Read sango Tongo nda ti aye 48 Bible Online

Tongo nda ti aye 48 - sango bible

Tongo nda ti aye 48

¹Na peko ti aye so, azo atene na Joseph: “Baa, babâ ti mo ayeke na kobela.” Tongaso Joseph amu amolenge ti lo ti koli Manase na Efraim na tere ti lo si lo gue ti baa babâ ti lo.

²Azo atene na Jacob: “Baa, molenge ti mo Joseph aga ti baa mo.” Jacob asara ngangu, lo londo si lo duti na ndö ti gbogbo ti lo.

³Lo tene na Joseph: “Nzapa so ngangu ti lo ahon angangu kue, asi ando na mbi na gbata ti Luz, na sese ti Kanaan si lo sara tufa na ndö ti mbi.

⁴Lo tene na mbi: ‘Baa, mbi yeke sara titene mo du ande amolenge, ala wu mingi. Mbi yeke sara titene azo ti amara mingi mingi abaa gigi na lege ti mo. Mbi yeke mu sese so na *ahale ti mo na peko ti mo si angba ti ala biani kpu na kpu.’

⁵Fadeso, amolenge-koli use so mo du ala na sese ti Ezipte kozoni si mbi ga na peko ti mo na kodro ni so, ayeke ti mbi. Efraim na Manase ayeke amolenge ti mbi tongana ti so Ruben na Siméon ayeke amolenge ti mbi so.

⁶Me amolenge so mo yeke du ala na peko ti Efraim na Manase so ayeke ti mo. Fade ala yeke wara ti ala sese ni titene aga ti ala na kodro ti ayaya ti ala.

⁷Ti mbi, na ndembe so mbi londo na sese ti Mezopotamii si mbi yeke ga, wali ti mbi Rachel akui na maboko ti mbi na lege, na ndembe so e ga nduru ti si na Efrata, na sese ti Kanaan. Mbi lu lo gi na tere ti lege so ague na Efrata so ayeke na Betlehem.”

⁸So Jacob abaa amolenge ti Joseph, lo hunda ndo, lo tene: “So azo wa laa?”

⁹Joseph akiri tënë na babâ ti lo, atene: “Amolenge so Nzapa amu ala na mbi ge so laa.” Jacob atene: “Mo ga na ala na tere ti mbi ge, titene mbi sara tufa na ndö ti ala.”

¹⁰Le ti Jacob ayeke baa ndo nzoni pepe, ngbanga ti so lo ga mbakoro awe. Joseph amu amolenge ni, lo ga na ala na lo; Jacob agbu ala na kate ti lo si lo su ngbangba ti ala.

¹¹Lo tene na Joseph: “Mbi baa ando mbi tene, mbi yeke kiri ti baa le ti mo pepe. Laso, Nzapa asara titene mbi baa mo na *ahale ti mo kue.”

¹²Joseph azi amolenge ni na ndö ti gere ti babâ ti lo, lo kuku, lo kpo li ti lo na sese.

¹³Joseph agbu amolenge ti lo use kue. Lo gbu Efraim na mbage ti maboko ti lo ti koli, so ti tene na mbage ti maboko ti Jacob ti wali. Lo gbu Manase na mbage ti maboko ti lo ti wali, so ti tene na mbage ti maboko ti Jacob ti koli. Lo gue na ala nduru na tere ti Jacob.

¹⁴Me Jacob amu maboko ti lo ti koli ahon na ni na ndö ti maboko ti lo ti wali si lo zia na li ti Efraim so ayeke ngambe ni. Lo mu maboko ti lo ti wali, lo hon na ni na gbe ti maboko ti lo ti koli si lo zia na li ti Manase, ataa so Manase ayeke kozo molenge ni.

¹⁵Na pekoni, lo sara tufa na ndö ti Joseph, lo tene: “Ayeke nzoni Nzapa so ababâ ti mbi Abraham na Isaac atambula na lege ti lo so, lo so lo to nda ti batango mbi na molenge ngbii asi laso so,

¹⁶ayeke nzoni *ange so azi mbi na ya ti ye ti sioni asara tufa na ndö ti amolenge so. Ayeke nzoni iri ti mbi na ti ababâ ti mbi Abraham na Isaac angba ti wu ndali ti ala. Ayeke nzoni ala du amolenge mingi si ala wu mingi na ndö ti sese.”

¹⁷Joseph abaa so babâ ti lo azia maboko ti lo ti koli na li ti Efraim; so asara nzoni na lo pepe. Lo zi maboko ti babâ ti lo ni na li ti Efraim ti zia ni na li ti Manase.

¹⁸Lo tene na babâ ti lo, lo tene: “Lege ni laa pepe, babâ! Kozo molenge ni laa ge so. Zia maboko ti mo ti koli na li ti lo.”

¹⁹Babâ ti lo ni ake si atene: “Mbi hinga, molenge ti mbi! Mbi hinga! Fade ahale ti Manase ayeke ga kota mara. Lo nga lo yeke ga kota zo. Me ngambe ti lo ayeke ga kota ahon lo. Fade ahale ti ngambe ni ayeke ga amara mingi mingi.”

²⁰Lo sara tufa na ndö ti ala na lango ni so, lo tene: “Fade azo ti Israel ayeke sara tufa na ndö ti azo na iri ti amolenge ni, atene: ‘Ayeke nzoni Nzapa asara na ala tongana ti so lo sara na Efraim na Manase so.’ ” Lege so Jacob azia Efraim na kozo ndo si lo zia Manase na peko laa.

²¹Na pekoni, Jacob atene na Joseph: “Baa, mbi ga nduru ti kui awe. Me fade Nzapa ayeke na ala si lo yeke kiri na ala na sese ti akotara ti ala.

²²Na ndö ti sese so mo wara, mbi yeke mu nga na mo Sishem. Mbi yeke mu na mo mbage ti sese oko ahon ti a-ita ti mo. Mbi tiri bira na azo ti mara ti Amori si mbi mu sese ni na maboko ti ala na lege ti yongoro zeme nga na kokora.”