Read sango Tongo nda ti aye 32 Bible Online

Tongo nda ti aye 32 - sango bible

Tongo nda ti aye 32

¹Na ndaperere so ndo angba kâ, Laban alondo, lo su ngbangba ti amolenge ti lo ti wali na amolenge ti ala si lo sara tufa na ndö ti ala. Na pekoni, lo kiri na ndo ti lo.

²Jacob angba na lege ti gue si *a-ange ti Nzapa aga awara lo.

³Gi so Jacob abaa ala, lo tene: “So bâbâ ti Nzapa laa!” Nilaa lo di iri ti ndo so Mahanaim.

⁴Jacob atokua azo kozo ti lo na ita ti lo Ezau so lo yeke na sese ti ahoto ti Seir, na sese ti Edom.

⁵Lo mu yanga na ala, lo tene: “Fade ala yeke tene na kota zo ti mbi Ezau, atene: ‘Tënë so zo ti gbe ti mo Jacob atene ayeke so: Mbi duti na ndo ti Laban si mbi ninga na ndo ti lo ngbii asi laso.

⁶Mbi yeke na abagara, alele, ataba, angasa na azo ti kua ti koli na ti wali. Nilaa mbi tokua azo ti tene tënë ni na mo, kota zo ti mbi titene mo sara nzoni be na mbi.’ ”

⁷Azo ti tokua ni akiri na mbage ti Jacob si ala tene: “E gue, e si na ndo ti ita ti mo Ezau. Lo nga lo yeke ga ti wara mo, lo na akoli ngbangbo osio na tere ti lo.”

⁸Mbeto agbu Jacob mingi si be ti lo afun kue. Lo mu azo ti lo, ataba ti lo, angasa ti lo, abagara ti lo na azambala ti lo, lo kangbi ala na ya ti bongbi use.

⁹Lo tene: “Tongana Ezau aga si lo ti na ndö ti mbeni bongbi oko, lo buba ni, fade mbeni oko angba si akpe.”

¹⁰Na pekoni, Jacob asambela, atene: “Nzapa ti babâ ti mbi Abraham, Nzapa ti babâ ti mbi Isaac, mo KOTA GBIA so mo tene na mbi, mo tene: ‘Kiri na kodro ti mo na ti asewa ti mo; fade mbi yeke sara nzoni na mo’,

¹¹mbi zo ti gbe ti mo, mbi yeke kete mingi; anzoni ye so mo sara na mbi si mo ngba ti sarango ni ngbii asi laso so, mbi lingbi na ni pepe. Biani, mbi hon ando na ya ti ngu ti Jourdain gi na keke oko so ayeke na maboko ti mbi. Fadeso mbi yeke na azo ti mbi nga na anyama so mbi kangbi ala na ya ti bongbi use.

¹²Mbi gbu gere ti mo, zi mbi na maboko ti ita ti mbi Ezau, ngbanga ti so mbeto ti lo asara mbi, mbeto titene lo ga lo fâ mbi, na amama ni legeoko na amolenge ni.

¹³Ti mo, mo laa mo tene na mbi, mo tene: ‘Mbi ye ti sara nzoni na mo; mbi yeke sara ande titene *ahale ti mo awu mingi tongana mbutu ti kota ngu-ingo so zo alingbi ti diko ni pepe.’ ”

¹⁴Jacob alango na ndo so na bi ni so. Lo mu ambeni ye na popo ti aye so lo yeke na ni titene lo sara na kadoo na ita ti lo Ezau.

¹⁵Lo mu na lo amama ti ngasa ngbangbo use, akoli-ngasa baleuse; amama ti taba ngbangbo use na akoli-taba baleuse,

¹⁶amama ti zambala baleota na akete ni so angba ti nyon me, amama ti bagara baleosio na akoli ni baleoko; amama ti lele baleuse na akoli ni baleoko.

¹⁷Lo mu mara ti anyama ni oko oko, lo zia na maboko ti azo ti kua ti lo si lo tene na ala: “Ala hon kozo ti mbi; ala zia mbeni ndo na popo ti anyama so ayeke na dawa na ala so ayeke na peko.”

