Read sango Tongo nda ti aye 39 Bible Online

Tongo nda ti aye 39 - sango bible

Tongo nda ti aye 39

¹Azo ti mara ti Ismael ague na Joseph na Ezipte. Kâ, Potifar, mbeni kota zo ti kua ti gbia Faraon, makonzi ti aturugu so ayeke bata gbia, avo lo na maboko ti ala.

²*KOTA GBIA ayeke na Joseph, lo ga zo so aye ti lo kue aga nzoni. Lo yeke lango na da ti wa ti lo, zo ti Ezipte so.

³Wa ti Joseph abaa so KOTA GBIA ayeke na Joseph si KOTA GBIA ayeke sara titene aye so kue lo yeke sara, aga nzoni.

⁴Be ti Potifar anzere mingi na Joseph si lo mu Joseph ti sara kua na lo. Lo zia lo ti baa ndo na ndö ti azo ti da ti lo nga na aye ti da ti lo kue.

⁵Ti londo na ndembe so Potifar azia lo na ndö ti azo ti da ti lo na aye ti lo kue, KOTA GBIA asara tufa na ndö ti azo ti da ti lo na aye ti da ti lo ndali ti Joseph. Tufa ti KOTA GBIA aga na ndö ti aye ti da ti zo ti Ezipte nga na ndö ti ayaka ti lo.

⁶Potifar azia aye ti lo kue na maboko ti Joseph. So lo wara Joseph awe, lo zia be ti lo na ndö ti mbeni ye oko pepe, gi na ndö ti kobe so lo yeke te so, awe. Joseph ayeke mbeni maseka-koli so lo yeke pendere mingi si lo nzere na le ti azo.

⁷Na peko ti aye so, wali ti wa ti lo abaa lo si asara nzara ti lo. Wali ni atene na lo: “Ga mo lango na mbi.”

⁸Me Joseph ake si lo tene na wali ti wa ti lo, lo tene: “Baa, wa ti mbi ayeke hunda na mbi ti fa na lo peko ti aye ti da ti lo pepe. Lo zia aye ti lo kue na maboko ti mbi.

⁹Mbeni zo so ayeke kota ahon mbi na ya ti da so ayeke daa pepe. Lo gbanzi na mbi lege ti sarango mbeni ye oko pepe; gi mo oko, ngbanga ti so mo yeke wali ti lo. Mbi lingbi ti sara mara ti ye ti sioni tongaso tongana nyen, ti sara siokpari so ake Nzapa?”

¹⁰Wali ni angba lakue ti hunda Joseph, me Joseph ake ti ga ti lango na ndö ti gbogbo ti lo, ti duti na lo koli na wali.

¹¹Mbeni lâ, Joseph ali na da ti sara kua ti lo. Andaa mbeni zo ti kua oko ayeke na ya ti da ni pepe.

¹²Wali ni agbu lo na bongo ti lo si atene na lo: “Lango na mbi!” Joseph azia bongo ti lo na maboko ti wali ni si lo kpe, lo sigigi.

¹³So wali ni abaa Joseph azia bongo ti lo na maboko ti lo si lo kpe, lo sigigi awe,

¹⁴wali ni airi azo ti kua ti lo si lo tene na ala: “Ala baa awe! A mu zo ti mara ti Hebro so a ga na lo titene lo he e na ngia! Lo ga titene lo lango na mbi si mbi dekongo ngangu.

¹⁵So lo baa mbi to nda ti dekongo ti iri azo, lo zia bongo ti lo na tere ti mbi si lo kpe, lo sigigi.”

¹⁶Lo bata bongo ti Joseph na tere ti lo ngbii koli ti lo akiri na da.

¹⁷Lo kiri lo fa gi peko ti oko tënë ni na koli ti lo, lo tene: “Ngbaa ti mara ti Hebro so mo ga na lo na e so, aga na tere ti mbi ti he mbi na ngia.

¹⁸Me so mbi to nda ti dekongo ngangu, lo zia bongo ti lo na tere ti mbi, lo kpe, lo sigigi.”

¹⁹So wa ti Joseph ama tënë so wali ti lo atene na lo: “Baa ye so ngbaa ti mo asara na mbi laa”, lo sara ngonzo mingi.

²⁰Lo mu yanga titene a gbu Joseph, a bi lo na da ti kanga, na ndo so a yeke bi ka azo ti kanga ti gbia daa so. Joseph aduti na da ti kanga ni.

²¹*KOTA GBIA ayeke na Joseph, lo sara nzoni be na Joseph; lo sara titene makonzi ti da ti kanga ni abaa Joseph na nzoni le.

²²Makonzi ti da ti kanga azia azo ti kanga ni kue na gbe ti komandema ti Joseph. Aye so kue azo aye ti sara na da ti kanga, ala hunda Joseph si ala sara ni.

²³Aye so kue makonzi ti da ti kanga ni azia na maboko ti Joseph, makonzi ni ayeke kiri ti baa peko ni pepe, ngbanga ti so KOTA GBIA ayeke na Joseph. Aye so kue lo yeke sara, KOTA GBIA asara titene aga nzoni.