “Nzapa afuta mbi na peko ti so mbi mu zo ti kua ti mbi ti wali na koli ti mbi.” Lo di iri ti molenge ni Isakar.

¹⁹Lea akiri amu ngo si lo du omene molenge-koli na Jacob.

²⁰Lo tene: “Nzapa amu na mbi mbeni pendere kadoo! Ti fadeso, fade koli ti mbi ayeke ne mbi, ngbanga ti so mbi du na lo amolenge-koli omene awe.” Lo di iri ti molenge ni Zabulon.

²¹Na pekoni, lo du molenge-wali si lo di iri ti lo Dina.

²²Nzapa adabe ti lo na Rachel; Nzapa ama sambela ti lo si azi na lo lege ti dungo ni.

²³Lo mu ngo si lo du molenge-koli. Lo tene: “Nzapa azi kamene na le ti mbi awe.”

²⁴Lo di iri ti molenge ni Joseph si lo tene: “Ayeke nzoni KOTA GBIA akiri amu mbeni molenge-koli oko na ndö ti lo so na mbi!”

²⁵So Rachel adu Joseph awe, Jacob atene na Laban: “Zia mbi kiri na ndo ti mbi, na kodro ti mbi.

²⁶Mu na mbi awali ti mbi na amolenge ti mbi, mbi mu lege, mbi gue. Ndali ti awali ni laa mbi sara kua na mo. Mo hinga kua so kue mbi sara na ndo ti mo.”

²⁷Laban akiri tënë na lo, atene: “Mbi gbu gere ti mo, mo baa mbi na nzoni le. Zeke ti mbi afa na mbi so KOTA GBIA asara tufa na ndö ti mbi ndali ti mo.

²⁸Fa na mbi ye so mo ye titene mbi futa na mo; fade mbi yeke futa ni na mo.”

²⁹Jacob atene na lo: “Mo wani, mo hinga kua so mbi sara na mo so awe. Mo baa lege so anyama ti mo awu ndali ti mbi.

³⁰Kozoni si mbi ga, aye ti mo awu mingi pepe. Ngbene ye so mbi si na ndo ti mo, aye ni awu ahon ndoni si KOTA GBIA asara tufa na ndö ti mo. Me lawa laa mbi nga, mbi yeke sara kua ndali ti azo ti da ti mbi?”

³¹Laban ahunda lo, atene: “Nyen laa mbi yeke mu na mo, nyen?” Jacob akiri tënë: “Mo yeke mu ye oko na mbi pepe. Tongana mo yeda ti sara ye so mbi yeke hunda na mo, fade mbi yeke kiri ti gue na anyama ti mo titene ala te pere si mbi yeke bata ala tongana ti kozoni.

³²Mbi yeke hon laso ti baa ndo na popo ti ataba na angasa ti mo kue. Mbi yeke zi ataba so ayeke na akete nzoroko wala akota nzoroko na tere ti ala na ala so avuko ye ayeke na tere ti ala ti zia ala na mbage. Mbi yeke zi nga angasa so ayeke na akete nzoroko na akota nzoroko na tere ti ala ti zia ala na mbage. Anyama so mbi zia ala na mbage so, futa ti mbi laa.

³³Kekereke, tongana mo ga ti baa futa ti mbi ni, fade mo yeke hinga, wala mbi yeke sara ye na legeni wala mbi yeke sara ye na legeni pepe. Tongana mo wara ambeni ngasa so akete nzoroko wala akota nzoroko ayeke na tere ti ala pepe, na ataba so avuko ye ayeke na tere ti ala pepe na popo ti anyama so mbi mu ala so, andaa mbi nzi ala nzingo.”

³⁴Laban atene: “Nzoni! Mbi yeda na tënë so mo tene so.”

³⁵Me gi na lango ni so, Laban amu akoli-ngasa so ayongoro nzoroko na akete nzoroko ayeke na tere ti ala, angasa so akota nzoroko wala akete nzoroko ayeke na tere ti ala, na ataba so kua ti tere ti ala avuko kete, lo mu ala na amolenge ti lo titene ala bata ala.

³⁶Lo tokua amolenge ti lo yongoro na tere ti Jacob, na ndo so ayo alingbi na tambula ti lango ota. Jacob ayeke bata tanga ti anyama ti Laban.

³⁷Jacob amu afini maboko ti akeke nde nde ota, lo zi ambeni poro ti tere ti akeke ni titene vuru ti tere ni asigigi. Lo suru ayongoro nzoroko vuru vuru na tere ni.

³⁸Na pekoni, lo mu amaboko ti akeke so lo suru ayongoro nzoroko na tere ni so, lo zia na ya ti adu so anyama ayeke ga ti nyon ngu daa. Lo zia ni titene anyama ni abaa ni na ndembe so ala yeke ga ti nyon ngu. Biani, nzara ti koli na wali ayeke gbu anyama ni na ndembe so ala yeke ga ti nyon ngu.

³⁹Anyama ni ayeke bongbi koli na wali na dawa ti amaboko ti akeke ni. Na pekoni, amama ti angasa ni ayeke du amolenge so akota nzoroko na akete nzoroko na avuko ye ayeke na tere ti ala.

⁴⁰Ti ataba so Jacob azia ala na mbage so, lo sara titene ala luti abaa ndo na mbage ti anyama ti Laban so anzoroko ayeke na tere ti ala, wala ala so avuko ye ayeke na tere ti ala. Lege so Jacob awara na anyama ti lo wani laa. Lo bongbi ala oko na ala ti Laban pepe.

⁴¹Lakue tongana akonongo nyama ni ayeke bongbi koli na wali, Jacob ayeke zia amaboko ti akeke ni na ya ti adu so anyama ayeke nyon ngu daa titene ala bongbi koli na wali na dawa ni.

⁴²Tongana ayeke angengo nyama, lo yeke zia amaboko ti akeke ni na dawa ti ala pepe. Tongaso, angengo nyama ni ayeke ti Laban si akonongo ni ayeke ti Jacob.

⁴³Jacob awara mosoro gbani gbani. Lo yeke na ataba na angasa mingi; lo yeke na akoli na awali mingi so ayeke sara kua na lo; lo yeke na azambala na alele mingi.