Read sango Tongo nda ti aye 42 Bible Online

Tongo nda ti aye 42 - sango bible

Tongo nda ti aye 42

¹So Jacob ama a tene, *ble ayeke na Ezipte, lo hunda amolenge ti lo ti koli, lo tene: “Ngbanga ti nyen si ala yeke duti na ndo so ti baa gi le ti tere so?

²Mbi ma a tene, ble ayeke na Ezipte. Ala londo ague kâ, avo mbeni aga na ni; tongaso si e kui pepe, e ngba na fini.”

³Tongaso a-ita ti Joseph baleoko alondo ague na Ezipte ti vo ale ti kobe.

⁴Me Jacob atokua Benjamin, ita ti Joseph, legeoko na a-ita ti lo ni pepe, ngbanga ti so lo tene: “Tongana mbi zia lo gue, gbaa mbeni ye ti sioni ayeke si na lo na lege.”

⁵Tongaso amolenge ti Jacob ati na popo ti ambeni zo so ayeke gue na Ezipte ti vo ale ti kobe. Ala gue, ngbanga ti so kota nzara ati nga na sese ti Kanaan.

⁶Joseph laa ayeke kota komanda ti kodro ni kue; lo laa lo yeke baa lege ti kango ale ti kobe na azo ti kodro kue. Tongaso a-ita ti Joseph asi, ala kuku, akpo li ti ala na sese na gbe ti lo.

⁷Joseph abaa a-ita ti lo ni, lo hinga ala. Me lo sara titene ala hinga lo pepe. Lo tene tënë na ala na ngangu, lo tene: “Ala londo na ndo wa?” Ala kiri tënë na lo, atene: “E londo na sese ti Kanaan si e ga ti vo kobe.”

⁸Joseph ahinga a-ita ti lo ni, me ala hinga lo pepe.

⁹Be ti Joseph ati na ndö ti abango-li so lo baa ando na ndö ti ala so si lo tene na ala: “Ala yeke azo ti *bembengo ndo; ala ga ti gi ti hinga ndo so aturugu ayeke daa pepe, na ya ti kodro ni.”

¹⁰Ala kiri tënë na lo, atene: “Tënë ni laa pepe, kota zo, e azo ti gbe ti mo, e ga gi ti vo kobe.

¹¹E kue, e yeke gi amolenge ti babâ oko. E yeke azo ti handango zo pepe; e yeke azo ti bembengo ndo pepe.”

¹²Joseph atene na ala: “Tënë ni laa pepe; ala ga gi ti gi ti hinga ndo so aturugu ayeke daa pepe, na ya ti kodro ni.”

¹³Ala kiri tënë, atene: “E yeke azo ti gbe ti mo, e yeke a-ita baleoko na use so e yeke amolenge ti babâ oko, zo ti sese ti Kanaan. Tanga ti ita ti e angba na tere ti babâ ti e. Mbeni ita ti e ni oko ayeke daa mbeni pepe.”

¹⁴Joseph atene na ala: “Tënë so mbi tene fade na ala so laa: ala yeke azo ti bembengo ndo.

¹⁵Ye so mbi yeke sara ti hinga nda ti ala na ni ayeke so: na iri ti Faraon so ayeke na fini! Tongana tanga ti ita ti ala ni asi na ndo so pepe, ala yeke sigigi na ndo so ti gue pepe.

¹⁶Ala tokua mbeni ita ti ala oko titene lo gue, lo ga na tanga ti ita ti ala ni. Ala, atanga ni kue, ala yeke ngba na da ti kanga ngbii e hinga wala atënë ti ala so kue ayeke taa-tënë, wala ayeke mvene. Mbi tene na ala na iri ti Faraon so ayeke na fini! Tongana ye ni ayeke tongaso pepe, andaa ala yeke azo ti bembengo ndo biani.”

¹⁷Na pekoni, lo bi ala kue na da ti kanga lango ota.

¹⁸Na lango ota ni, Joseph atene na ala: “Ye so mbi tene na ala so, ala sara ni si ala ngba na fini, ngbanga ti so mbi yeke zo so mbi yeke kpe mbeto ti Nzapa.

¹⁹Tongana ala yeke azo ti handango zo pepe, ayeke nzoni mbeni zo oko na popo ti ala angba ti lo na ya ti da ti kanga so ala yeke daa so. Ala, atanga ni, ala gue na kobe na azo ti da ti ala ndali ti kota nzara so.

²⁰Ala gue, aga na tanga ti ita ti ala ni si tënë ti ala aga taa-tënë. Tongaso si ala ngba na fini.” Ala yeda.

