Read sango Tongo nda ti aye 5 Bible Online

Tongo nda ti aye 5 - sango bible

Tongo nda ti aye 5

¹So ayeke mbeti so a su tënë ti sewa ti Adam daa. Na lango so Nzapa asara zo, lo sara zo ni gi tongana lo Nzapa;

²lo sara ala koli na wali. Lo sara tufa na ndö ti ala si lo di iri ti ala azo, na lango so lo sara ala.

³Adam ayeke na ngu ngbangbo oko na baleota si lo du mbeni molenge-koli; lo di iri ti molenge ni Set. Molenge ni ayeke gi tongana lo si lo kpa taa gi lo.

⁴Na peko ti dungo Set, Adam aduti na gigi ngu ngbangbo miombe. Lo du amolenge-koli na amolenge-wali.

⁵Ngu ti Adam kue ayeke ngu ngbangbo gumbaya na baleota si lo kui.

⁶Set ayeke na ngu ngbangbo oko na oku si lo du Enos.

⁷Na peko ti dungo Enos, Set aduti na gigi ngu ngbangbo miombe na mbarambara. Lo du amolenge-koli na amolenge-wali.

⁸Ngu ti Set kue ayeke ngu ngbangbo gumbaya na baleoko na use si lo kui.

⁹Enos ayeke na ngu balegumbaya si lo du Kenan.

¹⁰Na peko ti dungo Kenan, Enos aduti na gigi ngu ngbangbo miombe na baleoko na oku. Lo du amolenge-koli na amolenge-wali.

¹¹Ngu ti Enos kue ayeke ngu ngbangbo gumbaya na oku si lo kui.

¹²Kenan ayeke na ngu balembarambara si lo du Malaleel.

¹³Na peko ti dungo Malaleel, Kenan aduti na gigi ngu ngbangbo miombe na baleosio. Lo du amolenge-koli na amolenge-wali.

¹⁴Ngu ti Kenan kue ayeke ngu ngbangbo gumbaya na baleoko si lo kui.

¹⁵Malaleel ayeke na ngu baleomene na oku si lo du Yered.

¹⁶Na peko ti dungo Yered, Malaleel aduti na gigi ngu ngbangbo miombe na baleota. Lo du amolenge-koli na amolenge-wali.

¹⁷Ngu ti Malaleel kue ayeke ngu ngbangbo miombe na balegumbaya na oku si lo kui.

¹⁸Yered ayeke na ngu ngbangbo oko na baleomene na use si lo du Henok.

¹⁹Na peko ti dungo Henok, Yered aduti na gigi ngu ngbangbo miombe. Lo du amolenge-koli na amolenge-wali.

²⁰Ngu ti Yered kue ayeke ngu ngbangbo gumbaya na baleomene na use si lo kui.

²¹Henok ayeke na ngu baleomene na oku si lo du Matusalem.

²²Na peko ti dungo Matusalem, Henok atambula na Nzapa na ya ti ngu ngbangbo ota. Lo du amolenge-koli na amolenge-wali.

²³Ngu ti Henok kue ayeke ngu ngbangbo ota na baleomene na oku.

²⁴Lo tambula na Nzapa; na pekoni lo yeke daa mbeni pepe, ngbanga ti so Nzapa amu lo ahon na lo.

²⁵Matusalem ayeke na ngu ngbangbo oko na balemiombe na mbarambara si lo du Lemek.

²⁶Na peko ti dungo Lemek, Matusalem aduti na gigi ngu ngbangbo mbarambara na balemiombe na use. Lo du amolenge-koli na amolenge-wali.

²⁷Ngu ti Metushela kue ayeke ngu ngbangbo gumbaya na baleomene na gumbaya si lo kui.

²⁸Lemek ayeke na ngu ngbangbo oko na balemiombe na use si lo du molenge-koli.

²⁹Lo di iri ti molenge ni Noe; lo tene: “Fade lo laa lo yeke sara titene be ti e ade na peko ti akua na apasi so e yeke baa ndali ti sese so KOTA GBIA adeba ni so.”

³⁰Na peko ti dungo Noe, Lemek aduti na gigi ngu ngbangbo oku na balegumbaya na oku. Lo du amolenge-koli na amolenge-wali.

³¹Ngu ti Lemek kue ayeke ngu ngbangbo mbarambara na balembarambara na mbarambara si lo kui.

³²Noe ayeke na ngu ngbangbo oku si lo du Sem, Kam na Yafet.