Read sango Tongo nda ti aye 35 Bible Online

Tongo nda ti aye 35 - sango bible

Tongo nda ti aye 35

¹Nzapa atene na Jacob: “Londo, mo gue na Betel, mo duti kâ. Mo leke mbeni gbalaka ndali ti Nzapa so asi na mo na ndembe so mo yeke kpe lani ita ti mo Ezau ti hon so.”

²Jacob atene na azo ti sewa ti lo nga na azo so kue amu peko ti lo, atene: “Ala zi anzapa ti akodro wande so ayeke na popo ti ala. Ala *sukula asioni ti ala si ala yu ambeni bongo nde.

³Ala londo e gue na Betel. Kâ, mbi yeke leke mbeni gbalaka ndali ti Nzapa so akiri tënë na mbi na ndembe so ye ti ngangu asi na mbi. Lo laa lo bata mbi na lege so mbi tambula daa.”

⁴Tongaso azo ni amu na Jacob anzapa ti akodro wande so ala yeke na ni, nga na *akati so ayeke na mê ti ala. Jacob amu ni si lo lu ni na gbe ti kota keke so ayeke nduru na Sishem.

⁵Na pekoni, ala londo, ahon. Nzapa asara si kota mbeto agbu azo ti agbata so ayeke nduru na ala. Tongaso zo oko atumba peko ti amolenge ti Jacob pepe.

⁶Jacob na azo so kue amu peko ti lo asi na Luz, so ti tene na kodro ti Betel, na sese ti Kanaan.

⁷Lo leke mbeni gbalaka kâ si lo di iri ti ndo so “El-Betel”, ngbanga ti so na ndo so laa Nzapa afa tere ti lo na lo na ndembe so lo yeke kpe lani ita ti lo ti hon.

⁸Debora, wali so ayeke bata Rébecca akui; a lu lo na Betel, na mbage ti gbeni, na gbe ti keke ti shene so a iri ni “Keke ti shene ti toto.”

⁹Nzapa akiri asi na Jacob na peko ti so Jacob alondo na Mezopotamii akiri; Nzapa asara tufa na ndö ti lo.

¹⁰Nzapa atene na lo: “Iri ti mo ayeke Jacob. A yeke kiri ti iri mo Jacob pepe; me iri ti mo ayeke Israel.” Tongaso Nzapa adi iri ti lo Israel.

¹¹Nzapa akiri atene na lo: “Mbi yeke Nzapa so ngangu ti mbi ahon angangu kue. Mo du amolenge, ala wu mingi. Fade mbeni mara na amara mingi ayeke baa gigi na lege ti mo. Fade agbia ayeke sigigi na ya ti mo.

¹²Sese so mbi mu na Abraham na Isaac, mbi yeke mu ni na mo, na *ahale ti mo so a yeke du ala na peko ti mo.”

¹³Na pekoni, Nzapa alondo na ndo so lo tene tënë na Jacob daa so si lo hon.

¹⁴Jacob aleke mbeni têne aluti na nduzu na ndo so Nzapa atene tënë na lo daa so. Lo mu *sandaga ti samba na ndö ti têne ni si lo tuku nga mafuta na ndö ni.

¹⁵Jacob adi iri ti ndo so Nzapa atene tënë na lo daa so Betel.

¹⁶Ala londo na Betel si ala hon. So ala ga nduru ti si na Efrata, Rachel adu. Dungo ti lo ni ayeke ngangu mingi.

¹⁷Na ndembe so dungo ti lo ni ayeke fade ngangu mingi, wali so ayeke mu molenge na tere ti lo so atene na lo: “Sara mbeto pepe, ngbanga ti so mo yeke kiri ti du molenge-koli.”

¹⁸So yingo ti Rachel aga nduru ti sigigi na ya ti tere ti lo, ngbanga ti so lo ga nduru ti kui, lo di iri ti molenge ni Ben-Oni. Me babâ ti molenge ni adi iri ti lo Benjamin.

¹⁹Rachel akui si a lu lo na lege ti Efrata, so ti tene na Betlehem.

²⁰Jacob aleke mbeni têne aluti na nduzu na ndö ti du ti kuâ ti lo. Têne ti ndö ti du ti kuâ ti Rachel so angba ngbii asi laso.

²¹Israel alondo na ndo so, lo gue, lo leke da ti lo ti bongo kâ na peko ti Migdal-Eder.

²²Na ndembe so Israel ayeke duti na sese so, Ruben ague, alango na Bila, mbeni wali ti babâ ti lo. Israel ama tënë ni. Amolenge ti Jacob ti koli kue ayeke baleoko na use.

²³Amolenge ti Lea ayeke so: Ruben, kozo molenge ti Jacob, Siméon, Lévi, Juda, Isakar na Zabulon.

²⁴Amolenge ti Rachel ayeke so: Joseph na Benjamin.

²⁵Amolenge ti Bila, zo ti kua ti Rachel ti wali ayeke so: Dan na Neftali.

²⁶Amolenge ti Zilpa, zo ti kua ti Lea ti wali ayeke so: Gad na Aser. So amolenge ti Jacob so a du ala na Mezopotamii laa.

²⁷Jacob asi na ndo ti babâ ti lo Isaac na Mamre, na Kiriat-Arba, so ti tene Hebron. Ndo so laa Abraham na Isaac ague ando aduti daa.

²⁸Isaac aduti na gigi ngu ngbangbo oko na balemiombe.

²⁹Lo kui si lo gue na peko ti akotara ti lo. Lo te gigi alingbi na lo, lo ga kangba si lo kui. Amolenge ti lo Ezau na Jacob alu kuâ ti lo.