²¹Ala tene tënë na popo ti ala, atene: “Ye so ayeke si na e ndali ti sioni so e sara lani na ita ti e. Lani so tere ti lo ayeke do na mbeto si lo yeke voro tere ti lo na e titene e sara nzoni be na lo, e ye ti ma lo pepe. Ndani laa ye ti ngangu so ayeke si na e so.”

²²Ruben akiri tënë na ala, atene: “Mbi tene lani tënë so na ala pepe? Mbi tene lani, mbi tene: ‘Ala sara ye ti sioni na molenge so pepe, me ala ma mbi pepe.’ Ala baa! Ye ti peko ti mene ti lo laa ayeke si na e fadeso.”

²³Ala baa ti ala atene Joseph ayeke ma tënë so ala yeke tene so pepe, ngbanga ti so mbeni zo laa ayeke kiri na peko ti atënë ti ala ni na Joseph na yanga ti kodro ti Ezipte.

²⁴Joseph azia ala, lo hon yongoro si lo toto. Na pekoni, lo kiri na tere ti ala, lo tene tënë na ala. Lo mu Siméon na popo ti ala si lo kanga lo na zingiri gi na le ti ala.

²⁵Joseph amu yanga titene a tuku ale ti ble asi ya ti asake ti ala si a zia nginza ti zo oko oko na ya ti sake ti lo; a mu nga na ala kobe ti tengo ni na lege. Tongaso azo ti kua asara ye ni na ala.

²⁶A-ita ti Joseph aleke asake ti ble ti ala ni na ndö ti alele si ala mu lege, ague.

²⁷So ala si na ndo so azo ti lege ayeke lango daa, mbeni oko na popo ti ala azi yanga ti sake ti lo titene lo mu kobe na lele ti lo. Lo baa so nginza ti lo laa a kanga ni gi na yanga ti sake ni.

²⁸Lo tene na a-ita ti lo, lo tene: “A kiri na nginza ti mbi ni na mbi. Ala baa, ni laa ayeke na ya ti sake ti mbi so!” Be ti ala agi ala si mbeto asara ala. Ala hunda tere ti ala na popo ti ala, atene: “Nyen laa Nzapa asara na e tongaso so?”

²⁹So ala si na tere ti babâ ti ala Jacob na sese ti Kanaan, ala fa peko ti aye so kue asi na ala so, ala tene:

³⁰“Koli so ayeke komanda ti kodro ni so atene tënë na e na ngangu. Lo mu e tongana azo ti *bembengo ndo.

³¹E kiri tënë na lo, e tene: ‘E yeke azo ti handango zo pepe; e yeke azo ti bembengo ndo pepe.

³²E yeke ando amolenge-koli baleoko na use ti babâ oko. Mbeni molenge ni oko ayeke daa mbeni pepe si tanga ti ita ti e ayeke na tere ti babâ ti e na ndembe so na sese ti Kanaan.’

³³Koli so ayeke komanda na ndö ti kodro ni atene na e: ‘Baa, ye so alingbi ti fa atene ala yeke azo ti handango zo pepe ayeke so: ala zia mbeni ita ti ala oko na tere ti mbi na ndo so; ala mu kobe ague na ni na azo ti da ti ala ndali ti kota nzara so.

³⁴Ala gue, amu tanga ti ita ti ala aga na lo na mbi. Tongaso si mbi hinga, mbi tene, ala yeke azo ti bembengo ndo pepe; ala yeke azo ti handango zo pepe. Tongaso si mbi kiri ande ita ti ala na ala si ala lingbi ti ka aye, ti vo aye ti ala na ya ti kodro ni.’ ”

³⁵Na pekoni, so ala yeke tuku aye so ayeke na ya ti asake ti ala, ala baa so bozo ti nginza ti zo oko oko ayeke na ya ti sake ti lo. So ala na babâ ti ala kue abaa abozo ti nginza ni, mbeto agbu ala.

³⁶Babâ ti ala Jacob atene na ala: “Ala ye ti mu amolenge ti mbi kue na tere ti mbi ti hon na ala! Joseph ayeke daa mbeni pepe; Siméon ayeke daa mbeni pepe; ala ye ti mu Benjamin ti hon na lo na tere ti mbi! Pasi ni kue aga gi na ndö ti mbi.”

³⁷Ruben atene na babâ ti lo: “Tongana mbi kiri na Benjamin na mo pepe, fade mo fâ amolenge ti mbi ti koli use. Zia tënë ti Benjamin na maboko ti mbi, fade mbi yeke kiri na lo na mo.”

³⁸Jacob atene: “Molenge ti mbi ayeke gue na ala pepe, ngbanga ti so ita ti lo akui awe si lo ngba gi lo oko. Tongana mbeni ye ti sioni asi na lo na lege so ala yeke gue daa, fade ala sara titene mbi so kua ti li ti mbi avuru kue awe so, mbi gue na vundu na be ti mbi na ndo ti akuâ.”