¹⁸Na pekoni, lo mu yanga na kozo zo ti kua ni, lo tene: “Tongana ita ti mbi Ezau awara mo si lo hunda mo, lo tene: ‘Mo yeke ti zo wa? Mo yeke gue na ndo wa? Anyama so ayeke tambula na dawa ti mo so ayeke ti zo wa?’

¹⁹Fade mo kiri tënë, mo tene: ‘Ti zo ti gbe ti mo Jacob laa. Kadoo so lo tokua na kota zo ti lo Ezau laa. Lo wani, lo yeke ga na peko ti e.’ ”

²⁰Jacob akiri amu gi oko yanga so na use zo ti kua ni, na ota zo ti kua ni, nga na azo so kue ayeke tambula na peko ti anyama ni, lo tene: “Tongana ala wara kota zo ti mbi Ezau, fade ala tene na lo gi oko tënë so.

²¹Fade ala tene na lo: ‘Baa, zo ti gbe ti mo Jacob ayeke ga na peko ti e.’ ” Biani, Jacob ayeke tene na be ti lo, atene: “Mbi yeke tokua na lo kadoo so kozo ti sara si be ti lo ade. Na pekoni, mbi yeke baa ande lo le na le. Mbi hinga pepe, fade lo yeke yamba mbi nzoni.”

²²Ala hon na akadoo ni kozo ti lo si na bi ni so, lo ngba ti lo na ya ti bâbâ.

²³Lo londo gi na bi ni, lo mu awali ti lo use, na azo ti kua ti lo ti wali use nga na amolenge ti lo baleoko na oko si lo hon na ndo so azo ayeke fâ ngu ti Yabok daa na gere so.

²⁴Lo mu ala, lo sara si ala fâ ngu ni, na aye so kue lo yeke na ni.

²⁵Jacob angba gi lo oko. Mbeni zo aga atiri na lo ngbii ndo ahan.

²⁶So zo ni abaa so lo lingbi ti hon ndö ti Jacob pepe na ngoi so ala ngba ti tiri, lo pika Jacob na mbage so bio ti ngbonda ti lo na bio ti gere ti lo atengbi tere daa si abio ni azi.

²⁷Zo ni atene na Jacob: “Zia mbi, mbi gue ngbanga ti so ndo ato nda ti han awe.” Jacob akiri tënë, atene: “Tongana mo sara tufa na ndö ti mbi pepe, mbi yeke zia mo, mo gue pepe.”

²⁸Zo ni ahunda lo, atene: “Iri ti mo ayeke nyen?” Jacob akiri tënë, atene: “Iri ti mbi Jacob.”

²⁹Zo ni akiri atene: “A yeke kiri ti iri mo Jacob pepe; me a yeke iri mo Israel, ngbanga ti so mo tiri na Nzapa nga na azo si mo hon ndö ti ala.”

³⁰Jacob ahunda lo, atene: “Mbi gbu gere ti mo, fa na mbi iri ti mo.” Zo ni akiri tënë, atene: “Mo hunda iri ti mbi ngbanga ti nyen?” Na pekoni, lo sara tufa na ndö ti Jacob na ndo ni so.

³¹Jacob adi iri ti ndo so Penuel, ngbanga ti so lo tene: “Mbi baa Nzapa le na le si mbi ngba na fini.”

³²So lâ ato nda ti sigigi si Jacob ahon na ndo so a yeke fâ ngu ti Penuel daa na gere so, lo yeke tambula gi na dingingo ni ndali ti abio ti ngbonda ti lo so azi so.

³³Ndani laa, ti londo na ndembe so ngbii asi laso, azo ti Israel ake ti te kasa ti mbage ti ngbonda ti nyama so ayeke na ndo so bio ti ngbonda na bio ti gere atengbi daa. Biani, a pika Jacob na ndö ti kasa ti ndo so bio ti ngbonda na bio ti gere atengbi daa.