Read sango Tongo nda ti aye 47 Bible Online

Tongo nda ti aye 47 - sango bible

Tongo nda ti aye 47

¹Tongaso Joseph ague, atene na Faraon: “Babâ ti mbi, na a-ita ti mbi amu angasa ti ala, ataba ti ala, abagara ti ala, na aye so kue ala yeke na ni; ala londo na kodro ti Kanaan asi ge awe. Baa, ala yeke na sese ti Goshen.”

²Na pekoni, lo mu ambeni ita ti lo ti koli oku na popo ti amba ti ala si lo fa ala na Faraon.

³Faraon ahunda ala, atene: “Kua ti ala ayeke nyen?” Ala kiri tënë na lo, atene: “Gbia, e azo ti gbe ti mo, e yeke awabatango-nyama, tongana akotara ti e.

⁴E ga ti sara kodro ge, ngbanga ti so kota nzara ahon ndoni na sese ti Kanaan si pere ti tengo ni ndali ti anyama ti e, azo ti gbe ti mo ayeke daa pepe. Tongaso, e gbu gere ti mo gbia titene mo zia e azo ti gbe ti mo, e duti na sese ti Goshen.”

⁵Faraon atene na Joseph: “Babâ ti mo na a-ita ti mo aga na tere ti mo awe.

⁶Kodro ti Ezipte kue laa ayeke na maboko ti mo so. Sara titene babâ ti mo na a-ita ti mo asara kodro na taa nzoni sese ti kodro ni. Ala lingbi ti duti na sese ti Goshen. Tongana mo baa ambeni ngangu zo ti kua na popo ti ala, ayeke nzoni mo mu ala si ala ga azo ti bango ndo na ndö ti anyama ti mbi.”

⁷Joseph aga na babâ ti lo Jacob si lo fa lo na Faraon. Jacob abara Faraon.

⁸Faraon ahunda Jacob, atene: “Ngu ti mo ayeke oke?”

⁹Jacob akiri tënë, atene: “Ngu so kue mbi sara na tambulango ti mbi na dunia so ayeke ngbangbo oko na baleota. Ngu ni ayeke mingi pepe, me aye ti sioni asi singo daa. Ngu ti mbi ni alingbi na ngu so akotara ti mbi asara na tambulango ti ala na dunia so pepe.”

¹⁰Jacob akiri abara Faraon, na pekoni, lo londo, lo sigigi.

¹¹Joseph amu ndo na babâ ti lo, na a-ita ti lo titene ala sara kodro daa. Lo mu na ala sese na kodro ti Ezipte, na nzoni sese ti kodro ni, so ti tene na kodro ti Ramses tongana ti so Faraon amu yanga na lo.

¹²Joseph amu na babâ ti lo, na a-ita ti lo, na asewa ti babâ ti lo, kobe ti tengo ni alingbi na wungo ti amolenge so ala yeke na ni.

¹³Kobe ahunzi na ndo kue, ngbanga ti so kota nzara ni ahon ndoni. Azo ti kodro ti Ezipte na ala ti Kanaan kue awoko na nzara ni.

¹⁴Joseph abongbi nginza so kue azo ti Ezipte na ala ti Kanaan avo na ale ti *ble si lo gue na nginza ni na yangbo ti Faraon.

¹⁵So nginza ti azo ti Ezipte na ti ala ti Kanaan ahunzi awe, azo ti Ezipte ague na tere ti Joseph si atene: “Mu na e kobe ti tengo ni maa! Mo ye e kui na le ti mo, ngbanga ti so nginza ti e ahunzi awe so?”

¹⁶Joseph akiri tënë, atene: “Tongana nginza ti ala ahunzi, ayeke nzoni ala mu na mbi anyama ti ala si mbi mu na ala kobe ni.”

