Read sango Tongo nda ti aye 49 Bible Online

Tongo nda ti aye 49 - sango bible

Tongo nda ti aye 49

¹Jacob airi amolenge ti lo ti koli si lo tene na ala: “Ala bongbi tere ti ala titene mbi fa na ala ye so ayeke si na ala gbanda.

²Amolenge ti Jacob, ala bongbi tere ti ala ti ma tënë! Ala ma tënë ti mbi, Israel, babâ ti ala!

³Ruben, mo yeke kozo molenge ti mbi, mo laa mo yeke kozo ngangu ti tere ti mbi. Mo yeke kozo molenge so mbi ngba ngangu si mbi du mo. Mo hon amba ti mo kue na lege ti nengo tere, nga na ngangu.

⁴Me mo yeke tongana ngu so ayeke sua gi ngangu ngangu so. Mo yeke ngba ande yaya ti a-ita ti mo pepe. Mo lango na ndö ti gbogbo ti mbi, babâ ti mo si mo sara titene gbogbo ti mbi aga sioni.

⁵Siméon na Lévi ayeke a-ita. Mango tere ti ala ayeke ti sara gi ngangu na azo.

⁶Mbi ye ti li na ya ti bongbi ti lekengo tënë ti ala pepe, mbi yeke bongbi tere na ala pepe. Na ya ti ngonzo ti ala, ala fâ zo, ndali ti nzerengo tere ti ala, ala fâ ngbongo ti akoli-bagara.

⁷Mbi deba ngonzo ti ala; ngonzo ti ala ni ayeke sioni mingi! Mbi deba nga sarango ye ti ala na ngonzo; sarango ye ti ala ni ayeke sioni mingi! Mbi yeke kangbi ya ti ala na sese ti Jacob kue si ala yeke kangbi tere ti ala na ya ti kodro ti Israel.

⁸Juda, fade a-ita ti mo ayeke gonda mo. Mo yeke gbu go ti awato ti mo, amolenge ti babâ ti mo ayeke kuku na gbe ti mo.

⁹Juda, molenge ti mbi, mo yeke tongana mbeni kete bamara so afâ nyama si akiri na ni na ndo ti lango ti lo. Lo kuku, lo lango na sese, lo kpa koli-bamara wala wali-bamara. Zo wa laa alingbi ti ndu lo titene lo londo?

¹⁰Mbata ti gbia ayeke ngba lakue na ya ti sewa ti Juda. *Ahale ti lo ayeke ngba lakue na komandema, ngbii taa wa ti komandema ni asi. Lo laa azo ti mara kue ayeke ma yanga ti lo.

¹¹Lo yeke kanga lele ti lo na tere ti keke ti *vinye, lo yeke kanga molenge ti lele ti lo na tere ti pendere keke ti vinye. Lo yeke sukula bongo ti lo na ya ti vin, lo yeke sukula yongoro bongo ti lo na ngu ti ale ti vinye.

¹²Le ti lo aza, apendere ahon vin, pembe ti lo avuru ahon ngu ti me ti bagara.

¹³Zabulon ayeke lango ande na yanga ti kota ngu-ingo, lo yeke luti na tere ti amangboko. Yanga ti kodro ti lo ayeke gue ngbii asi na Sidon.

¹⁴Isakar ayeke tongana mbeni ngangu lele, lo yeke lango na popo ti agbagba use.

¹⁵Lo baa lo tene wungo tere ayeke nzoni si sese ni nga ayeke nzoni na le ti lo. Lo yoro go ti lo titene a zia nengo kungba daa, lo yeke sara kua ti ngbaa.

¹⁶Dan ayeke fâ ande ngbanga ti azo ti kodro ti lo, tongana ti ambeni mara ti Israel oko oko.

¹⁷Dan ayeke duti tongana mbeni ngbo na ndö ti lege, lo yeke duti tongana sioni ngbo na ndö ti kete lege, lo yeke te gere ti mbarata si zo ti kpengo na mbarata ni ati, le ti lo na nduzu.

¹⁸*KOTA GBIA, mbi yeke ku songo so mo yeke soo azo na kuâ.

¹⁹Gad, *azaragina atuku na ndö ti lo, me lo ti na ndö ti ala si lo yeke tumba peko ti ala.

²⁰Aser ayeke na anzoni kobe ti tengo ni, lo laa lo yeke mu na azo anzerengo kobe ti gbia.

²¹Neftali ayeke tongana mbeni wuga so ayeke tambula tongana ti so be ti lo aye. Lo yeke du apendere molenge.

²²Joseph ayeke tongana mbeni keke so ayeke le mingi, keke so ayeke na tere ti li ti ngu. Amaboko ti keke ni ayeke hon na ndö ti gbagba ti kodro.

²³Azo ti pikango kokora agi yanga ti lo, ala tokua ale ti kokora na ndö ti lo, ala tiri bira na lo.

²⁴Me lo gbu kokora ti lo lakue ngangu, maboko ti lo angba daa ngangu na lege ti ngangu ti Nzapa, lo so lo yeke ngangu Nzapa ti Jacob, Nzapa so ayeke tongana wabatango-taba, wala tongana têne so ayeke bata azo ti Israel.

²⁵Fade Nzapa ti babâ ti mo ayeke mu na mo maboko, Nzapa so ngangu ti lo ahon angangu kue. Lo yeke sara tufa na ndö ti mo, tufa ni ayeke ga na lege ti ngu-Nzapa so ayeke pika, na lege ti angu so ayeke sigigi na gbe ti sese, na lege ti dungo ti awali, na dungo ti anyama.

²⁶Tufa so babâ ti mo asara na ndö ti mo so ayeke ngangu ahon tufa so azo ti dungo mbi asara na ndö ti mbi. Tufa ni ahon anzoni kobe ti ndö ti ahoto ti kozoni. Fade tufa ni so ayeke ngba na ndö ti Joseph, lo so lo yeke makonzi na ndö ti a-ita ti lo.

²⁷Benjamin ayeke tongana mbo ti ngonda so ayeke suru ya ti nyama. Na ndaperere, lo yeke te nyama so lo fâ; na lakui, lo yeke kangbi ya ti nyama so lo gbu.”

²⁸Mara baleoko na use ti azo ti Israel kue laa. Tënë so babâ ti ala atene ti sara tufa na ndö ti ala laa. Lo sara tufa na ndö ti ala si tufa ti zo oko oko ayeke nde na ti mba ti lo.

²⁹Na pekoni, Jacob amu yanga na amolenge ti lo, atene: “Mbi yeke gue na peko ti akotara ti mbi so akui so. Ayeke nzoni ala lu kuâ ti mbi na tere ti akotara ti mbi, na ya ti du ti têne so ayeke na yaka ti Efron, zo ti mara ti Het.

³⁰Yaka ni ayeke na kodro ti Makpela, abaa le na kodro ti Mamre, na sese ti Kanaan. Abraham avo lani yaka ni na maboko ti Efron titene aga ndo ti lungo akuâ ti sewa ti lo.

³¹Kâ si a lu kuâ ti Abraham na wali ti lo Sara; kâ si a lu kuâ ti Isaac na wali ti lo Rébecca; kâ si mbi lu kuâ ti Lea.

³²Yaka ni na du ti têne so ayeke na ya ni, a vo ni na maboko ti azo ti mara ti Het.”

³³So Jacob ahunzi ti mu yanga na amolenge ti lo ti koli awe, lo bongbi agere ti lo daa na ndö ti gbogbo, lo kui si lo gue na peko ti akotara ti lo so akui so.