¹⁷Tongaso azo ni amu anyama ti ala aga na ni na Joseph. Joseph amu na ala kobe si ala mu na lo ambarata, angasa, ataba, abagara, na alele. Na ngu ni so, lo mu na ala kobe si ala mu na lo anyama ti ala kue.

¹⁸So ngu ti so ahon awe, azo ti kodro ni aga na tere ti Joseph na ngu ti peko si ala tene na lo: “E yeke honde mbeni ye na mo kota zo ti e pepe: nginza ahunzi na e awe; e mu anyama ti e kue na mo awe. Ye so angba na e ayeke gi ngbongboro tere ti e na asese ti e.

¹⁹Titene e kui na le ti mo si asese ti e abuba, so ayeke nzoni? Ayeke nzoni mo mu e na asese ti e si mo mu na e ale ti kobe na pekoni. Tongaso e ga angbaa ti Faraon, e na asese ti e kue. Mu na e ale ti kobe si e kui pepe, e ngba na fini si asese ti e angba gi senge senge pepe.”

²⁰Joseph avo asese ti kodro ti Ezipte kue si aga ti Faraon, ngbanga ti so nzara asara sana mingi na azo ti kodro ni si ala ka ayaka ti ala.

²¹Lo mu azo ti kodro ni, alondo na mbeni yanga ti kodro ni, asi na mbeni yanga ni si ala ga angbaa.

²²Asese so lo vo ni pepe ayeke asese ti awayango-sandaga, ngbanga ti so Faraon amu mbeni mbela ndali ti ala. Ala yeke te kobe so Faraon ayeke mu na ala; ndani laa si ala ka asese ti ala pepe.

²³Joseph atene na azo ti kodro ni: “Ala baa, laso, mbi vo ala na asese ti ala kue ndali ti Faraon awe. Ale ti kobe laa, ala mu ni alu na ya ti ayaka ni.

²⁴Na ngoi ti kongo ale ni, fade ala kangbi ya ni oku. Ala mu mbeni mbage ni oko na Faraon. Tanga ti mbage ni osio so ayeke ti ala. Ala mu mbage ni alu si ala te mbage ni, ala na azo ti sewa ti ala, na akete molenge ti ala.”

²⁵Azo ni akiri tënë, atene: “Mo soo e na kuâ awe. Tongana kota zo abaa nzoni na le ti lo, e yeke ga angbaa ti Faraon.”

²⁶Joseph asigigi na mbeni mbela ndali ti azo ti Ezipte kue. Mbela ni ahunda titene azo kue akangbi ya ti ale ti kobe ti ala oku, si ala mu na Faraon mbeni mbage ni oko. Mbela so angba ngbii asi laso. Gi asese ti awayango-sandaga laa aga ti Faraon pepe.

²⁷Azo ti Israel aduti na Ezipte, na sese ti Goshen. Kâ, ala wara aye, ala du, ala wu mingi mingi.

²⁸Jacob asara ngu baleoko na mbarambara na Ezipte. Tongaso Jacob asara ngu ngbangbo oko na baleosio na mbarambara na ndö ti gigi.

²⁹So lo ga nduru ti kui awe, lo iri molenge ti lo Joseph si lo tene na lo: “Tongana mo baa mbi na nzoni le, mo zia maboko ti mo na gbe ti ngbonda ti mbi. Sara nzoni be na mbi, mo fa na mbi biani so mo yeke lu kuâ ti mbi na Ezipte ge pepe.

³⁰Mbi yeke kui ti mu peko ti akotara ti mbi. Ayeke nzoni mo mu kuâ ti mbi na kodro ti Ezipte, mo gue, mo lu ni na ndo so a lu akotara ti mbi daa.” Joseph akiri tënë na lo, atene: “Mbi yeke sara ande tongana ti so mo hunda so.”

³¹Jacob atene na lo: “Deba yanga ti mo na mbi si.” Joseph adeba yanga ti lo. Tongaso Jacob akuku na mbage ti li ti gbogbo ti lo.